No Panon Mon Nalabanan so Pandemic Fatigue
Kasin nakekesawan ka la ed saray pananguman ya epekto na COVID-19? No on, agmo bukbukor. Pigaran bulan lan mana-adjust iray totoo ed interon mundo lapud pandemic. Dakel so “nansakripisyoy baleg pian napigilan so ikayat na COVID-19,” so imbaga nen Dr. Hans Kluge, World Health Organization Regional Director ed Europe. “Diad ontan iran situasyon, normal labat ya onkapuy so liknaan tayo tan ompan anggapo lay gana tayon gawaen so anggan anto, sinyales iratan na fatigue.”
No bilang ta walay pandemic fatigue mo, agka nadidismaya. Dakel so totoon natutulongan na Biblia ya nasarag iyan mairap ya situasyon. Tan natulongan ka met na satan.
Anto ran prinsipyo ed Biblia so makatulong ed sika ya nalabanan so pandemic fatigue?
Saray teksto ed Biblia ya ontulong ed sika pian nasarag mo so pandemic fatigue
Anto so pandemic fatigue?
Say pandemic fatigue et aliwan sakit. Imbes, aya so tawag ed nalilikna na totoo natan lapud inuman na pandemic so bilay da kanian ag-ira segurado ed nagawad arapen da. Nanduruma so epekto na pandemic fatigue ed kada too, pero nia ray kaslakan ya sinyales:
Anggapoy gana ya gawaen so anggan anto
Anguman so panangan tan kakaugip
Mainomay ya onsyodot
Mainomay ya na-stress ed saray trabaho ya dati met lan gagawaen
Nanairapan ya manpokus
Naeekalan la na pag-asa
Akin et seryoso so pandemic fatigue?
Delikado so epekto na pandemic fatigue ed sikatayo tan ed arum. No agtayo manasikaso, ompan agtayo naliklikas ya nangingirasan ti lan tumboken iray safety protocol parad COVID-19. Diad ilabas na panaon, ompan mankampante tayo la anggano tuloytuloy ni ikakayat na virus tan dakdakel ni ompapatey. Ompan labay tayo lan ompawil ed normal so kabibilay tayo lapud naksawan tayo lad saray restriksion, balet nayarin nipeligro so bilay tayo tan say bilay na arum.
Diad sarayan mairap ya situasyon, naprupruebaan na dakel ya tua iyan ibabaga na Biblia: “No onkapuy so liknaan mo diad agew na kairapan, say biskeg mo et onkulang.” (Proverbio 24:10) Wala ray prinsipyo ed Biblia ya makatulong ed sikatayo pian nasarag tayo ray makapakapuy ya situasyon, ya singa sayay pandemic.
Anto ran prinsipyo ed Biblia so makatulong ed sika ya labanan so pandemic fatigue?
Tumboken so physical distancing—pero mansiansian maapit ed kakaarom
No antoy ibabaga na Biblia: “Say tuan kaaro . . . et nailaloan diad panaon na gonigon.”—Proverbio 17:17.
No akin ya importante: Papabiskegen itayo na saray tuan kakaaro tayo. (1 Tesalonica 5:11) Pero no manbukbukor tayon lanang, ompan mansakit tayo laingen.—Proverbio 18:1.
Salien iya: Mansiansian maapit ed saray kakaarom panamegley na video chat, tawag, odino e-mail tan text message. Kontak mo ray kakaarom no aliwan marakep so agew mo, tan naynay mo ran kumustaen. Tepet mo no antoy gagawaen da pian nasarag day pandemic, tan ibagam met no antoy gagawaen mo. Manggawa kay paraan ya natulongan moy kaarom, tan seguradon manliket kayon dua.
Usar mo ed sankaabigan so panaon mo
No antoy ibabaga na Biblia: “Usar yod sankaabigan so panaon yo.”—Efeso 5:16.
No akin ya importante: No usaren mo ed sankaabigan so panaon mo, makatulong itan pian mansiansia kan positibo tan naiwasan moy manaburidon maong.—Lucas 12:25.
Salien iya: Imbes ya manpokus kad agmo la sarag ya gawaen, manisip ka na saray sarag mon gawaen natan. Singa bilang, wala la kasi panaon mo parad sakey ya proyekto odino sakey ya hobby? Sarag mo kasi mangiter na mas dakel ya panaon ed pamilyam?
