Angipaalagey Ira na Baleg a Tore

LINMABAS so dakel a taon, awalaan na dakel ya apo si Noe. Kanian ag-abayag, dinmakel so totoo ed dalin.

Sakey ed sikara so apo ed pueg nen Noe a si Nimrod. Sikatoy mauges a too, ya mangeerel tan mamapatey ed saray ayayep tan totoo. Ginawa to met so sarili to ya ari. Aglabay na Dios si Nimrod.

Diad saman et saksakey labat so uusaren na totoo ya salita. Labay nen Nimrod ya manuulop ira pian uleyan to ra. Kanian antam no antoy ginawa to? Imbaga tod totoo ya manpaalagey ira na syudad ya walay baleg a tore. Nengneng moy gagawaen da diad litrato.

Ag-iya agustoan nen Jehova. Labay ton manayam ed interon dalin iray totoo. Balet imbaga na totoo: ‘Gali! Mangipaalagey tayoy syudad tayo, tan sakey a tore ya say toktok to et makasabi ed katawenan pian nakabkabat da tayo!’ Say labay da, sikaray nadayew, aliwan say Dios.

Kanian, pinatunda na Dios so pampapaalagey da na tore. Antam no antoy ginawa to? Bigla ton pinandurumay salita ra, tan agla ra akapantatalosan. Kanian say syudad da et tinawag ya Babel odino Babilonia, ya say labay ton ibaga et “Impakagulo.”

Lapud saya, tinaynan na totoo so Babel. Saray totoon pareparehoy salita ra et naniiban nanayam ed arum a parte na dalin.