Akin et Agmankri-Krismas Iray Tasi nen Jehova?
Iisipen na arum
Aliwan tua: Saray Tasi nen Jehova et agmanisia ed si Jesus kanian ag-ira mankri-Krismas.
Say tua: Kristiano kami. Manisia kami ya nilaban itayo panamegley labat nen Jesu-Kristo.—Gawa 4:12.
Aliwan tua: Dederalen yoy ulopan na sankapamilya ta babawalan yon man-Krismas iray membro yo.
Say tua: Importantin maong ed sikami so pamilya, tan uusaren mi so Biblia pian natulongan ya onelet so pamilya.
Aliwan tua: Agyo nalilikna so “kabaliksan na Krismas”—paniiteran, kareenan ed dalin, tan panggaway maong ed kaparan too.
Say tua: Gagawaen mi anggaay nayarian min magmaliw ya maiter tan mareen. (Uliran 11:25; Roma 12:18) Alimbawa, diad saray aral tan pampupulong mi, uunoren mi iyan instruksion nen Jesus: “Inawat yon anggapoy bayar, iter yon anggapoy bayar.
” (Mateo 10:8) Ontan met, ibabangat mi ya say Panarian na Dios labat so makapangiter na tuan kareenan ed dalin.—Mateo 10:7.
Akin et agmankri-Krismas iray Tasi nen Jehova?
Ingganggan nen Jesus ya nodnonoten tayoy impatey to, aliwan say inkianak to.—Lucas 22:19, 20.
Agnan-Krismas iray apostol tan inmuunan disipulo nen Jesus. Ibabaga na New Catholic Encyclopedia ya “
say unonan impanselebra na inkianak nen Jesus et nen manga 243 [C.E.],
” a diad saman et masulok ya 100 taon lan inatey iray apostol.Anggapoy ebidensya ya inyanak si Jesus nen Disyembre 25; ag-akasulat ed Biblia so petsa na inkianak to.
Manisia kami ya aglabay na Dios so Krismas ta nanlapu itan ed saray paganon tradisyon tan ritual.—2 Corinto 6:17.
Akin no mialig ki lad arum a?
Dakel so mankri-Krismas anggano amta ran nanlapu itan ed saray pagano tan agmet ibabangat na Biblia. Ompan nitepet da: Talaga kasin importante ya agman-Krismas iray Kristiano, anggano singa ompaway a duma ra?
Ibabaga na Biblia ya nepeg tayoy mannonot tan usaren so ‘pakayari tayon mankatunongan.
’ (Roma 12:1, 2) Ibabangat na Biblia ya nepeg tayon pablien so katuaan. (Juan 4:23, 24) Kanian anggano labay mi komon ya balibali impresyon na totoo ed sikami, uunoren mi ray prinsipyo na Biblia anggan balawen kami na arum.
Agkami mankri-Krismas balet rerespetoen mi karapatan na arum ya mandesisyon parad sarili da. Tan agmi pipigilan so arum ya manselebray Krismas.