Inmalis so Pamilya ed Ehipto

AGLA napokpokan nen Jose so liknaan to. Pinapaway ton amin so ariripen to. Nen saray agagi to labat so atilak, inmakis si Jose. Seguradon abigla iray agagi to ta agda amta no akin ya onaakis. Insan to imbaga: ‘Siak si Jose. Mabilay ni tatay ko?’

Lapud abigbigla ra, ag-ira akasel. Natatakot ira. Balet imbaga nen Jose: ‘Asingger kayo pa.’ Nen sinmingger ira, imbaga tod sikara: ‘Siak si agi yon Jose ya inlako yod Ehipto.’

Maar-aron intuloy ya imbaga nen Jose: ‘Agyo teteteley sarili yo lapud inlako yo ak. Say Dios so angibakid siak ed Ehipto pian niliktar so bilay na totoo. Ginawa ak nen Faraon ya sankatageyan ya opisyal. Kanian pawil kayon tampol ed si tatay ko tan ibaga yod sikato iya. Ibaga yo met ed sikaton dia la manayam.’

Insan nilalakap tan inaangoban nen Jose so amin ya agagi to. Sanen naamtaan nen Faraon ya sinmabi iray agagi nen Jose, imbaga tod si Jose: ‘Pangusar mo ra na karwahe pian walay naluganan nen tatay mo tan saray pamilya ra ya paonlad dia. Iter kod sikara so sankamaongan ya dalin ed Ehipto.’

Tan ontan so ginawa ra. Diad litrato et inabet nen Jose si tatay to kasabi rad Ehipto kaibay interon pamilya ra.

Binmaleg so pamilya nen Jacob. 70 ira ya amin sanen sinmabi rad Ehipto, kaiba lay Jacob, saray anak tan apo to. Balet kaiba met iray kaasawaan tan dakel ya aripen. Nanayam iran amin ed Ehipto. Tinawag iran Israelita, ta sinalatan na Dios so ngaran nen Jacob na Israel. Saray Israelita et nagmaliw ya espisyal a totoo na Dios, ya singa aralen tayo nid saray ontumbok.