Tepet

◼ Kapigan nayari lan itunda so panangiyaral na Biblia?

No say iyaaralan mo et agla onaaligwas ed espiritual, nayarim lan itunda so panagaral yo na Biblia diad mataktikan paraan. (Mat. 10:11) Ikonsidera iraya: Kasin wadtan no eskedyul na panagaral yo? Kasin ipaparaan to lan masakbay so panaralan yo? Kasin akaatendi la ed saray miting na kongregasyon? Kasin ibabaga to lad arum so nanaaralan to? Kasin wala la ray pananguman ya gagawaen to based saray prinsipyo na Biblia? Siempre, ikonsideram met so edad tan abilidad to, ya nonot mon aliwan pareparehoy peles na iyaaligwas na kada iyaaralan. Ontan met, no itundam so panangiyaral, ipaamtam ed sikato ya sarag yo lamet so manaral diad arapen no akaparaan la.​—1 Tim. 2:4.