No Panon ya Linmiket Lamet so Pamilyan Dinmalan ed Trahedya

Nen inyanak nen Kaye so anak min si Lauren, agko ni amta no panon ak ya magmaliw ya maong ya ama. Nen pinmaway so komaduan anak mi ya si Michael, agak ni nan-improve. Nen ugaw ak, lanang ya mankokolkol si nanay tan tatay ko, ya anggad nandiborsyo ira. Kanian anggano labay koy magmaliw ya maong ya ulo na pamilya, agko amta balet no panon.

Say sakey nin rason, nen tinedyer ak ni, naadik ak ed alak tan druga. Tan nen adulto ak la, anggapoy direksion na bilay ko. Naadik ak met ed panagsugal kanian dakdakel so aliwan desisyon ko. Nairapan lan maong si Kaye ed siak kanian tinaynan to ak tan inawit toy duaran anak mi. Ansakisakit ko man ya agawa.

Tinepetan koy Kaye no antoy kaukolan kon gawaen pian ompawil ed siak. Diad saman et iyaaralan lay Biblia nen Gloria, sakey ed saray Tasi nen Jehova, kanian simpli labat so labay to, kuan to: “Manaral kay Biblia.” Agko amta no antoy labay ton ibaga man, pero pian napapawil koy Kaye, pinmayag ak ya iyaralan ak na Biblia nen Gloria tan say asawa ton si Bill.

Nauman so Bilay Ko Lapud Impantongtong Mi

Nen linmad abung mi si Bill tan Gloria, pandinayewan koy maap-apit ya ulopan dan sanasawa. Naamtaan ko ya wala ray ananak dan kaedaran ko ya dugay panguusar dad bilay da. Diad saman ko labat naisip ya ompan makatulong so Biblia pian magmaliw ya maliket so pamilya mi.

Diad saman, nantongtongan mi nen Bill tan Gloria iray problemak. Impanengneng dad siak so ibabaga na Biblia diad Galacia 6:7 ya kuan to: “Antokaman so itatanem na sakey a too, saya met so anien to.” Naisip ko, ‘no atan komon ya prinsipyo so inunor ko manlapu la nen saman, naiwasan ko komoy dakdakel ya problema!’

Diad inlabas na panaon, dinmakep ya maong so bilay ko lapud inyaplikak iray prinsipyo na Biblia. Intunda mi la nen Kaye so panagsigarilyo tan atulongan ak met ya itunda so arum nin bisyok. Nen 1985, niyanak so komatlon anak mi—laki, say ngaran to David, ya pinalayawan mi na Davey—sa wakas, natan aliknak ya amtak lay magmaliw ya maong ya ama.

Saniiba Kami ed Panaglingkor ed si Jehova

Bilang atateng, naaralan mi nen Kaye ya legan min babangatan iray ananak mi ya aroen si Jehova, sikamin mismo et onaapit met ed Sikato. Dakdakel so naaralan mi ed saray publikasyon ya singa say Manaral Manlapud Sankamaongan a Managbangat. Ontan met, maong ya alimbawa ed sikami tan saray ananak mi iray pamilya ed kongregasyon mi.

Asabi panaon ya payunir lan amin so ananak mi. Diad kagapoy 2004, walad Spanish congregation si Lauren. Si Michael, kakkapaway to labat ed Bethel ta nankasal, tan paonla la ra nen asawa to ya si Diana ed Guam pian ontulong ed panagpulong diman. Si Davey, ya mantaon na 19, et kakkagapo toy manlingkor ed Dominican Republic.

Proud kami nen Kaye ed desisyon na ananak mi. Singa sikami mangibabaga ed samay nabasad 3 Juan 4: “Anggapo lay mas panliliketan ko nen say saya: a narengel kon manaakar ed katuaan iray ananak ko.” Balet agmi inilaloan ya manguman ya maong so bilay mi kayari na sakey a tawag.

Agaylan Makapaermen ya Trahedya

Nen Abril 24, 2004 angan kami nen Kaye ed sakey ya restawran ya kaiba mi duara nin sanasawa. Masulok ya 100 kilometro so kaarawi na restawran kanian naniiba kami lan anem ed luganan ko. Kayari min angan, sinmamar kami nid sakey ya café parad dessert. Inyepas ko ra insan ak nananap na parking. Nan-ring so cell phone ko. Tinmawag so kaarok, tan aburidon maong so boses to.

“Walay aliwliwan agawa,” kuan to. “Naaksidente si Davey.”

“Panon ka-grabe ey?” so tepet ko, pero natatakot ak ed iyebat to.

Nen unaan et agto nibaga. Insan to lanlamang imbagad siak ya inatey si Davey.

Kayari min nantongtong, nampikasi ak ed si Aman Jehova ya ikdan to ak na biskeg. Insan ak linmoob ed café tan imbagak ed saray kakaibak ya aliwliway liknaan ko tan mas maong no onsempet kami la. Agko ni labay ya ibagad si Kaye so agawad si Davey anggad makasabi kamid abung mi tan bukbukor mi lan dua.

