Nidanet Iray Manunan Ideya

SAY epektibon managbasa so aglabat onnengneng ed sinansakey ya estansa, noagta diad labas ni ingen na parapon kawalaan na satan. Sano sikatoy manbabasa, sankanonot to iray manunan ideya a walad interon materyal ya iprepresenta to. Saya so mangimpluensya ed pangidanetan to.

No agnatumbok itan a paraan, anggapo iray punton napabitar ed paliwawa. Anggapo so napalinew. No asumpal la so presentasyon, mairap a tandaan so antokaman a manunan punto.

Mabetbet a baleg so nagawaan na manepeg a pangimano diad pangidanet ed saray manunan ideya pian naparakep so pambasa na sakey a salaysay ed Biblia. Say ontan a danet so makapangarum na kabaliksan diad pambasa ed saray parapo diad panangiyaral na Biblia odino diad miting ed kongregasyon. Tan nagkalalo lan importante sano manpaliwawa manlapud sakey a manuskrito, a singa nagagawa no maminsan ed saray kombension.

No Panon so Panggawa ed Satan. Diad eskuelaan, nayarin napabtangan kan manbasa na sakey a porsyon ed Biblia. Anto so nepeg ya idanet? No wala so manunan ideya odino importantin agawa ya akatibukelan na materyal a basaen mo, matukoy a satan so pabitaren.

Balanglan say porsyon a basaen mo so anlong odino bonikew, uliran odino salaysay, nagunggonaan so dumerengel mo no marakep so pambasam ed satan. (2 Tim. 3:16, 17) Pian nagawaan iya nepeg mon imanoen iray salaysay a basaen mo tan saray dumerengel mo.

No manbasa kan maksil ed sakey a palapagan diad panagaral na Biblia odino diad miting ed kongregasyon, antoray manunan ideya a nakaukolan mon idanet? Konsideraen iray ebat ed saray niprintan tepet ed aaralen bilang saray manunan ideya. Idanet met iray punton misiglaotan ed nipabakat a subtitulo a kawalaan na materyal.

Ag-irerekomenda ya iyugalim so pangusar na manuskrito diad saray paliwawa ed kongregasyon. Anggaman ontan, no maminsan saray manuskrito so nitarya ed arum a paliwawa ed kombension ta pian pareho iran punto so nipresenta a singa met diad amin a kombension. Ta pian nidanet iray manunan ideya na manuskrito, nakaukolan ya unonan usisaen a maong na espiker so materyal. Antoray manunan punto? Nepeg a saraya so nibiig to. Saray manunan punto so aliwan basta ideya a liknaen ton makapainteres. Saratan so manunan punto ya akatibukelan a mismo na materyal. No maminsan et say sinegek a balikas na manunan ideya ed manuskrito so mangiparungtal ed sakey a salaysay odino panagkatunongan. Maslak, nagawa so mabiskeg a balikas kayarin nipresenta so mananuportan ebidensya. Sano sarayan manunan punto so nibiig la, saratan so markaan na managpaliwawa dia ed manuskrito to. Gendagendat et wala labat so pigara, nayari pa lagin ag-onsulok ed apatira odino limara. Ontumbok et nakaukolan ton ipasal so panagbasa ed paraan a saratan so mainomay a nibiig na saray dumerengel. Saraya so pantok na paliwawa. No say materyal so nipaliwawan walaay manepeg ya inkidanet, sarayan manunan ideya so maseguron natandaan. Satan so nepeg a kalat na managpaliwawa.

Walaray nanduruman dalan a nipasabi na managpaliwawa so nakakaukolan a danet pian nibiig na saray dumerengel iray manunan punto. Diad pamitla na pigara, nayarin sikato so mangarum na entusiasmo, manguman ed peles, mangipapuso, odino mangusar na matukoy iran andawes.