Paaligwasen Iray Abilidad Tayod Ministeryo—Pagmaliw a Maabig ya Kaiba

No Akin ya Importante: Amta nen Jesus ya mas maabig so manpulong ya walay kaiba. Kanian nen imbaki to ra may 70 a disipulo ton manpulong, imbaki to ran sanderwa. (Luc. 10:1) Nayarin makatulong so kaiba no say sakey a manangipalapag et nairapan ed sakey ya situasyon odino agsegurado ed iyebat tod householder. (Ecl. 4:9, 10) Sarag ton inabang so eksperiensya to tan sagpaminsan et makapangiter na suhestion ya makatulong ed ka-partner to pian magmaliw ya mas epektibo ed panagpulong. (Uli. 27:17) Napaseseg to met diad makapabiskeg ya tongtongan legan dan manaakar paonlad saray kaabungan.—Fil. 4:8.

No Panon Iyan Nagawaan:

Dengel ka legan ya mitotongtong so ka-partner mo. (Sant. 1:19) Ibukay mo met so Bibliam no walay tekston basaen. Diad ontan et mas akaparaan kan ontulong no nakaukolan.
Usarey pakatebek no kasin kaukolan tan no kapigan ya mibiang ed tongtongan. (Uli. 25:11) No walay manangipalapag ya ibaan mon mangiyaral na Biblia, makatulong so sagpaminsan ya pankomentom. Balet, no manpupulong kayod kaabungan, nayarin mas labay na ka-partner mo ya abuloyan mon sikatoy mansalita no betang to la. Siempre, no sikatoy balo nin manangipalapag odino agsegurado no antoy iyebat tod sakey ya tepet odino isusuppiat, talagan naapresya toy tulong mo. Balet balanglan diad panagpulong ed kaabungan, panagpawil, odino panangiyaral na Biblia, agka onsasalet, tan agmo sosoloey tongtongan, odino agka mangigagapoy sananey ya topic.
Inabang iray eksperiensyam. No walay pankanawnawan makapangiter kay suhestion ed ka-partner mo pian mas magmaliw ya epektibo ed panagpulong, gawam itan. (Uli. 3:27) Diad dugan pankanawnawa, nayarin ibagam: “Antoy nibagam ed samay impitongtong ta ey?” odino “Walay suhestion ko,” odino “Onia ay so gagawaen ko.” Tandaan mo ya anggaman apresyaen na arum so sagpaminsan ya suhestion, nadismaya ra balet no kada nalingo ra et ipaimanod sikara.

Gawaen Iya Legan na Sayan Bulan:

Kayari ministeryo, ibagam ed aka-partner mo no antoy imbaga odino ginawa to ya lapud satan et sikatoy nagmaliw a maabig ya kaiba.