Agaylay irap to man ya sakey tan kapalduan oras ya impan-drive ko. Narerengel koy Kaye ya iistoryaen ton eksayted la ed asingger lan ibisita nen Davey. Agni amta nen Kaye ya inatey so anak mi, tan legan to man, dakdakel lay onsasabin text message na piaambegya ed cell phone ko.

Kayari min inyakar iramay duaran sanasawa, sinmempet kami met la. Ninengneng to ak nen Kaye tan amta to la ya walay aliwdiwan agawa. “Antoy agawa?” kuan to. Amtak ya say onsublay ya ibagak et deralen toy bilay nen Kaye, no panon ya aderal so bilay ko kayari na tawag ed cell phone, duay oras antis to man.

No Panon Min Inarap so Impakaandi na Anak Mi

Wala la ray mairap ya dinalan mi nen Kaye, tan amta mi ya aasikasoen nen Jehova iray totoo to. (Isaias 41:10, 13) Balet nikaduman maong iyan subok. Agko naiwasan ya isipen, ‘Akin et agawa yad si Davey anta dakdakel so ginawa to parad si Jehova? Akin et agprinotektaan nen Jehova?’

Abigla met ya maong so duara nin anak mi. Singa komaduan ina nen Davey si Lauren, kanian ansakisakit ed sikato so impatey nen Davey. Agaylay ermen met nen Michael. Anggano manga limay taon la ya agmi kaibad abung si Michael, naliliketan ed imbaleg na ading to tan inyaligwas tod espiritual.

Tinulongan kamin tampol na saray kakongregasyon mi. Singa bilang, legan ya agnin talaga naawat nen Kaye so impatey na anak mi, mansasbi ed abung mi iray kakongregasyon mi pian manligliwa tan ontulong ed sikami. (Proverbio 17:17) Agkon balot nalingwanan so panangaro da!

Pian nasarag mi nen Kaye so graben ermen mi, agmi intunda so regular ya panagpikasi, panag-aral na Biblia, tan iyaatendi mi ed Kristianon pantitipon. Agnakal so ansakit ya nalilikna mi. Balet amta mi ya importantin itultuloy min gawaen iraya pian mansiansian mabiskeg so pananisia mi.—Filipos 3:16.

Insan diad saman, pinmawil si Michael tan Diana pian mas asingger irad sikami, tan si Lauren et pinmawil ed kongregasyon mi ya English. Lapud lanang kamin saniiba ed sinmublay iran taon, akatulong iman pian sandaraiset ya onabig so sugat na puso mi. Insan nen nankasal si Lauren, baleg met ya tulong ed pamilya mi so asawa to ya si Justin.

Mair-irap ya Biahe

Ag-abayag kayari impatey nen Davey, wala ni sakey ya mair-irap ya ginawa mi pian nasarag mi ermen mi—pero baleg ya tulong iman. Si Kaye so mangistorya.

“Nen imbaga nen asawak ya inatey si Davey, singa ak inakmon na dalin tan abaybayag ya onmay pakaliknak. Lapud graben ermen ko, agko la nagawaan iray datin normal ya gagawaen ko ed inagew-agew. Lanang ak ya onaakis. Diad tua, no maminsan makakapasnok ak ed si Jehova tan ed amin ya mabilay. Talagan singa aliwa lay panagnonot ko.

“Labay koy onlad Dominican Republic. Labay koy onlad pasen ya nanayaman tan nanlingkoran nen Davey ed si Jehova diad sampot iran agew na bilay to. Balet makapuy ni emosyon ko tan singa agko nasarag so andukey ya biahe.

“Atulongan ak na kaarok nen imbaga tod siak ya maneermen met iray kakaaro nen Davey diad Dominican Republic tan kaukolan dan nakabat so pamilya nen Davey. Lapud suporta to, asarag koy onlugan ed eroplano.

“Baleg ya tulong iman ya impanbiahe na pamilya mi. Mas lalo min apruebaan ya maespiritual ya too si Davey. Imbaga to may saksakey ya elder ed kongregasyon ya nanlingkoran nen Davey ya talagan napantiwalaan toy Davey ta gawaen ton gawaen iray asainmin ya inter ed sikato.

“Legan min manaakar ed lugar ya nanayaman nen Davey, wala ray totoon onaabet ed sikami tan ibabaga da ray maong ya ginawa to parad sikara. Amtak la ya maomaong ya too si Davey, balet lapud saray arengel mi, mas lalok ya atalosan no panon ya maap-apit ya inalig na anako so alimbawa nen Jesus.

“Akabat mi met so sakey ed saray inyaralan nen Davey na Biblia—sakey ya lakin akarukol labat ed dukolan to diad melmelag ya abung to. Mair-irap so bilay to man ya laki, balet imbaga na saray ka-kongregasyon nen Davey ya inikdan toy dignidad tan marespetoy impantrato to ed saman ya laki. Kanian proud kamin maong ed sikato!

