Kapitulo 14
‘Manggawa Ak na Sakey a Sipanan ed Sikayo Nipaakar ed Sakey a Panarian’
1. Diad samay labi sakbay na impatey nen Jesus anton ilalo so inyan to’d arap na saray apostoles to?
SAMAN so diad labi sakbay na impatey nen Jesus ya imbaga to ed saray matoor ya apostoles to: ‘Diad abung nen Amak et walaray dakel a panayaman. Siak so onla a mangiparaan na pasen ed sikayo, pian no iner so kawalaan ko et wadman kayo met komon.’ Intuloy to nin imbaga ed sikara: “Manggawa ak na sakey a sipanan ed sikayo, unong a say Amak so nanggawa na sakey a sipanan ed siak, nipaakar ed sakey a panarian.” (Juan 14:2, 3; Lucas 22:29) Agaylan makapakelaw ya ilalo so inyan to ed arap da!
2. Panon karakel so mibiang ed si Kristo diad mangatatawen a Panarian to?
2 Anggaman kuan, aglabay nen Jesus ya ibaga a saraman ya apostoles lambengat so manuley a kaiba to ed mangatatawen a Panarian. Diad saginonor et nipaamta a saray 144,000 ya arondon ed dalin so nawalaan na satan ya engranden pribilehyo. (Apocalipsis 5:9, 10; 14:1, 4) Kasin arum natan so manadampot a makagamor ed satan?
Panagtipon ed Saray Mananawir na Panarian
3. Diad mapublikon ministeryo to, ed anton pankanawnawa so intawag nen Jesus ed imano?
3 Kayari na impangipangaw nen Herodes Antipas ed si Juan a Managbautismo, sinublay nen Jesus so mabiskeg a kampanya ed mapublikon panagpulong ya inyapasakey to so imano “ed panarian na katawenan.” (Mateo 4:12, 17) Impakabat to ed saray totoo a wala so pankanawnawa ed sikaran onloob ed satan a Panarian, tan saray babangatan to so sigugunaet a makagegemtan ed satan a tumang.—Mateo 5:3, 10, 20; 7:21; 11:12.