Entusiasmo

PABILAYEN na entusiasmo so paliwawa. Anggaman importante so pakawalaan na makaibangat a materyal, say mabilabilay, entusiastikon panagpaliwawa so managyat na imano na saray dumerengel. Anggan antoy binalegan mon kultura odino personalidad, nabayuboan mo so entusiasmo.

Mansalitan Walaan na Liknaan. Sanen mitotongtong ed sakey a Samaritana, imbaga nen Jesus a saramay mandayew ed si Jehova et nepeg dan dayewen “ed espiritu tan katuaan.” (Juan 4:24) Nepeg a say panagdayew da so pinakiwas na maapresyan kapusoan tan mitunosan ed katuaan a naromog ed Salita na Dios. Sano say sakey a too so walaay ontan ya aralem a panamabli, napatnagan itan diad paraan na panagsalita to. Sikato so magunaet a mangitongtong ed arum nipaakar ed saray maaron probisyon nen Jehova. Say ipatnag na lupa to, panag-andawes to, tan boses to so mangipatnag ed peteg a nalilikna to.

Sirin, akin a say sakey a managpaliwawa a mangaaro ed si Jehova tan mananisia ed ibabaga to so nayarin andian na entusiasmo sano mansasalita? Aliwa labat lan magenap so pangiparaan to ed walan ibaga to. Nepeg a sikato so sigpot a masimoon ed tema to, a wadtan so emosyon to. Bilbilang ta sikato so apabtangan a mansalita nipaakar ed dondon bagat nen Jesu-Kristo. Sano sikato lay manpapaliwawa, saray kanonotan to so nepeg a napano, na aliwan labat lan saray detalye, noagta pati apresasyon ed kabaliksan na bagat nen Jesus namparan diad managpaliwawan mismo tan diad saray dumerengel to. Nakaukolan ton liingen so liknaan na pisasalamat to ed si Jehova a Dios tan si Kristo Jesus nipaakar ed sayan makapakelaw a probisyon. Nakaukolan ton nonoten so engranden ilalo ed bilay a nilukas parad katooan​—magnayon a liket ed ayadyarin bunigas diad nipawil a paraison dalin! Sirin nakaukolan ton ipibali so puso to.

Nipaakar ed si eskriban Esdras, sakey a managbangat ed Israel, ibabaga na Biblia ya “imparaan to so puso to pian ontupleg ed ganggan nen Jehova tan gawaen to tan ibangat to ed Israel.” (Esd. 7:10, NW) No ontan met so gawaen tayo​—ya aliwa labat lan say impormasyon so iparaan noagta pati say kapusoan tayo​—masimoon itayon manpaliwawa. Say ontan ya impapuson panangibalikas na katuaan so makatulong na baleg ed saraman so pitotongtongan tayo a mamayubo na peteg a panangaro ed katuaan.

Nonoten Iray Dumerengel Mo. Say sananey ya importantin sengegan diad pangipatnag na entusiasmo et lapud kombiksyon a kaukolan na saray dumerengel mon dengelen so ibagam. Kabaliksan na saya a sano ipaparaan mo so paliwawam et agmo labat la tiponen iray makanakanan materyal noagta ipikasim met so panangiwanwan nen Jehova diad pangusar mo ed satan pian nagunggonaan iramay pangipaliwawaan mo. (Sal. 32:8; Mat. 7:7, 8) Analisaen no akin a kaukolan a dengelen na saray dumerengel mo so impormasyon, no panon iran nagunggonaan, tan no panon mon niparungtal ed paraan ya apresyaen da so kablian to.

Kimeyan moy materyal mo ya anggad naliknam a walay bengatlan makapaliing. Agla nakaukolan a balo so materyal, balet say istilo na pangipaliwawam ed tema so nayarin balo. No mangiparaan ka na bengatlan petepeteg ya ontulong ed saray dumerengel mo pian napabiskeg so relasyon da ed si Jehova, pian pablien da iray probisyon to, pian maaligwas a natalonaan da iray detdet ed bilay diad sayan daan a sistema, odino pian magmaliw ya epektibo ed ministeryo ra, sirin walaan ka na rason a magmaliw ya entusiastiko ed paliwawam.

