Say Manamasegsegang so Akanengneng na Baleg a Liwawa

PIRMI sanok nen Saulo ed saray patumbok nen Jesus. Agla kontento ed panamasegsegang a nipaakseb ed sikara diad Jerusalem, ontan met la’d impantupak ed si Esteban, kanian nanggunaetan to natan a palaknaben so panamairap to. “Balet si Pablo so maningas ni ed pangigagaem tan panagpatey ed saray binangatan na Katawan, linma ed manunaan ed saray saserdotes, et kinmerew ed sikato na sulat ya onla ed Damasco, ed saray sinagoga, piano no wala so naromog to arum a wala ed sayan Dalan, lalaki odino bibii, iyakar to ra a balor ed Jerusalem.”​—Gawa 9:1, 2.

Leleg a manaakar si Saulo a paonla ed Damasco, maseguron momolimolien to no panon ton gawaen a sankaepektiboan so niganggan ed sikato. Lapud pakauley ya impagamor ed sikato na atagey a saserdote, andi-duaruwan mitulongan iray lider na baleg a komunidad na saray Judio ed satan a syudad. Nakaukolan nen Saulo so tulong da.

Manpirpirawat lay Saulo leleg a sikatoy manasingger ed laen to. Makapaluboy so pambiahe manlapud Jerusalem anggad Damasco​—pitora odino waloran agew a panakar ed ngalngali 220 kilometro. Bigbigla diad pamegpegley lay agew et sinminag ed si Saulo so liwawa a lalon maliwawa nen say agew, kanian sikatoy niparugso. Nadngel toy bosis a nankuan ed sikato ed salitan Hebreo: “Saulo, Saulo, akin et uusilan mo ak? Mairap ed sika so pangidepak mo ed utok.” “Siopa ka Katawan,” so intepet nen Saulo. “Siak si Jesus ya uusilan mo,” so ebat. “Balet ombangon ka tan onalagey ka ed saray salim: ta lapu ed sayan kanonotan pinmayawar ak ed sika, pian igaton taka a ministro tan tasi ed saray bengatla ya anengneng mo tan saray bengatla ya ipayawar ko ed sika, ya ilaban ta ka ed baley, tan ed saray Gentiles, a sikara so pangibakian ko ed sika.” “Anto naani gawaen ko, Katawan?,” so tepet nen Saulo. “Alagey ka, tan onla ka ed Damasco, et diman nibaga naani ed sika so amin a nitadia a gawaen mo.”​—Gawa 9:3-6; 22:6-10; 26:13-17.

Akadngel na bosis iramay kaiba nen Saulo a nambiahe, balet ta agda anengneng so nansalita odino atalosan so imbaga to. Lapud kamasnag na liwawa, sanen inmalagey si Saulo et agmakanengneng kanian sikatoy kaukolan ya itabin. “Sikato so ag-akanengneng ed taloran agew; et ag-angan tan agmet inminum.”​—Gawa 9:7-9; 22:11.

Taloy Agew a Nandalepdep

Si Saulo so pinarawes nen Judas, a manaayam ed karsadan tinawag a Maptek.a (Gawa 9:11) Sayan karsada​—a tinawag a Darb al-Mustaqim ed Arabe​—so siansia nin manunan dadalanan diad Damasco. Isipen pa no antoy sinmebang ed nonot nen Saulo leleg a walad abung nen Judas. Abulag tan abigla si Saulo ed saman ya inkagawa. Pankanawnawa to lan dalepdepen iray kabaliksan na satan.

Say manamasegsegang so nidunget ed say imbaliwala ton singa andiay kabaliksan. Say impasak a Katawan a Jesu-Kristo​—a kinondena na sankatagyan a pakauley na Judio tan ‘minudmora tan inkaindan na totoo’​—so mabilay. Agayla, sikato ni ingen so manalalagey a naabobonan ed nikawanan na Dios diad “liwawa ya agnaasinggeran”! Si Jesus so Mesias. Duga si Esteban tan arum nira. (Isaias 53:3; Gawa 7:56; 1 Timoteo 6:16) Talagan aliwa si Saulo, ta impakabat nen Jesus so inkasikato a walad saramay mismon papasegsegangen nen Saulo! Unong ed walan ebidensia, panon a nayarian nen Saulo a tuloytuloy ya ‘idepak iray utok’? Anggan say mabanos a kalakian a baka so ontulok lanlamang diad labay a pangitengtengan na akankien. Sirin, lapud agto pitulongan ed ibabaga nen Jesus, papasakitan nen Saulo so inkasikato.

