Angiter na Warning so Sakey ya Top Health Official ed Epekto na Social Media ed Saray Kabataan—Antoy Ibabaga na Biblia?

Nen Mayo 23, 2023, angiter na warning so sakey ya top health official diad United States tungkol ed mauges ya epekto na social media ed dakel ya kabataan.

• “Anggano wala met so nitutulong na social media ed arum ya ugugaw tan kabataan, dakdakel so ebidensya ya delikado so social media ed mental health tan kalusugan da.”—Social Media and Youth Mental Health: The U.S. Surgeon General’s Advisory, 2023.

Kaiba ed satan ya warning iray research ya mangipaliwawa no akin ya ontan so in-report da.

• Saray kabataan ya mantaon na 12 anggad 15 “ya masulok ya taloran oras ya manguusar na social media kada agew et doble so tsansa ra ya mansakit ed isip, kaiba la ray sintomas na depresyon tan panaburido.”

• Diad saray mantaon na 14 “ya dakel so oras da ed social media, maslak et ag-ira makaugip, nabu-bully ra ed online, napapaulyanan day laman da, anggapoy tiwala rad sarili da, tan nadi-depress ira. Ontan so resulta ed dakel ya bibii kompara ed saray lalaki.”

Antoy gawaen na saray atateng pian ag-itan nagawa ed saray ananak da? Wala ray praktikal ya bilin na Biblia.

No antoy nagawaan na atateng

Subaybayan yoy anak yo. Bilang ateng, isip yon maong iray resulta tan mandesisyon kayo no kasin payagan yon mangusar na social media so anak yo.

• Prinsipyo ed Biblia: “Ipasal moy ugaw ed dalan a nepeg ton laen.”—Proverbio 22:6.

• Pian naaruman so antam, basaen so artikulo ya “Duga Labat Kasi ya Mangusar na Social Media so Anak Ko?”

No abuloyan yon mangusar na social media so anak yo, alerto kayo komon ed saray posiblin peligro tan subaybayan yoy gagawaen tan nenengnengen na anak yo ed online. Panon yon gawaen itan?

Protektaan yoy anak yo ed saray mauges ya nanengneng tod online. Ipasal yoy anak yo pian nibiig tan naiwasan to iray mauges ya nanengneng to ed online.

• Prinsipyo ed Biblia: “Komon ta say seksual ya imoralidad tan amin a klase na karutakan odino inkaagum et ag-anggan nabitla ed limog yo, . . . anggan say makapabaing a kagagawa odino andi-kakanaan a pantotongtong odino mabanday a panaglurey.”—Efeso 5:3, 4.

• Parad saray praktikal a suhestion, basaen so artikulo ya “Ibangat so Tinedyer ya Anak Mo No Panon so Dugan Pangusar na Social Media.”

Limitaan yoy pangusar na anak yo ed social media. Manggawa kayoy eskedyul no kapigan tan no panon kabayag so pangusar to ed social media.

• Prinsipyo ed Biblia: “Manalwar kayon maong a say kagagawa yo et . . . singa saray marunong a totoo, ya usar yod sankaabigan so panaon yo.”—Efeso 5:15, 16.

• Usaren so whiteboard animation ya Magmaliw ya Matalino ed Pangusar na Social Network pian natalosan na ananak yo no akin ya kailangan dan limitaan so pangusar da ed social media.