“Aman lay sankairapan ya impanbiahek. Pero akatulong ed pamilya mi ya nakaiba iramay kaparehas min maneermen met ed impakaandi nen Davey tan mantatalaran met ed kioli to ed arapen. Singa abawasay sakit ya nalilikna mi legan min wadman.”

Apaseseg ed Alimbawa nen Davey

Diad samay Enero 8, 2005 ya isyu na Awake! walay artikulon nipaakar ed impatey nen Davey tan say impanlingkor to ed Dominican Republic. Diad saman, agnaisip na pamilya mi ya baleg manayay nitulong na artikulo ed saray makabasa. Singa bilang nen Mayo 2019 walay brother ya say ngaran to et Nick ya kinmontak ed sikami tan oniay imbaga to:

“Diad bandad sampot na 2004, manaaral ak ni ed college tan anggapo ray spiritual goal ko. Agak maliket. Nampikasi ak ed si Aman Jehova tan kinerew kon tulongan to ak ya nausar ko komon diad sankaabigan ya paraan iray taon legan ya kabataan ak ni. Ag-abayag kayari to man, abasak so istorya nen Davey diad Awake! Aman so ebat ed pikakasik!

“Intundak so panaaral kod college tan nampayunir ak la. Ginawak met ya goal so manaral na Spanish tan man-volunteer ed arum ya bansa. Sinmabi panaon ya akapanlingkor ak ed Nicaragua tan akapanaral ak met ed School for Kingdom Evangelizers kaibay asawak. No tetepetan ak na totoo no antoy amakiwas ed siak ya manpayunir, iistoryaen kod sikaray eksperiensya nen Davey.”

Asurprisa kami met nen akabat mi sakey ya sister ya say ngaran to et Abi, parehas ya hotel so tinuloyan mi nen nagmaliw kamin delegate nen 2019 International Convention diad Buenos Aires, Argentina. Agustoan mi Abi ta mabaibait tan maar-aro. Parehas kami nen Kaye ya anonotan mi ed sikato si Davey.

Kapawil mid kuarto mi diad hotel, pinawitan mi Abi na link ed samay artikulo ed Awake! nipaakar ed si Davey. Kayari pigaran minuto, nan-reply. Labay to kami kunon nakatongtong lan tampol kanian nannengneng kami diad lobby. Onaakis si Abi legan ton iistoryaen ya amay eksperiensya nen Davey so amakiwas ed sikaton manpayunir nen Setyembre 2011 tan man-volunteer ed arawdawin teritorya. Kuanto, “Kada no walay problema ed asainmin ko, babasaen ko lamet so artikulo.” Wala ni ingen so awit ton kopya!

Lapud ontan iran eksperiensya, sankalikna mi ya kaiba kami ed sankamundoan ya pamilya. Anggapo lay mas nankakasakey nen saray totoo nen Jehova!

Naliligliwa kami nen Kaye no iisipen mi ray balibalin epekto na alimbawa nen Davey ed arum. Tan dakel ni ray pinabli tayon kabataan ya uusaren da met so bilay da ed panlilingkor ed si Jehova. Nayarin agda naiimano, pero walay epekto da ed bilay na saramay makakaobserba ed seseg da, tan lapud alimbawa ra et napapakiwas day arum ya panlingkoran met si Jehova ed sankaabigan da.

“Parad Sikato et Mabilay Iran Amin”

Diad Lucas 20:37, inulit nen Jesus imay imbaga nen Jehova nen tinawag Toy sarili to ya “say Dios nen Abraham tan Dios nen Isaac tan Dios nen Jacob.” Ag-imbaga nen Jehova ya sikatoy Dios da legan ya mabilay ira labat, noagta sikato nin siansia so Dios da! Akin ey? Imbaga nen Jesus diad bersikulo 38: “Parad sikato et mabilay iran amin.”

On, diad pakanengneng nen Jehova, amin ya matoor ya lingkor to et mabilay; nanengneng tayod satan ya talagan labalabay to ran bilayen lamet! (Job 14:15; Juan 5:28, 29) Kombinsido ak ya ontan so nalilikna nen Jehova ed si Davey, tan ed arum nin lingkor To ya naugip lad patey.

Labalabay ko lan nanengneng lamet si Davey, pero wala ni mas labalabay kon nagawa—amay nanengneng koy Kaye ya kaiba to lamet si Davey. Anggapo ni anengneng kon too ya ontan lan kagrabe so sakit ya alikna to. Espisyal so kabaliksan tod siak may nabasad Lucas 7:15: “Samay lakin inatey et yinmurong tan ginmapon nansalita, tan sikatoy inter nen Jesus ed ina to.”

Nen Setyembre 2005, nampayunir ak met la ya kaiba nen Kaye. Baleg ya pribilehyoy makapanpayunir ya kaibay asawak, saray ananak mi, tan saray kaasawaan da. Bilang nankasakey ya pamilya, susuportaan mi sakey tan sakey tan akapokus kami ed ilalo ya walay balon mundo diad arapen, tan nakaiba mi lamet so inar-aro min si Davey.