Kasin Manpupulong Iray Tasi nen Jehova Pian Nilaban Ira?

Andi. Regular kamin manpupulong ed kaabungan, balet agmi iisipen ya nilaban kami lapud satan ya gagawaen mi. (Efeso 2:8) Akin ey?

Isipen pa iyan alimbawa: Imadyin mon walay toon makasi ya impromisa ton mangiter na mablin regalo ed amin ya onlad sakey ya pasen diad imbaga ton petsa. No talagan panisiaan moy promisa to, tumboken mo kasi iray instruksion to? Segurado! Ompan ibagam ni ingen ed saray kakaarom tan kapamilyam pian minabang met ira. Balet, naalam so regalo aliwan lapud tinumbok mo ray instruksion to, noagta lapud labay to may too ya iter itan ed sika.

Ontan met, manisia iray Tasi nen Jehova ed promisa na Dios a bilay ya andi-anggaan parad amin ya ontulok ed sikato. (Roma 6:23) Gagawaen mi anggaay nayarian min ibagad arum iray papanisiaan mi pian minabang irad saray promisa na Dios. Balet, agmi iisipen ya nilaban kami lapud pampupulong mi. (Roma 1:17; 3:28) Diad tua, anggapoy nagawaan na too pian magmaliw a makanepegan ed ontan a makapakelkelaw a bendisyon manlapud Dios. “Nilaban itayo, aliwan lapud saray ginagawa tayon kamaungan, no ag ingen lapud panangasi to.”​—Tito 3:5, Maung a Balita.