Nanrosas so Baston nen Aaron

NENGNENG mo ray rosas tan aluton almendras ya tinmubo ed baston nen Aaron. Diad sanlabi labat et tinmubo iratan ed baston to! Akin kasi?

Saray Israelita et abayag lan walad desierto. Parad arum, anggapoy kanepegan nen Moises ya magmaliw a lider, tan agda met labay ya si Aaron so magmaliw ya atagey a saserdote ra. Ontan so iisipen nen Kora, Datan, Abiram, tan saray 250 ya lider na totoo. Linma ran amin ed si Moises tan imbaga ra: ‘Akin et ipapasen moy sarilim ya mas atagey nen say sikami?’

Imbaga nen Moises ed si Kora tan ed saray kakaiba to: ‘Nabuas na kabuasan, mangala kayo na kargaan na ngalab tan ikdan yoy insenso. Insan onla kayod tabernakulo. Nanengneng tayo no siopay pilien nen Jehova.’

Kaimbuasan, linmay Kora tan saray 250 ya kakaiba to diad tabernakulo. Tan dakel so akila pian suportaan ira. Nampasnok ya maong si Jehova. ‘Arawian yo ray tolda na sarayan mauges a totoo. Agyo didiwiten so antokaman a kayarian da,’ kuan nen Moises. Dinmengel iray totoo, tan inarawian da ray tolda nen Kora, Datan, tan Abiram.

Insan imbaga nen Moises: ‘Diad saya et naamtaan yo no siopa so pinili nen Jehova. Onsangi so dalin tan akmonen to irayan mauges a totoo.’

Kapangibaga nen Moises ed saya, sinmangi so dalin. Inakmon na dalin si Datan, Abiram, tan amin a kaiba ra, pati say tolda tan kaykayarian nen Kora, tan kinmapot imay dalin. Nen nadngel na totoo so paneyag na saramay inakmon na dalin, inkuan da: ‘Batik! Ompan akmonen tayo met na dalin!’

Diad saman et siansia nin walad asingger na tabernakulo si Kora tan saray 250 ya kakaiba to. Kanian angipelag si Jehova na apoy, tan apoolan iran amin. Insan imbaga nen Jehova ed anak nen Aaron a si Eleazar ya alaen iray kargaan na ngalab na saray inaatey tan gawaen iratan ya apis na altar. Saya so pakanengnengan na saray Israelita ya say nepeg labat a magmaliw ya saserdote nen Jehova et si Aaron tan saray anak to.

Balet labay nin ipaseguro nen Jehova a say pinili Ton magmaliw ya saserdote et si Aaron tan saray anak to. Kanian imbaga tod si Moises: ‘Pangawit moy baston so lider na kada tribu na Israel. Diad tribu nen Levi, si Aaron so pangawit moy baston. Insan ikargam irayan baston diad tabernakulo diad arap na kaban na sipanan. Say baston na saserdote ya pinilik et manrosas.’

Kaimbuasan, nen ninengneng nen Moises, say baston nen Aaron so nanrosas tan nambunga na aluton almendras! Kasin antam la natan no akin ya nanrosas so baston nen Aaron?