Tepet

◼ Panon tayon naamtaan no kasin mangitilak tayoy literatura?

Say manunan ikonsidera tayo et no kasin interesado so too. No talagan angipatnag na interes, nayarin itilakan tayo na duaran magasin o sakey a brosyur, libro, odino arum nin literatura ya iyoopresi tayo. Gawaen itan anggano nalikas tayon melag odino anggapoy naidonasyon to parad sankamundoan a kimey. (Job 34:19; Apo. 22:17) Balet, agtayo ititilak iray papablien tayon literatura ed saray agmangapresya ed saratan.​—Mat. 7:6.

Panon tayon nibagan interesado so householder? Say sakey a pakapatnagan et labay toy mitongtong ed sikatayo. No ondedengel ed ibabaga tayo, oneebat ed saray tepet, tan mangibabagay opinyon to, pakapatnagan iraya ya mibibiang ed tongtongan. No susubaybayan toy pambabasa tayo na Biblia, mapatnag ya rerespetoen toy Salita na Dios. Kaslakan ya maabig so pantepet no kasin labay ton basaen so literaturan iyoopresi tayo. Nepeg ya usaren na saray manangipalapag so pakatebek pian naamtaan no kasin interesado so too. Singa bilang, sano mani-street witnessing, aliwan matukoy no basta labat la iter iray magasin, brosyur, odino libro ed amin lan ondalan. No agtayo segurado no interesado so too, mas maabig no say iter tayo et handbill o tract.

Ontan met, say karakel na literaturan alaen na sakey a manangipalapag diad counter et depende ed kaukolan to diad pampulong to, aliwan diad karakel na naidonasyon to. Saray donasyon et aliwan bayar ed saray literatura noagta panuporta ed amin a kabiangan na sankamundoan a panagpulong a kimey tayo. Mairap man o mayaman, pakiwasen itayo na apresasyon tayo ya mabulos a mangiter no antoy nayarian tayo aliwan lapud walay sulok tayo, pian nasuportaan so Panarian. (Mar. 12:41-44; 2 Cor. 9:7) Pakiwasen to itayo met ya say alaen tayo labat ya literatura et say kaukolan tayo, pian agnasayang so kuartan indonasyon ya ginastos parad saray literatura.

[Blurb ed pahina 2]

Nepeg ya usaren na saray manangipalapag so pakatebek pian naamtaan no kasin interesado so too