Mauges ya Ari ed Ehipto

PIPILITEN na sarayan lalaki ya mantrabaho iray totoo. Nengneng mo may sakey ya lakin manisiplat ed trabahador! Sarayay matratrabaho et Israelita, say pamilya nen Jacob. Tan say mamipilit ed sikaran mantrabaho et saray Ehipsio. Nagmaliw ya aripen na saray Ehipsio iray Israelita. Akin et onyay agawa?

Diad loob na dakel a taon, say pamilya nen Jacob et mareen ya nambilay ed Ehipto. Sikaray inasikaso nen Jose, say onkokomaduad Faraon ya ari na Ehipto. Balet inatey lay Jose. Tan kabusol na balon ari na Ehipto iray Israelita.

Kanian ginawan aripen na sayan mauges ya Faraon iray Israelita. Tan impuesto ton manbantay ed sikara iray lalakin maruksa tan mauges. Pinilit da ray Israelita ya mantrabaho na ambelat pian ipaalagey iray syudad nen Faraon. Balet siansia nin dinmakel iray Israelita. Kanian tinmakot iray Ehipsio ta ompan ondakel iran maong tan magmaliw iran mabisbiskeg.

Antam no antoy ginawa nen Faraon? Kinatongtong to ray manamianak na saray Israelita tan imbaga to: ‘Patey yoy amin ya lalakin iyanak da.’ Balet, maong irayan bibii, kanian agda pinatey iray kapangiyanak.

Kanian ingganggan nen Faraon ed amin ya totoo to: ‘Ala yo ray Israelitan ugaw a lalakin kapangiyanak tan patey yo ra. Balet agyo papateyen iray ugaw a bibiin kapangiyanak.’ Mauge-uges iyan ganggan awa? Nengnengen tayo no akin ya ag-apatey so sakey ya ugaw a laki.