Nagmaliw ya Lider si Josue

LABAY nen Moises so mila ed saray Israelita diad Canaan. Kanian kinerew to: ‘Jehova, abuloyan mo ak pan makabaliw ed Ilog Jordan pian nanengneng ko so maong a dalin.’ Balet imbaga nen Jehova: ‘Duga la! Agmo lan balot itan bibitlaen!’ Antam no akin ya ontan so imbaga nen Jehova?

Lapud samay agawa sanen pinekpek nen Moises so bato. Tandaan, agdan dua pinagalangan nen Aaron si Jehova. Agda imbaga ya si Jehova so amapaway na danum manlapud bato. Kanian imbaga nen Jehova ya ag-ira makaloob ed Canaan.

Pigaran bulan kayari impatey nen Aaron, imbaga nen Jehova ed si Moises: ‘Tawag moy Josue, tan paalagey mod arap nen Eleazar a saserdote tan ed totoo. Tan ibagam ed sikaran amin ya si Josue so balon lider.’ Ginawa nen Moises so imbaga nen Jehova, a singa nanenengneng mod litrato.

Insan imbaga nen Jehova ed si Josue: ‘Pabiskeg moy linawam tan agka natatakot. Sika so mangidaulo ed saray Israelita paonlad Canaan ya impormisak ed sikara, tan tulongan ta ka.’

Kayari to, imbaga nen Jehova ed si Moises ya ontatdang ed toktok na Palandey Nebo diad dalin na Moab. Diman et nabantag nen Moises so marakdakep a dalin na Canaan. Imbaga nen Jehova: ‘Saya so dalin ya impormisak ed saray anak di Abraham, Isaac, tan Jacob. Ipanengneng kod sika balet agta ka palooben.’

Ditad mismon toktok na Palandey Nebo inatey si Moises, diad edad ya 120. Sikatoy siansia nin maksil tan maong ni pakanengneng to. Maer-ermen iray totoo tan nanakis ira lapud impatey nen Moises. Balet maliket dan inawat si Josue bilang balon lider da.