Akin et Manbubusolan Iray Totoo?—Antoy Kuan na Biblia?

Puro busolan, krimen, tan guerra so kargay balita.

“Ondadakel so makapuy ya comment ed social media lapud samay guerra ed Israel tan Gaza. Wala met iray totoon labalabay day mangigapoy gulo katon nanaaruman iray aliwliwan comment diad social media.”—The New York Times, Nobyembre 15, 2023.
“Manlapu la nen Oktubre 7, dakel so akaimano ya mas linmoor so busolan tan krimen ed mundo. Mandederalan iray totoo tan walay lalabien da.”—Dennis Francis, presidente na United Nations General Assembly, Nobyembre 3, 2023.

Nensaman la ’tay busolan, krimen, tan guerra. Diad tuay tua, binitla na Biblia ya wala ray totoo nensaman ya ansakit so panagsalita da. Tan wala met iramay labalabay day misebeg tan miguerra. (Salmo 64:3; 120:7; 140:1) Ayay nanenengneng tayon busolan natan ey, wala kasi labay ton ibaga ’ya? Base ed Biblia, on wala!

Akin et anggad natan et wala nin siansiay manbubusolan?

Niay duaran rason ya nabasad Biblia:

1. ‘Ombebetel so aroan na karaklan a totoo’ diad panaon tayo. (Mateo 24:12) Lapud makapuy ya ugali da, naiirapan ira laingen ya manaroan.—2 Timoteo 3:1-5.
2. Iimpluensyaan nen Satanas iray totoo. Susugsogan to ran manbusolan. Kanian agti la pankelawan ya imbaga na Biblia ya “say interon mundo et walad pakayari na samay mauges” ya si Satanas.—1 Juan 5:19; Apocalipsis 12:9, 12.

Balet agtayo nanaekalay pag-asa. Ta say kuan na Biblia, onsabi panaon, ekalen na Dios so busolan tan say amin ya makapuy ya epekto to ’tan. Oniay kuan na Biblia:

‘Punasen na Dios so amin a lua ed kamataan da, tan anggapo lay patey, anggapo met lay panermen tan panakis tan panotot. Saray datin bengatla et linmabas la.’—Apocalipsis 21:4.