Sarag Mon Naamtaan so Karunongan na Dios
“Say interon Kasulatan et impuyan na Dios.” (2 Timoteo 3:16) Diad sayan bersikulo, say labay ya ibaga na “impuyan” et inyan na Makapanyarin-amin ya Dios iray kanonotan to diad isip na saray nansulat na Biblia.
Labay na Dios ya Minabang Ka ed Karunongan To
“Siak si Jehova . . . say mangibabangat ed sika pian nagunggonaan ka, say mangiwawanwan ed sika diad dalan a nepeg mon panakaran. No dengelen mo labat komon iray ganggan ko! Diad ontan, say kareenan mo et magmaliw a singa ilog tan say inkatunong mo et singa saray daluyon na dayat.”—ISAIAS 48:17, 18.
Ipasen mo ya saratan a salita et personal ya imbitasyon ed sika na Dios. Labay to ya nawalaan kay deen na nonot tan liknaan, tan manliket ka ya anggapoy anggaan. Natulongan to ka ya naalmo iratan.
Labay na Dios ya Naamtaan Moy Karunongan To
“Kaukolan a nipulong nin unona so maong a balita diad amin a nasyon.”—MARCOS 13:10.
Kaibad satan ya “maong a balita” so promisa nen Jehova ya panganggaen to so kairapan, pagmaliwen ton paraiso so dalin, tan bilayen to iray inatey ya inad-aro tayo. Satan ya nibased Biblia ya mensahe et ipupulong na Saray Tasi nen Jehova diad interon mundo.