Diad Dalan Paarap ed Damasco

ANTAM no siopa yay niparukol? Si Saulo. Sikato may nambantay ed saray latop a kawes na lalakin nantupak ed si Esteban. Makalaram so liwawa! Antoy nagagawa?

Sanen inatey si Esteban, inanap nen Saulo iray papatumbok nen Jesus pian pairapen. Sinansakey ton nilooban iray kaabungan da, inggagayugoy tan impaipriso to ra. Dakel ed saray disipulo so batik ed arum iran syudad tan diman da impulong so “maong a balita.” Balet tinumbok ira nen Saulo. Sikatoy paarap la natan ed Damasco. Pero diad dalan, onyay makapakelaw ya agawa:

Biglan sinminag ed kaliberliber to so liwawan nanlapud tawen. Niparukol, ya singa nanengneng mod litrato. Insan walay nansalita: ‘Saulo, Saulo! Akin et papairapen mo ak?’ Anengneng na kakaiba nen Saulo so liwawa tan arengel day boses balet agda natalosan so ibabaga na satan.

‘Siopa ka, Katawan?’ so intepet nen Saulo.

‘Siak si Jesus ya papairapen mo,’ so kuan na boses. Imbaga iya nen Jesus ta no papairapen nen Saulo iray papatumbok nen Jesus, singa si Jesus a mismo so nasasakitan.

Intepet natan nen Saulo: ‘Antoy gawaen ko, Katawan?’

Inkuan nen Jesus: ‘La kad Damasco. Ibagak ed sika diman no antoy gawaen mo.’ Sanen inmalagey si Saulo tan linmimata, anggapoy nanengneng to. Abulag! Kanian intabin na kakaiba to tan inyakar dad Damasco.

Imbaga nen Jesus ed sakey ya disipulo tod Damasco: ‘Ananias, la kad dalan a tatawagen a Maptek. Diad abung nen Judas et anap moy lakin manngaran na Saulo. Sikatoy pinilik a magmaliw ya importantin lingkor ko.’

Tinmulok si Ananias. Sanen aromog toy Saulo, intapew toy lima to ed sikato tan imbaga to: ‘Imbaki ak na Katawan pian makanengneng ka lamet tan napano ka na masanton espiritu.’ Et tampol a wala ray singa siksik ya apagpag ed mata nen Saulo, tan akanengneng lamet.

Talagan nausa-usar si Saulo pian napulongan so totoo ed dakel a bansa. Sikatoy akabkabat bilang apostol Pablo, tan dakel ni naaralan tayo ed sikato. Balet natan, amtaen tayo ni no antoy ipapagawa na Dios ed si Pedro.