Duaran Makpel a Bii

SANO napepeligro iray Israelita, onkerew iray tulong ed si Jehova. Tan ikdan to ra na makpel iran lider ya ontulong ed sikara. Tatawagen na Biblia irayan lider ya ukom. Si Josue so sankaunaan ya ukom, tan saray sinmusublay et si Otniel, Ehud, tan Samgar. Balet akatulong ed Israel so duaran bii ya manngaran na Debora tan Jael.

Si Debora et sakey a propetesa. Ibabaga nen Jehova ed sikato no antoy nagawa ed arapen, insan to iraya ibaga ed saray totoo. Sikatoy sakey met ya ukom. Sikatoy onyuyurong ed silong na palmira, tan oonlad sikato iray totoo pian onkerew na tulong.

Say ari na Canaan diad saman et si Jabin. Walay 900 ya karwahe to parad guerra. Mabisbiskeg ira kanian dakel ya Israelita so inaripen da. Say lider na saray sundalo nen Arin Jabin et si Sisera.

Aminsan, impatawag nen Debora si Ukom Barak, tan inkuan to: ‘Imbaga nen Jehova: “Mangala kay 10,000 a lalaki tan onla kayod Palandey Tabor. Diman et iyawat kod sika si Sisera. Tan panaloen ta kayo.”’

Imbaga nen Barak ed si Debora: ‘Onla ak no mila kad siak.’ Akila si Debora, balet imbaga tod si Barak: ‘Aliwan sikay napagalangan ed panalo, ta iyawat nen Jehova si Sisera ed sakey ya bii.’ Tan ontan so agawa.

Linmeksab ed Palandey Tabor si Barak pian milaban ed saray sundalo nen Sisera. Biglan nampadelap si Jehova tan nalner so dakel a kalaban ya sundalo. Balet akabatik si Sisera.

Akasabi si Sisera ed tolda nen Jael. Sikatoy pinaloob nen Jael tan pinainum toy gatas, kanian akaugip. Insan angala na palpal na tolda tan impanek tod ulo nen Sisera. Nen sinmabi si Barak, impanengneng nen Jael ya inatey lay Sisera! Tinmua so imbaga nen Debora.

Ag-abayag, apatey met si Arin Jabin, tan dinmeen ya agano so Israel.