Pinili nen Jesus si Saulo

Si Saulo et sakey a Romano ya inyanak ed Tarso. Sikatoy sakey ya Fariseo ya marundunong ed Ganggan na saray Judio, tan kakkabusol to ray Kristiano. Nilolooban to ray abung da tan inggagayugoy to ray lalaki pati saray bibii, tan impaipriso to ra. Tan nen wala ray manngilet ya lalakin nantupak ed disipulo ya si Esteban anggad inatey, wadman met si Saulo ya mamatbantay.

Balet agkontento si Saulo ya saray Kristiano labat ed Jerusalem so erelen to. Kanian kinmerew na permiso ed atagey ya saserdote ya onlad syudad na Damasco pian naerel to ray Kristiano diman. Nen asingger lay Saulo ed satan ya syudad, biglan walay liwawa ya sinminag ed sikato, tan sikatoy atumba. Insan walay arengel ton boses ya angibagan: ‘Saulo, akin et papairapen mo ak?’ Tinepet nen Saulo: ‘Siopa ka?’ Inmebat so boses: ‘Siak si Jesus. La kad Damasco, tan naamtaan mo diman no antoy dapat mon gawaen.’ Biglan abulag si Saulo, kanian intabin na saray kaiba to tan inyakar dad syudad.

Diman ed Damasco, walay matoor ya Kristiano ya say ngaran to et Ananias. Diad pasingawey et imbaga nen Jesus ed sikato: ‘La kad abung nen Judas diad karsada ya tatawagen ya Maptek, tan anap moy Saulo.’ Imbaga nen Ananias: ‘Katawan, kabkabat ko man ya too! Ipi-priso to ray disipulom!’ Balet imbaga nen Jesus: ‘La ka, ta si Saulo so pinilik ya mangipulong ed maong a balita diad dakel ya bansa.’

Kanian inanap nen Ananias si Saulo tan imbaga to: ‘Saulo, agik, imbaki ak nen Jesus pian ipawil so pakanengneng mo.’ Tampol ya akanengneng lamet si Saulo. Naamtaan toy tungkol ed si Jesus tan nagmaliw ya patumbok to. Nen abautismoan lay Saulo bilang Kristiano, nampulong met lad saray sinagoga, kaiba iray arum ya Kristiano. Imadyin mo pa, seguradon abiglan maong iray Judio nen anengneng day Saulo ya manbabangat tungkol ed si Jesus! Imbaga da: ‘Di ba, aya may toon eerelen to ray disipulo nen Jesus?’

Taloran taon ya nampulong si Saulo diad Damasco. Binusol na saray Judio si Saulo tan implano dan pateyen. Balet naamtaan na agagi so plano da kanian tinulongan day Saulo ya makatakas. Inlugan dad buksot insan da inleksab ya indalan dad sakey ya bintana diad padir.

Nen linma si Saulo diad Jerusalem, labay to komon so miulop ed saray agagi diman. Balet natatakot irad sikato. Maong labat ta walay mabait ya disipulo ya say ngaran to et Bernabe tan inibaan toy Saulo ed saray apostol tan kinombinse to ra ya talagan anguman lay Saulo. Makulin impulong nen Saulo so maong ya balita kaiba iray agagi ed Jerusalem. Asabi panaon, sikatoy akabat ed ngaran ya Pablo.