Imbaliw ed Ambalangan Dayat

NENGNENG mo no antoy nagagawa! Si Moises ‘tay mangitatagey ed baston to diad Ambalangan Dayat. Saratay kaiba ton akaliktar et saray Israelita. Balet si Faraon tan amin ya sundalo to et nalgep ed dayat. Nengnengen tayo no akin.

Singa naaralan tayo la, ingganggan nen Faraon iray Israelita ya taynan da so Ehipto kayari na koma-10 ya salot. Manga 600,000 ya Israelitan lalaki so inmalis, likud ed saray dakel ya bibii tan ugugaw. Akila met ed sikara iray dakel ya aliwan Israelita a nagmaliw ya managdayew nen Jehova. Inawit dan amin iray karnero, kanding, tan baka ra.

Antis ya sinmipot iray Israelita, kinmerew irad saray Ehipsio na kawekawes, saray kagawaan a balitok tan pilak. Lapud takot na saray Ehipsio ed samay sampot ya salot, inter dan amin so kerew na saray Israelita.

Kayari pigaran agew, akasabi iray Israelita ed Ambalangan Dayat. Diman ira nampainawa. Legan na satan, ababawian si Faraon tan saray totoo to ta imbulos da iray Israelita. ‘Pinaulyan tayon inmalis iray ariripen tayo!’ so kuan da.

Kanian anguman lamet so nonot nen Faraon. Impaiparaan toy 600 a pinili iran karwahe, tan arum nin karwahe parad guerra.

Sanen anengneng na saray Israelita ya nitan lay Faraon tan saray sundalo to, ataktakot iran maong. Anggapo lay nabatikan da. Balet angiyan si Jehova na lurem ed baetan na saray totoo to tan na saray Ehipsio. Kanian agnanengneng na saray Ehipsio iray atakien dan Israelita.

Imbaga natan nen Jehova ed si Moises ya itagey toy baston to ed Ambalangan Dayat. Nen ginawa to iya, pinasiplog nen Jehova so maksil a dagem manlapud bukig. Apaldua so danum na dayat, tan singa walay duaran padir na danum ed biek tan biek.

Kayari to et pigaran oras ya binmaliw iray minilyon a totoo kaiba iray ayayep da. Anengneng lan siansia na saray Ehipsio iray Israelita. Makakatakas la ray aripen da! Kanian tampol da ran tinumbok ya anggad pegley na dayat.

Nen onuusil ira, inekal na Dios iray dalig na karwahe da. Ataktakot iray Ehipsio tan inyeyag da: ‘Si Jehova so milalaban parad sikara. Taynan ti’ la!’ Balet atrasado la.

Insan inkuan nen Jehova ed si Moises ya itagey toy baston to ed Ambalangan Dayat, ya singa nanenengneng mod litrato. Nen ginawa iya nen Moises, pinmawil so danum tan tinabunan to ray Ehipsio tan saray karwahe ra. Amin ya militar et tinmumbok ed saray Israelita diad dayat. Kanian anggapoy anggan sakey ya akaliktar ed sikara!

Malikeliket iray totoo na Dios ta akaliktar iran amin! Angansion iray lalaki bilang pisasalamat ed si Jehova: ‘Analo si Jehova. Imbasileng tod dayat iray kabayo tan saramay akakabayo.’ Insan si Miriam ya agi nen Moises et angalay tamborin, tan sikatoy tinumbok na amin a bibii ya awit day tamborin. Legan iran onsasayaw et ikakansion da met: ‘Analo si Jehova. Imbasileng tod dayat iray kabayo tan saramay akakabayo.’