Mangusar na Epektibon Paraan na Panangigapoy Tongtongan
1. Antoy naaralan tayod nanduruman paraan na impangipasabi na saray inmunan Kristiano ed mensahe ra?
1 Impulong na saray inmunan Kristiano so maong a balita ed saray totoon nandurumay kultura tan relihyon da. (Col. 1:23) Anggaman saksakey so mensahe—say Panarian na Dios—nanduruma so paraan na impangipasabid satan depende ed nakatongtong. Alimbawa, nen akitongtong si Pedro ed saray Judion baleg so respeto dad Kasulatan, inggapo to itan diad impamitla tod imbaga nen propetan Joel. (Gawa 2:14-17) Balet imanoen no panon ya akikatunongan si Pablo ed saray Griego, ya nabasad Gawa 17:22-31. Diad panaon tayo, rerespetoen na arum a totood teritorya tayo so Kasulatan, tan nayari tayon usarey Biblia sano manpupulong tayod kaabungan. Balet ompan kaukolan tayoy magmaliw ya mas mataktika no mitotongtong ed saramay ag-interesadod Biblia o relihyon odino saramay aliwan Kristiano so relihyon da.
2. Panon tayon usaren so opresin literatura pian natulongan iramay rerespetoen day Biblia tan saramay agmanrerespetod satan?
2 Usaren Iray Opresin Literatura Diad Epektibon Paraan: Saray opresin literatura ed sayan service year et nasalatan kada duay bulan, nayarin saratan et magasin, tract, odino brosyur. Anggano maslak ed saray totood teritorya tayo et ag-interesadod Biblia, nayari tayo nin siansian itongtong ed sikara so sakey ya topic ya makapainteres ed sikara manlapud saray literatura tayo. Nayarin ag-itayo mangibasa na teksto odino direktan tukoyen so Biblia diad unonan pitongtong, balet no angipanengneng na interes so householder, nayari tayon pawilen pian tulongan ya nawalaay pananisia ed Amalsa tan say pinuyanan a Salita to. Balet no manpupulong tayod saray totoon rerespetoen day Biblia, nayari tayon mangusar na literatura tan paraan na pitongtong ya matukoy ed sikara. Diad tua, nayari tayon iyopresi so libron Ibabangat na Biblia odino saray brosyur ya Listen to God tan say Ondengel ed Dios Pian Manbilay ya Andi-angga, anggano aliwan saratan so opresin literatura ed satan a bulan. Say importante et mangusar na epektibon panangigapo na tongtongan.
3. Akin ya nibagan saray puso na totood teritorya tayo et singa dalin?
3 Iparaan so Dalin: Say puso na too et singa dalin. (Luc. 8:15) Say arum a dalin et mankaukolay dakel a panagparaan pian onlamot tan ontubo iray bini na katuaan a manlapud Biblia. Maaligwas so impangitanem na saray ebanghelisador nen inmunan siglo diad nanduruman klase na dalin, tan satan so angiter ed sikara na liket tan inkapnek. (Gawa 13:48, 52) Magmaliw tayo met ya maaligwas no ikdan tayoy imano so paraan na pitongtong tayo.