Kapigan Ginmapon Pinalsa na Dios so Uniberso?
Say ebat na Biblia
Anggapoy ibabaga na Biblia no kapigan ginmapo tan no panon kabayag so impamalsa na Dios ed uniberso. Oniay nabasa tayo: “Diad gapo et pinalsa na Dios so tawen tan say dalin.” (Genesis 1:1) Agbinitla ed Biblia no kapigan agawa so “gapo.” Balet, diad mantutumbokan ya agawa ya akarekord ed Genesis, nabasa itan antis na anemiran peryodo, odino “agew” na impamalsa.
Kasin say anemiran agew na impamalsa et literal ya 24 oras?
Andi. Diad Biblia, say salitan “agew” et nayarin ontukoy ed nanduruman karukey na panaon, depende ed konteksto na satan. Singa bilang, tinukoy ed sakey ya salaysay na Biblia so interon peryodo na impamalsa bilang sakey agew.—Genesis 2:4.
Antoy agawa legan na anemiran agew na impamalsa?
Say “anggapoy itsura tan agnapanayaman” ya planetan dalin et pinagmaliw na Dios ya planetan napanayaman. (Genesis 1:2) Insan pinalsa na Dios iray mabilay ya pinalsa ed dalin. Deneskribe ed Biblia so anemiran inkagawa legan na saray agew, odino panaon, na impamalsa:
Unonan Agew: Ginawa na Dios ya makasabi so liwawa ed dalin kanian niwala so agew tan labi.—Genesis 1:3-5.
Komaduan Agew: Ginawa na Dios so liwang, impanbiigan toy danum ed dalin tan danum ed tagey na liwang.—Genesis 1:6-8.
Komatlon Agew: Pinapaway na Dios so amagan dalin. Pinatubo to met iray nanduruman klase na tanaman.—Genesis 1:9-13.
Komapat ya Agew: Ginawa na Dios ya posible lan nanengneng so agew, bulan, tan saray bitewen manlapu ed dalin.—Genesis 1:14-19.
Komaliman Agew: Pinalsa na Dios iray mabilay a bengatla diad dayat tan saray ontitikyab a pinalsa.—Genesis 1:20-23.
Komanem ya Agew: Pinalsa na Dios iray ayayep ed dalin tan saray totoo.—Genesis 1:24-31.
Kayari na komanem ya agew, nampainawa so Dios ed impankimey to, odino tinmunda lan amalsa.—Genesis 2:1, 2.
Kasin say salaysay ed Genesis et kontra ed science?
Ipapanengneng na salaysay na Biblia nipaakar ed impamalsa ya aliwa itan ya detalyadon panag-aral nipaakar ed science. Imbes, deneskribe na Biblia so impamalsa diad paraan ya anggan saramay nambilay ed panaon na Biblia et mainomay dan natalosan so pantutumbokan na saray ebento. Agkokontraen na salaysay na Biblia iray impormasyon ya apruebaan la na science. Oniay insulat na sakey ya astrophysicist ya si Robert Jastrow: “Nanduruma so amin ya detalye, balet siansian walay importantin pamparehoan na saray salaysay na astronomy tan salaysay na Biblia; saray nantutumbokan ya ebento anggad nen apalsa so too et agawa ya bigbigla diad sakey ya peryodo na panaon.”
Kapigan pinalsa na Dios so agew, bulan, tan saray bitewen?
Say agew, bulan, tan saray bitewen et kaiba ed “tawen” ya pinalsa na Dios “diad gapo.” (Genesis 1:1) Balet, say liwawa na saratan et agmakakasabi ed dalin lapud makapal ya atmospera. (Genesis 1:2) Kanian anggaman wala lay liwawa nen unonan agew, agni nanengneng no iner so panlalapuan na satan ya liwawa. Diad komapat ya agew, ontatalos lay liwawa ed atmospera. Ibabaga na Biblia ya say agew, bulan, tan saray bitewen et ginmapo lan ‘sinminag ed dalin,’ mapatnag ya idedeskribe na Biblia no panon ya nanengneng iratan na sakey ya manoobserba diad dalin.—Genesis 1:17.
Base ed Biblia, panon lan kabayag so dalin?
Anggapoy ibabaga ed sikatayo na Biblia no panon lan kabayag so dalin. Basta nabasa tayo labat ed Genesis 1:1 ya say uniberso, kaiba lay planetan dalin, et walay gapoan to. Aliwa iyan kontra ed saray prinsipyo ed science tan ed papanisiaan na saray scientist nipaakar ed no panon lan kabayag so planetan dalin.