No Akin ya Agmanunda so Guerra tan Panlalaban

KASALANAN

Pinalsa o ginawa na Dios so inmunan atateng tayo, si Adan tan Eva, “unong ed indengan” to. (Genesis 1:27) Labay ton ibaga, sarasarag dan ipanengneng iray kualidad na Dios, singa say deen tan aro. (1 Corinto 14:33; 1 Juan 4:8) Pero, lapud ag-inunor nen Adan tan Eva so Dios, nankasalanan ira. Say resulta, atawir tayon amin ya ananak da so kasalanan tan patey. (Roma 5:12) Lapud atawir tayon kasalanan, walay tendensia tayon manisip na aliwa tan magmaliw ya maruksa.—Genesis 6:5; Marcos 7:​21, 22.

GOBIERNO NA TOO

Ag-itayo pinalsa na Dios ya uleyan so sarili tayo. Ibabaga na Biblia: “Agkanepegan na too ya igiya so dilin kupbang to.” (Jeremias 10:23) Kanian anggan panon lay pansasagpot na saray gobierno, agda naeka-ekal so guerra tan panlalaban.

SATANAS TAN SARAY DEMONYO TO

Ibabaga na Biblia ya “say interon mundo et walad pakayari na samay mauges.” (1 Juan 5:19) Siopa yan “mauges”? Si Satanas ya Diablo. Sikatoy marukruksan managpatey. (Juan 8:44) Agtayo nanengneng si Satanas tan saray demonyo to ta espiritu ra, pero susugsogan da ray totoo ya miguerra tan manlalaban.—Apocalipsis 12:​9, 12.