Pinekpek nen Moises so Bato

LINMABAS so 10, 20, 30, 39 ya taon, siansia nin walad desierto iray Israelita! Balet ag-ira pinaulyanan nen Jehova. Sikaray inikdan to na mana. No agew, tutulongan to ra panamegley na singa lusek a lurem, tan no labi et iikdan to ray singa lusek ya apoy. Diad amin na sarayan taon, agbalot dinmaan iray kawes da tan aglinmarag iray sali ra.

Sanen unonan bulan na koma-40 ya taon manlapu nen tinaynan day Ehipto, sikaray pinmawil ed Kades. Ditan may kulaan da sanen imbaki so 12 ya man-espiya ed Canaan ngalngali 40 ya taon so apalabas. Si Miriam ya atsi nen Moises et inatey ed Kades. Tan singa dati, wala lamet so problema.

Agmakalmoy danum iray totoo. Kanian nanreklamo rad si Moises: ‘Maong lay inatey kami. Akin et impaway mo kami nid Ehipto tan inyakar ed sayan aliwliwan lugar? Anggapoy ontubon trigo, igos, ubas, granada. Anggapoy anggan danum a nainum.’

Sanen nampikasi si Moises tan Aaron ed tabernakulo, imbaga nen Jehova ed si Moises: ‘Tawag mo ray totoo. Insan diad arap dan amin et mansalita ka ed bato ya wadman. Et ompaway so dakel a danum parad saray totoo tan parad ayayep da.’

Kanian, tinipon nen Moises iray totoo tan imbaga to: ‘Dengel kayo, sikayo ran anggapoy talek ed Dios! Kasin mamapaway kami nen Aaron na danum ed sayan bato parad sikayo?’ Insan amiduan pinekpek nen Moises so bato, tan pinmaway so amayamay ya danum. Inminum so amin a totoo tan ayayep.

Balet, nampasnok si Jehova ed kinen Moises tan Aaron. Antam no akin? Ta imbaga dan sikaray amapaway na danum ed bato. Pero diad tua et si Jehova. Tan lapud ag-imbaga nen Moises tan Aaron so tua, dinusa ira nen Jehova. Inkuan to: ‘Aliwan sikayo so mangiyakar ed totook diad Canaan.’

Ag-abayag, tinaynan na saray Israelita so Kades tan akasabi rad Palandey Hor. Diad toktok na satan, inatey si Aaron diad edad ya 123. Maer-ermen iray Israelita, tan 30 ya agew dan inakisan si Aaron. Si Eleazar ya anak to so sinmublay a nagmaliw ya atagey a saserdote ed Israel.