Tepetepet na Saray Manbabasa

Akin et ibabaga na 2 Samuel 21:7-9 ya “akasian [nen David] si Mefiboset,” pero pinmayag ya pateyen na saray Gibeonita si Mefiboset?

No basaen mo itan ya salaysay, seguro ompan atan met so nitepet mo. Pero diad tua, duaran too so natutukoy dia tan parehon Mefiboset so ngaran da. Rebyuen tayo pa iyan salaysay ta walay balibalin naaralan tayo ed saya.

Pitoran lalaki tan duaran bibii so ananak nen Arin Saul. Say panguloan ya laki et si Jonatan. Walay anak nen Jonatan ya say ngaran to et Mefiboset. Pero wala met so anak nen Arin Saul ed onkokomaduan asawa ton si Rizpa, ya say ngaran to met et Mefiboset. Kanian diad pamilya nen Arin Saul, duara so manngaran na Mefiboset—amay sakey et anak to tan amay sakey et apo to.

Nen manuuley si Arin Saul, kabusol to ray Gibeonita tan sinali ton upoten so lahi ra. Tan mapatnag ya dakel so inatey. Aliwa itan ya ginawa to. Akin ey? On ta diad panaon nen Josue, akikareenan iray pangulo na Israel ed saray Gibeonita tan insipan da ya ag-iran balot mi-guerra ed sikara.—Jos. 9:3-27.

Amta nen Arin Saul iyan sipanan. Pero, sinali to nin siansia ya upoten iray Gibeonita. Lapud satan, “nankasalanan ed dala si Saul tan say sankaabungan to.” (2 Sam. 21:1) Pero nen si David la so ari, inmasingger ed sikato iray akeran Gibeonita tan kinmerew iray hustisya. Kanian tinepetan ira nen David no antoy labay dan nagawa pian nabayaran so kasalanan nen Saul tan ontunda la so eras ed bansan Israel ya resulta na satan. Imbes ya onkerew iray kuarta bilang kasalat, imbaga rad si David ya labay dan ompatey so pitoran ananak a lalaki nen Saul. (Num. 35:30, 31) Pinmayag si David ed kerew da.—2 Sam. 21:2-6.

Inatey lay Saul tan Jonatan ed saman. Pero say anak nen Jonatan ya si Mefiboset et mabilay ni. Lupoy si Mefiboset, ta nen ugaw ni et naplag na managkomis to. Tan anggapoy kinalaman to ed plano nen laki to ya pangupot ed saray Gibeonita. Malet ya sankaaro si David tan Jonatan, kanian maomaong si David ed si Mefiboset anggano inatey lay ama to. (1 Sam. 18:1; 20:42) Oniay ibabaga na Biblia: “Akasian [nen David] si Mefiboset ya anak nen Jonatan ya anak nen Saul, lapud nansamba ed arapan nen Jehova si David tan si Jonatan.”—2 Sam. 21:7.

Pero siempre, kaukolan ya iter nen David so hustisya ed saray Gibeonita. Kanian inyawat tod sikara so duaran ananak a laki nen Saul, ya say sakey et amay Mefiboset so ngaran to. Inyawat to met ed sikara so limaran apo nen Saul. (2 Sam. 21:8, 9) Lapud sayan ginawa nen David, tinmunda so taloran taon ya eras ed Israel.

Makaaral tayod sayan salaysay. Malinlinew so ganggan na Dios ya “agnepeg a pateyen iray ananak lapud ginawa na saray kaamaan da.” (Deu. 24:16) No anggapon talagay kasalanan na duaran ananak tan limaran apo nen Saul, agkomon pinmayag si Jehova ya ompatey ira. Ta oniay katuloyan na ganggan: “Nepeg a pateyen so sakey a too lapud dilin kasalanan to.” Mapatpatnag sirin ya sayan pitoran kapamilya nen Saul et kasabwat ed plano ton pangupot ed saray Gibeonita. Say impatey da et bayar na kasalanan da.

Antoy naaralan tayod saya ey? No walay ginawa tayon aliwa, agtayo nayarin ibaraan ya inunor tayo labat so ibabaga na arum. Kanian antis kan mandesisyon o gawaen moy sakey a bagay, ipapusom iyan prinsipyo na Biblia: “Nonot mon maong so dadalanen mo, tan amin a kurang mo et magmaliw a segurado.”—Pro. 4:24-27, paimanod leksab; Efe. 5:15.