Bilang Mesias, si Jesus so agnayarin kondenaen na Dios. Ingen, sikatoy inabuloyan nen Jehova a managmak na sankabandayan ed amin ya ipapatey tan nasentensiaan unong ed Ganggan: “Saman a too ya abitay sikato so insamba na Dios.” (Deuteronomio 21:23) Inatey si Jesus leleg ya akabitin ed panamairapan a kiew. Sikatoy naayew, aliwan lapud dili iran kasalanan to, ta anggapoy kasalanan to, noagta lapud inkamakasalanan na katooan. Impaliwawa nen Saulo ed saginonor: “Lapag na amin a mangunor ed saray gawa na ganggan, wala ra ed lepsag na pangayew: ta walan nisulat, Naayew so lapag ya agmansiansia ed amin a bengatla a walan nisulat ed libro na ganggan, pian gawaen da ra. Balet maliwawa ya anggapo so napatunong ed arap na Dios lapud ganggan. . . . Si Kristo dinondon to itayo ed ayew na ganggan, dia ed inkaayew to lapu ed gawa tayo: ta wala a nisulat, inayew so lapag a nibitin ed kiew.”​—Galacia 3:10-13.

Walaay makarondon a balor so bagat nen Jesus. Diad impangawat ed satan a bagat, piguratibon impasak nen Jehova so Ganggan tan saray ayew na satan ed kiew. Diad impakatebek ed satan a katuaan, nayarian nen Saulo ya impasen bilang “kakabatan na Dios” so panamairapan a kiew a satan et “akagapolan ed saray Judios.” (1 Corinto 1:18-25; Colosas 2:14) Kanian, sirin, no say kilalaban et aliwan lapud saray gawa na ganggan noagta diad panamegley na pangagamil na Dios ed agkanepegan a panangasi nipaakar ed saray makasalanan a singa si Saulo a mismo, posiblin nilukas itan ed saramay walad paway na Ganggan. Tan diad saray Gentil so pangibakian nen Jesus ed si Saulo.​—Efeso 3:3-7.

Agtayo amta no panoy impakatalos ed saya nen Saulo dia ed samay panaon na inkakomberti to. Kinatongtong lamet nen Jesus, anganko et aminpiga, nipaakar ed say misyon to ed saray nasyon. Niarum ni, pigaran taon lay apalabas antis ya insulat itan nen Saulo diad panangiwanwan na madibinon inkipuyan. (Gawa 22:17-21; Galacia 1:15-18; 2:1, 2) Anggaman ontan, pigaran agew labat so linmabas antis a naawat nen Saulo so kaaruman a panangiwanwan a manlapud say balon Katawan to.

Indalaw nen Ananias

Kayari inyapireng to ed si Saulo, inmapireng met si Jesus ed si Ananias, a nankuan: “Onla ka ed lansangan ya inngaran a Maptek, et anapen mo ed abung nen Judas so sakey a manngaran na Saulo, sakey a taga Tarso, ta nia, sikato so mikakasi; et anengneng to ed pasingawey so sakey a laki a manngaran na Ananias ya onloloob tan iyan to ed tapew to so lima to pian naako to so pakanengneng.”​—Gawa 9:11, 12.

Lapud kabat nen Ananias si Saulo, natalosan sirin so impakabigla to ed saray salita nen Jesus. Inkuan to: “Katawan nadngelan ko ed dakel so nipaakar ed sayan too, a dakel so kaugsan a ginawa to ed saray sasantom ed Jerusalem. Et anggan dia wala so pakauley to a nanlapu ed saray manunaan na saserdotes, a mangerel ed amin ya ontawag ed ngaran mo.” Balet, inkuan nen Jesus ed si Ananias: “Onla ka, ta sikato so sakey a baso a pinili, pian awiten to so ngaran ko ed arap na saray Gentiles tan saray arari, tan saray anak na Israel.”​—Gawa 9:13-15.