Tumbok moy eskedyul mo
No antoy ibabaga na Biblia: “Amin a bengatla et nagawa komon. . . a mauksoy.”—1 Corinto 14:40.
No akin ya importante: Mas nalilikna na dakel so inkakontento tan liket no walay eskedyul ya tutumboken da.
Salien iya: Manggawa kay eskedyul ya base ed situasyon mo natan. Mangi-set kay oras parad school activity, pantrabaho, pankimey ed abung, tan oras pian pabiskegen so relasyon mo ed Dios. Ipilam met ed eskedyul mo iray aktibidad ya makatulong ed sika, singa say pan-bonding kaiba so pamilyam, panggalaw ed paway, tan pan-exercise. Regular mon rebyuen so eskedyul mo, tan i-update mo no kaukolan.
Man-adjust ed panguuman na tiempo na panaon
No antoy ibabaga na Biblia: “Say marunong et ompapaliis no nanenengneng toy peligro.”—Proverbio 22:3.
No akin ya importante: Iner man so panaayaman mo, lapud manguuman so tiempo na panaon, nayarin agka makasungap na malinis ya dagem tan nasinagan na agew, ya makatulong pian mansiansia kan healthy.
Salien iya: No manasingger lay panaon na ambetel, salim ya i-adjust so sala odino lugar ya pantratrabahoan mo ed abung yo pian nasinagan ka na agew. Iplano iray aktibidad ya sarag mon gawaen ed paway anggano ambetel so panaon. No posible, mansulong kay kawes ya parad ambetel pian mas makabayag ka ed paway.
No manasingger lay summer, kaslakan et walad paway iray totoo, kanian manalwar ka. Iplanom no iner so laen mo, tan manpili kay oras ya daiset lay too.
Itultuloy ya tumboken iray safety protocol na COVID-19
No antoy ibabaga na Biblia: “Samay makulangkulang et palpalaran tan sobray kompiyansa to.”—Proverbio 14:16.
No akin ya importante: Makapatey so COVID-19, tan ompan naalisan itayo no kampante tayo.
Salien iya: Regular ya i-check iray napantiwalaan ya guidelines tan amtaen no kasin natutumbok mo ni iraya. Isip mo no antoy epekto na saray gagawaen mo ed sarilim, pamilyam, tan ed arum.
Pabiskeg moy relasyon mo ed Dios
No antoy ibabaga na Biblia: “Onapit kayo ed Dios, tan sikatoy onapit ed sikayo.”—Santiago 4:8.
No akin ya importante: Natulongan ka na Dios ya nasarag so antokaman ya subok.—Isaias 41:13.
Salien iya: Manbasa na Biblia kada agew. Nayarim ya tumboken iyan eskedyul ed panagbasa na Biblia.
Sarag mon kontaken iray Tasi nen Jehova pian amtaen no panon kan makaatendi ed saray pantitipon da anggano walay COVID-19 pandemic. Singa bilang, diad interon mundo, manguusar ira na videoconferencing ed saray aral na kongregasyon, tinaon ya pannodnonot ed impatey nen Jesus, tan tinaon ya kombension.
Saray teksto ed Biblia ya ontulong ed sika pian nasarag mo so pandemic fatigue
Isaias 30:15: “Say biskeg yo et akadepende ed pansiansia yon kalmado tan pangipatnag yoy panagmatalek.”
Say labay ya ibaga: Say pantiwala ed bilin na Dios et ontulong ed sikatayon mansiansian kalmado diad saray mairap ya situasyon.
Proverbio 15:15: “Amin ya agew na samay maniirap et mauges, balet samay maligligsa so puso to et naynay a manpipiesta.”
Say labay ya ibaga: Say pampokus ed saray positibon bengatla et ontulong ed sikatayon manliket anggano mairap so situasyon.
Proverbio 14:15: “Say toon anggapoy amta to et manisia ed kada salita, balet samay makabat et dadalepdepen toy kada gawaen to.”
Say labay ya ibaga: Tumboken iray safety protocol, tan agbasta basta ibabaliwala iratan.
Isaias 33:24: “Anggapoy manaayam ditan a mangibagay: ‘Mansasakit ak.’”
Say labay ya ibaga: Insipan na Dios ya ekalen to so amin ya klase na sakit.