Paaligwasen Iray Abilidad Tayod Ministeryo—Ipasal Iray Iyaaralan ya Nawalaay Makagunggonan Panagaral

No Akin ya Importante: Pian onaligwas ed espiritual, nepeg ya pakanen na iyaaralan so nonot tan puso to na aliwa labat lan saray manunan bangat na Salitay Dios. (Heb. 5:12–6:1) Say panaral et kaukolan toy sagpot. Kaibad satan so pangikonekta na balon impormasyon ed saray dati tayo lan amta tan talosan no akin ya praktikal itan. (Uli. 2:1-6) No naaralan to so man-research ya bukor, sarag ton ebatan iray tepet ed Biblia panamegley na saray publikasyon tayo. Say pansasagpot dan iyaplikay nanaaralan da et ontulong pian nasarag da iray arapen dan subok bilang Kristiano.—Lucas 6:47, 48.

No Panon Iyan Nagawaan:

Idanet so kaimportantian na ikerew na tulong nen Jehova diad pikakasi antis na kada panaral.—Juan 14:26; 1 Cor. 2:10.
Manlapud gapo, pasesegen so iyaaralan ya manparaan a masakbay ed panaral yo. Ipanengneng moy uusaren mod panagaral, insan ibangat mon gulisan o markaan to labat iray importantin salita.
Paebatan ed sikato so tepet diad sarili ton salita. Aggagawaen ya boring ya tepet tan ebat so panaral, tan basaen labat na iyaaralan iray ebat ed libro.
Pasesegen ya manbasa na Biblia ya inagew-agew. Ipanengneng ed sikato so eskedyul na panagbasa ed Biblia diad jw.org, ya mangipanengneng na praktikal a paraan ya panggawad satan. Kaukolan so determinasyon pian napasalan so manbasa na Biblia ya inagew-agew, balet seguradon nabawbawi so sagpot ed panggawad satan.—Sal. 1:2, 3.
Ipanengneng ed iyaaralan no panon ton naalmoy ebat ed saray tepet ed Biblia ya usarey Watchtower Library odino Watchtower ONLINE YA LIBRARYA. Tulongan ya nibiig to ray mnemonic symbol na saray publikasyon ya mabetbet ya uusaren ed saray aral.

Gawaen Iya Legan na Sayan Bulan:

Diad sampot na subheading o kapitulo, ipasumaryo ed iyaaralan na Biblia diad pigaran sentence iray naaralan to. No anggapoy iyaaralan mo, ipasal so pansumaryo na teksto ed Biblia o parapo manlapud Say Panag-bantayan diad pigaran sentence, pian napaaligwas moy abilidad mon talosay babasaen mo.