Lapud apaseguroan, linma ed pasen ya imbaga nen Jesus ed sikato. Diad impakaromog tan impangibano to ed si Saul, intapew nen Ananias so lima to ed sikato. “Et tampol,” kuan na salaysay, “a naplag nanlapu ed saray mata [nen Saulo] so singa ra siksik, et akanengneng.” Akaparaan lan ontalineng si Saulo. Pekderan na saray salita nen Ananias so nayarin atalosan nen Saulo ed saray salita nen Jesus: “Say Dios na saray atateng tayo tinuro to ka pian nakabatan mo so linawa to, tan nanengneng mo so Matunong, tan narengel mo so bosis ed sangi to. Ta sika naani tasi to ed saray amin a totoo nipaakar ed anengneng tan nadngel mo. Et natan, akin et ontunda ka? Alagey ka, et manbinyag ka et urasan mo so saray kasalanan mo, a tawagen mo so ngaran to.” Antoy resulta ey? Si Saulo “et inmalagey, et abinyagan; et nen akapangan la, kinmasil.”​—Gawa 9:17-19; 22:12-16.

Kayari impanumpal ed niganggan ed sikato, naandi lan tampol ed eksena si matoor ya Ananias, tan anggapo lay nibaga ed sikatayo nipaakar ed sikato. Balet pinakelaw nen Saulo so amin ya akadngel ed sikato! Say datin manamasegsegang, a linma ed Damasco pian erelen iray babangatan nen Jesus, so ginmapon nampulong ed saray sinagoga tan paneknekan ton si Jesus so Kristo.​—Gawa 9:20-22.

“Apostol ed Saray Nasyon”

Lapud asagmakan nen Saulo ed dalan a paarap ed Damasco et tinmunda lay panamasegsegang to. Diad impakamoria to la ed pakabidbiran na Mesias, niyaplika nen Saulo so dakel a kanonotan tan propesiya na Hebreon Kasulatan nipaakar ed si Jesus. Lapud kabat ton inmapireng si Jesus ed sikato tan ‘kinmapet ed sikato’ tan angiganggan ed sikato bilang “apostol ed saray nasyon” et nagnap ya apasimbalo so bilay nen Saulo. (Filipos 3:12; Roma 11:13, NW) Natan bilang apostol Pablo, sikatoy walaan na pribilihyo tan autoridad a mangimpluensia ya aliwa labat lan diad nakekeraan na impanbilay to diad dalin noagta ontan met ed say kurang na awaran na Kristiano.

Pigaran taon ed saginonor, sanen sinuppiat so inka-apostol nen Pablo, indepensa toy autoridad to diad impanukoy ed say asagmak to ed dalan a mamaarap ed Damasco. “Agak ta apostol? Agko ta anengneng si Jesus a Katawan tayo?,” so intepet to. Tan kayari impamitla ed inyapireng nen apaolin Jesus ed arum, inkuan nen Saulo (Pablo): “Dia ed kaunoran na amin, singa sakey a lukon a nakal, pinmatnag met ed siak.” (1 Corinto 9:1; 15:8) Lapud anengneng nen Saulo ed pasingawey na mangatatawen a gloria nen Jesus et singa nipagamor ed sikato so galang ed pagmaliw ya asakbay a nianak, odino inmoli, ed maespiritun bilay.

Inaksobi nen Saulo so pribilihyo to tan insekar toy inkasikato a manbilay unong ed satan. “Siak so kamelagan ed saray apostoles, tan agak manepeg ya ingaran na apostol, ta inusilusilan ko so iglesia na Dios,” so insulat to. “Et lapud . . . grasya [na Dios] ya inyabuloy to ed siak ag-aromog ya anggapoy kabaliksan to; noag ingen lalon daakan a nankimey ak nen say [amin ya arum iran apostol].”​—1 Corinto 15:9, 10.

Singa si Saulo et nayarin nanonotan moy panaon sanen amoriam a pian nagamoran moy pabor na Dios et kaukolan mon umanen so abangonan a nigalet iran relihyoson panmoria. Andi duaruwan misalsalamat kan maong ta tinulongan ka nen Jehova a natalosan so katuaan. Sanen anengneng nen Saulo so liwawa tan naamtaan to so kakaukolanen ed sikato, mabulos ton ginawa itan. Tan intultuloy ton ginawa itan a tekep na seseg tan determinasyon ed nakekeraan a pambilay to ni diad dalin. Agaylan abig ya alimbawa parad amin a manpilalek ed pabor nen Jehova natan!

[Paimano ed leksab]

[Litrato ed pahina 27]

Say karsadan tinawag a Maptek diad kaplesan a Damasco

[Credit Line]

Nilitrato na ROLOC Color Slides