Say Kamarerwa Unong ed Biblia
“Say too nagmaliw a too a mabilay a sikakamarerwa [“kamarerwa,” NW].—GENESIS 2:7.
1. Antoy kaukolan tayon usisaen ta pian nadetermina no antoy ibabangat na Biblia nipaakar ed kamarerwa?
SINGA naimano tayo la, dakel tan nandurumay pananisia nipaakar ed kamarerwa. Anggan diad limog na saramay mankuan ya ibabase ray sisisiaen da ed Biblia, walaray nanduruman ideya nipaakar ed no antoy kamarerwa tan no antoy nagagawa ed satan sano inatey itayo. Balet anton talagay ibabangat na Biblia nipaakar ed kamarerwa? Pian naamtaan, kaukolan tayon usisaen iray kabaliksan na Hebreo tan Griego iran salitan nipatalos a “kamarerwa” diad Biblia.
Say “Kamarerwa” Bilang Mabilay a Pinalsa
2, 3. (a) Anton salitan nipatalos a “kamarerwa” ed Hebreon Kasulatan, tan antoy manunan kabaliksan na sayan salita? (b) Panon a pepekderan na Genesis 2:7 a say salitan “kamarerwa” et kabaliksan toy intiron persona?
2 Say Hebreon salitan nipatalos a “kamarerwa” et neʹphesh, tan pinmatnag a 754 danay ed Hebreon Kasulatan (kaslakan a tatawagen a Daan a Sipan). Antoy kabaliksan na neʹphesh? Unong ed The Dictionary of Bible and Religion, “kaslakan ya ontutukoy [itan] ed intiron mabilay a persona, ed intiron indibidual.”
3 Alimbawa, ibabaga na Genesis 2:7: ‘Si Jehova a Dios, say sapok na dalin so ginawa to a too, tan inlinawa to ed saray sangab na eleng to so linawa na bilay; et say too nagmaliw a too a mabilay a kamarerwa.’ Imanoen a si Adan et ag-awalaan na kamarerwa; sikato so kamarerwa—unong a say sakey a nagmaliw a doktor so sakey a doktor. Say salitan “kamarerwa,” sirin, et manideskribe’d intiron too.
4, 5. (a) Mangiter na saray alimbawa a mangipapanengneng a say salitan “kamarerwa” et ontutukoy ed intiron persona. (b) Panon a say The Dictionary of Bible and Religion so manusuporta ed pakatalos a say sakey a persona so kamarerwa?
4 Sayan pakatalos et susuportaan na intiron Hebreon Kasulatan, a no iner et naromog tayoray balikas a singa “no walay siopaman [“kamarerwa,” NW] a mankasalanan” (Levitico 5:1), “say anggan siopa a kamarerwa a manggawa na dinanman a nengneng na kimey” (Levitico 23:30), “no say sakey a too et napesgaan a mantakew na siopa [“kamarerwa,” NW]” (Deuteronomio 24:7), “say kamarerwa to apairap” (Uko-ukom 16:16), “kaunongan kabayag so pamaermen yo ed kamarerwak?” (Job 19:2), tan “say kamarerwak napunaw nipaakar ed kadedetdetan.”—Salmo 119:28.
5 Anggapoy pakapatnagan ed sarayan teksto a say kamarerwa et singa-aninon indibidual a mantultuloy kayari ipatey. “Say pangibaga ed termino tayo a say ‘kamarerwa’ na inad-aro tayo et tinmaynan pian nakaibay Katawan odino say panukoy ed ‘imortal a kamarerwa’ so talagan agnatalosan ed kaugalian a sisiaen na DS [Daan a Sipan],” kuan na The Dictionary of Bible and Religion.
6, 7. Anton salita so impatalos a “kamarerwa” ed Kristianon Griegon Kasulatan, tan antoy manunan kabaliksan na sayan salita?
6 Say salitan “kamarerwa” a nipatalos a masulok a sanlasus danay ed Kristianon Griegon Kasulatan (kaslakan a tatawagen a Balon Sipan) et psy·kheʹ. Singa say neʹphesh, sayan salita et mabetbet ya ontutukoy ed intiron persona. Alimbawa, konsideraen paray ontumbok a balikas: ‘Say kamarerwak nagogonigon.’ (Juan 12:27) “Sinmabi so takot ed balang kamarerwa.” (Gawa 2:43) “Ontulok komon so balang kamarerwa ed saray atagtagey a pakauley.” (Roma 13:1) “Ibalap yo so apunaw ed puso [“kamarerwa,” NW].” (1 Tesalonica 5:14) “A nilabanan ed danum, na daiset, salanti walora a katao [“kamarerwa,” NW].”—1 Pedro 3:20.
