Saray Mautek ya Gibeonita

SARAY syudad ed Canaan et namparaan ya milaban ed Israel. Abalang da manalo ra. Balet aliwan ontan so ninonot na saray taga-Gibeon. Panisiaan dan tutulongan na Dios iray Israelita, tan agda labay ya kalabanen so Dios. Kanian antam no antoy ginawa na saray Gibeonita?

Nankunkunwari ran arawdawi so panaayaman da. Nansulong so arum ed sikara na apilat-apilat ya kawes tan dagdaan la ran sandalyas. Inyan dad saray asno ra iray napipilat lan sako tan nabobootan ya tinapay. Insan ira linmad si Josue tan imbaga ra: ‘Arawdawi so nanlapuan mi, ta abalitaan mi nipaakar ed makapanyarin Dios yo, si Jehova. Nadngelan mi so amin a ginawa tod sikayo diad Ehipto. Kanian imbagad sikami na saray lider mi ya manbalon kami na naakan parad biahe tan onlan onabet ed sikayo tan ibagan: “Sikami ray aripen yo. Ipormisa yo ya agyo kami lalabanan.” Nanengneng yod kawes mi ya dinmaan la lapud andukey ya biahe tan saray tinapay mi et abootan tan inmawet la.’

Anisia si Josue tan saray arum ya lider. Kanian impormisa dan agda ra labanan. Balet kayari taloy agew, naamtaan dan saray Gibeonita et manaayam ed asingger.

‘Akin et imbaga yod sikami ya arawdawi nanlapuan yo?’ so intepet nen Josue ed sikara.

Inmebat iray Gibeonita: ‘Ta naamtaan min impormisa na Dios yon Jehova ya iter tod sikayo so interon Canaan. Kanian antakot kami ompan pateyen yo kami.’ Balet siansia nin ginawa na saray Israelita so impormisa ra. Agda pinatey iray Gibeonita, imbes et ginawa da ran aripen da.

Nampasnok so ari na Jerusalem lapud akikaaro iray Gibeonita ed Israel. Kanian imbaga tod apatiran arum nin ari: ‘Gali dia ta tulongan yo ak ya milaban ed Gibeon.’ Tan ontan so ginawa na sarayan limaran ari. Duga kasi ginawa na saray Gibeonita ya akikaaro rad Israel? Nengnengen tayo.