2. Kasin Sikatayo so Natetel ed Paniirap Tayo?

No Akin ya Importantin Naebatan Itan

No say ebat et on, ompan sarag tayon kontrolen so paniirap tayo.

Isipen pa

Akin ya nibaga tayon saray totoo lanlamang so natetel ed sarayan paniirap?

• 

  Panangabuso.

  Base ed tantiya na World Health Organization (WHO), sakey ed apatiran adulto so naabuso nen ugaw ni tan sakey ed taloran bibii so akaeksperiensya na pisikal odino seksual ya panangabuso (odino atan ya dua).

• 

  Ipatey na Inad-aro.

  Oniay imbaga na World Health Statistics 2018 ya im-publish na WHO: “Say tantiya et 477,000 so pinatey ed interon mundo nen 2016.” Ontan met, manga 180,000 ya totoon ipapasen ya inatey ed guerra tan panlalaban ed satan ya taon.

• 

  Sakit.

  Diad sakey ya artikulon im-publish ed magasin ya National Geographic, oniay imbaga na writer ya si Fran Smith: “Masulok ya sakey bilyon a totoo so mansisigarilyo, tan satan so sakey ed saray limaran manuna ya sengegan na ipapatey: sakit ed puso, stroke, impeksion ed bala, chronic obstructive pulmonary disease, tan kanser ed bala.”

• 

  Aliwan Patas ya Kipapasen ed Bilay.

  Oniay imbaga na sakey ya psychologist ya si Jay Watts: “Say kairapay panagbilay, aliwan patas ya panagtrato lapud kipapasen ed bilay, diskriminasyon, abeban pakanengneng ed saray bibii, puersaan ya panayam ed arum ya lugar, tan say panisip ya mas maong so sakey ya kultura nen say arum et mamapaloor ed graben panirap na nonot.”

  MANARAL NI

  Bantayan so video ya Akin ya Ginawa na Dios so Dalin? diad jw.org/pag.

No Antoy Ibabaga na Biblia

Dakel ed saray paniirap ed mundo natan et lapud totoo.

Maslak ed saratan et lapud saray maruksan gobierno ya mamapairap ed saray mismon totoo ya ibabaga ran panseserbian da.

“Say too et uuleyan toy kapara ton too diad pankaugsan to.”​—ECLESIASTES 8:9.

Nayarin nabawasan so paniirap.

Makatulong iray prinsipyo ed Biblia pian nawalaan tayo na maabig ya kondisyon na laman tan mareen ya ulopan.

“Say kalmadon puso et mangiiter na bilay ed laman, balet say imon et pakabulokan na saray pukel.”​—PROVERBIO 14:30.

“Ekal yod inkasikayo so amin a klase na paneem-em na sakit na linawa, pasnok, sanok, paneyag, tan makapasakit a salita, pati say amin a bengatlan makaderal.”​—EFESO 4:31.