7 Say psy·kheʹ, a singa met say neʹphesh, so malinlinew ya ontutukoy ed intiron persona. Unong ed iskolar a si Nigel Turner, sayan salita et “mangipapakabaliksan ed no anton talaga so too, say dili, say pisikal a laman a walaan na rûaḥ [espiritu] na Dios ya inlinawa ed satan. . . . Say idadanet et diad intiron dili.”
8. Kasin kakamarerwa iray ayep? Ipaliwawa.
8 Diad Biblia say salitan “kamarerwa” so onaaplika aliwa lambengat ed totoo noagta ontan met ed ayayep. Alimbawa, diad panideskribe ed panamalsa ed saray pinalsa ed dayat, ibabaga na Genesis 1:20, unong ed New World Translation, ya ingganggan na Dios: “Mamawala komon so danudanum na saray langoylangoy a mabilay iran kamarerwa.” Tan diad ontumbok a panamalsan agew, onia so inkuan na Dios: “Say dalin mamapaway na saray pinalsa [“mabilay iran kamarerwa,” NW] ya unong ed nengneng da, saray ayayep ya amo, tan saray korongkorong a bengabengatla, tan saray ayayep ya atap na dalin unong ed nengneng da.” (Genesis 1:24; ikompara so Numeros 31:28.) Kanian, say “kamarerwa” et nayarin ontukoy ed mabilay a pinalsa, balanglan too odino ayep.
Say “Kamarerwa” Bilang say Bilay na Pinalsa
9. (a) Anton apalaknab a kabaliksan so natukoy ed salitan “kamarerwa”? (b) Kasin misumlangan iya ed ideyan say kamarerwa et say toon mismo?
9 No maminsan, say salitan “kamarerwa” et ontutukoy ed bilay a panggagayagaan na sakey a too odino sakey ya ayep. Agsasalatan na saya so impanguker na Biblia ed kamarerwa bilang sakey a persona odino sakey ya ayep. Diad pangiyilustra: Ibabaga tayon say sakey so mabilay, a labay ton ibaga et sikatoy mabilay a persona. Nayarin ikuan tayo met a sikatoy walaan na bilay. Diad parehon dalan, say mabilay a persona so kamarerwa. Ingen, legan a sikatoy mabilay, say “kamarerwa” so nayarin nibaga bilang bengatlan walad sikato.
10. Mangiter na saray alimbawa a mangipapanengneng a say salitan “kamarerwa” et ontutukoy ed bilay a panggagayagaan na too odino ayep.
10 Alimbawa, imbaga na Dios ed si Moises: “Amin a nankaliket ed ipatey mo [“na kamarerwam,” NW] inatey lara.” (Exodo 4:19) Malinew, saray kakabusol nen Moises so nanggunaet a mamatey ed sikato. Say mipadparan usar na salitan “kamarerwa” so naimano ed ontumbok iran balikas. “Masinagem kami a tinmakot nipaakar ed saray bilay [“kamarerwa,” NW] mi.” (Josue 9:24) “Binmatik ira a nipaakar ed bilay [“kamarerwa,” NW] da.” (2 Arari 7:7) “Say maptek a too pablien to so bilay [“kamarerwa,” NW] na ayep to.” (Uliran 12:10) “Say Anak na too . . . linma . . . tan iter to’y bilay [“kamarerwa,” NW] to a panondon ed amayamay.” (Mateo 20:28) “Dawitdawit ya akasabi ed ipapatey, ya inkaatapan to so bilay [“kamarerwa,” NW] to.” (Filipos 2:30) Diad kada kaso, say salitan “kamarerwa” et kabaliksan toy “bilay.”a
11. Antoy nibaga ed impangusar na Biblia ed salitan “kamarerwa”?
11 Kanian say salitan “kamarerwa” unong a nausar ed Biblia et ontutukoy ed too odino ayep odino ed bilay a panggagayagaan na too odino ayep. Say impanguker na Biblia ed kamarerwa et simpli, ag-anguman, tan agnaamper na komplikado iran pilosopiya tan anito na totoo. Balet anto so nagawa ed kamarerwa diad ipatey? Pian naebatan itan a tepet, nepeg tayon unonan talosan no akin ya ompapatey itayo.
[Saray paimano ed leksab]
a Uusaren met na Mateo 10:28 so salitan “kamarerwa” a kabaliksan toy “bilay.”
[Saray litrato ed pahina 20]
Kakamarerwa iran amin