Anto no say asainmin mo et pambasa ed publiko? Ta pian nagawaan itan ya entusiastiko, mas ni so nakaukolan nen say suston pakapangibaga ed saray salita tan dugan pantetekep na saratan. Aralen so materyal. No basaen mo so sakey a porsyon na Biblia, manggawa na panagsukimat ed satan. Seguroen a natatalosan mo so manunan kabaliksan to. Imanoen no panon a makagunggona ed sika tan ed saray dumerengel mo, tan manbasan tekep na pilalek a nipasabi itan dia ed saraman so ondedengel ed sika.

Kasin manpaparaan ka para ed lawak na ministeryo? Repasoen so temam a singbaten tan saray teksto a ninonot mon usaren. Isipen met no antoray walad kanonotan na totoo. Anto so walan balita? Antoray probleman aarapen da? No akinlongan kan mangipanengneng ed totoo a lugan na Salita na Dios iray solusyon ed mismon probleman pampapagaan da, naliknam so gunaet a manggawa ed satan, diad ontan et onsabin natural so entusiasmo.

Ipanengneng so Entusiasmo Diad Mabilabilay a Panagpaliwawa. Mabitabitar a nipanengneng so entusiasmo diad mabilay a panagpaliwawam. Saya so nepeg a napatnagan ed lupam. Nepeg a sikay kombinsidon maong, aliwan mapasirayew.

Nakaukolan so inkasimbang. Arum et nayarin nasagyat so liknaan da diad antokaman a nibabaga. Nayarin sikaray nakaukolan a natulongan a makamoria a sano say sakey a too et magmaliw lan bombastiko odino masyadon emosyonal, saray dumerengel to so mannonot nipaakar la ed sikato imbes a diad mensahe. Diad biek a dapag, nakaukolan a pasesegen iramay mabaing a manbalikas labat.

Makaalis so entusiasmo. No walaan ka na maabig ya inenengneng ed saray dumerengel tan entusiastiko ka ed paliwawam, nalikna na saray dumerengel mo itan ya entusiasmo. Mabilabilay so panagpaliwawa nen Apolos, tan sikato so adeskribe bilang marunong a managpaliwawa. No sika so marlang lapud espiritu na Dios, say mabilabilay a panagpaliwawam so mamakiwas ed saramay ontatalineng ed sika.​—Gawa 18:24, 25; Roma 12:11.

Entusiasmo a Matukoy ed Materyal. Alwaran mo ompan alablabas tan dirediretso lan entusiastiko so interon paliwawam a kakesawan laingen na saray dumerengel mo. Antokaman a simbawan ibagam a kaukolan a tuloken da unong ed samay nasisingbat et agda la dengelen laingen. Idadanet na saya so pankaukolan na pamparaan pian wala so panduruma ed panagpaliwawam. Panggunaetan ya agmanresulta ed estilo a mangipatnag na inkaambetebetel. No pilien mon maong so materyal mo, pan-interesan mon tuloy itan. Balet walaray punto a mankaukolan na nagkalalon entusiasmo diad panangipaliwawa nen saray arum, tan nepeg a balibali so pitunos na saraya dia ed interon paliwawam.

Nagkalautlan saray manunan punto so ipresentan entusiastiko. Say paliwawam so nepeg a walaan na saray pantok a pangiyapasakeyan mo. Lapud saraya so matalonan punto ed paliwawam, kaslakan et saratan so punton niganan mamakiwas ed saray dumerengel mo. No akombinsim la iray dumerengel mo, nakaukolan mo iran pasesegen, ya ipanengneng ed sikara iray gunggona na panangiyaplika ed nasisingbat. Say inka-entusiasmom et ontulong ed sikan nasabi so kapusoan na saray dumerengel mo. Kaukolan ya agbalot pipiliten a magmaliw a mabilabilay so panagpaliwawa. Wala so nepeg a rason ed satan, tan say materyal mo so mangiter ed sika na satan a rason.