Say 12 ya Espiya

NENGNENG mo irayay prutas ya awit na lalaki. Agaylay kabaleg na saray ubas! Nengneng mo met iray prutas ya granada tan igos. Diad gaway belat na saraya, kaukolan nin sakbaten na duaran laki. Iner nanlapu iraya? Diad Canaan. Tandaan, diad Canaan so nanayaman nensaman di Abraham, Isaac, tan Jacob. Balet lapud eras, inmalis si Jacob tan say pamilya to diad Ehipto. Kalabas na 216 a taon, indaulo nen Moises iray Israelita papawil ed Canaan. Tan akasabi rad lugar ed desierto a tatawagey Kades.

Mauges iray manaayam ed Canaan. Kanian angibaki si Moises na 12 ya espiya, tan imbaga tod sikara: ‘Nengneng yo no panon karakel iray manaayam diman, tan panon ira kabiskeg. Nengneng yo met no kasin mabuna so dalin. Tan mangisempet kayo na pigaran bunga.’

Nen pinmawil iray espiya ed Kades, imbaga dad Moises: ‘Talagan marakep iman ya dalin.’ Tan impanengneng dad si Moises iray pigaran prutas. Balet imbaga na 10 ya espiya: ‘Saray totood man et ataragey tan mabibiskeg. Pateyen da tayo no alaen tayoy dalin da.’

Ataktakot iray Israelita nen arengel da iya. Imbaga da: ‘Mas maong lay inatey kamid Ehipto odino diad desierto. Seguradon napatey da tayo, tan alaen da ray kaasawaan tan ananak tayo. Mamili tayo na balon lider a kasalat nen Moises, tan ompawil tayo lad Ehipto!’

Balet duara ed saray espiya so nanmatalek ed si Jehova, si Josue tan Caleb. Imbaga da: ‘Agkayo natatakot. Tulongan itayo nen Jehova. Mainomay ya naala may dalin.’ Pero ag-ondengel iray totoo. Labay da ni ingen ya pateyen si Josue tan Caleb.

Kanian nampasnok ya maong si Jehova, tan imbaga tod si Moises: ‘Amin ya mantaon na duamplo a patagey et agmakaloob ed dalin na Canaan. Anengneng da ray milagro ya ginawak ed Ehipto tan ed desierto, balet siansia nin ag-ira nanmatalek ed siak. Kanian dia la rad desierto manayam ed 40 ya taon anggad ompatey iran amin. Si Josue tan Caleb labat so makaloob ed Canaan.’