Impaway ed Ehipto Anggad Unonan Ari na Israel

Manlapud inkaaripen ed Ehipto et indaulo nen Moises iray Israelita anggad Palandey Sinai, ya ditan inter na Dios iray ganggan to. Kayari na satan, angibaki si Moises na 12 lalaki pian man-espiya ed dalin na Canaan. Balet 10 ed sikara so pinmawil ya mauges so imbalita ra. Labay laingen na saray totoo so ompawil ed Ehipto. Lapud kulang na pananisia iray Israelita, dinusa ira na Dios diad impanakar-akar dad desierto ed loob na 40 ya taon.

Insan, pinili si Josue ya mangidaulo ed saray Israelita ed dalin na Canaan. Pian natulongan iran naala so dalin, nanggawa si Jehova na saray milagro. Pinatunda toy iyaagus na Ilog Jordan, gineba toy padir na Jerico, tan agto pinaselek so agew. Kayari na anemiran taon, nala ran siansia ed saray Canaanita so dalin.

Manlapud si Josue, say Israel so inuleyan na saray ukom ed loob na 356 a taon. Nakabat tayoy dakel ed sikara, kaiba lay Barak, Gideon, Jefte, Samson, tan Samuel. Ontan met ed saray bibii ya singa si Rahab, Debora, Jael, Rut, Noemi, tan Delila. Ami-amin, 396 a taon so asakop na Parte TRES.