Inkanatural

SAY natural a pangibalikas mo ed inkasikan mismo so manunan kalidad ya ontulong ed sikan makagamor ed kompiyansa na arum. Kasin napanmatalkan mo so imbaga na sakey a mitotongtong ed sika ya akamaskara? Kasin lalo kan makapankompiyansa no say lupa ed maskara so mas guapo nen say dilin lupa na manpapaliwawa? Andi seguro. Kanian imbes a mankunkunwari ka, magmaliw kan natural labat.

Nepeg a nibiig so inkanatural manlapud inka-palpalaran. Say makapuy a gramatika, lingon panangibalikas, tan agnatalosan a panagsalita so aliwan matukoy. Nepeg met a paliisan so slang. Lawas a labay tayon ipatnag so matukoy a dignidad, namparan diad panagsalita tayo tan diad kiwas tayo. Say sakey a mangipatnag na inkanatural so aliwan alablabas a pormal nisay papagaan ton maong no panon ton pandinayewen so arum.

Diad Lawak na Ministeryo. Sano ontoktok ed abung odino onasingger ed sakey diad mapublikon pasen diad gagalan manpulong, kasin nanenerbiyos ka? Maslak ed sikatayo so ontan, balet para ed arum say ontan a liknaan so mapalalo nen saray arum. Say kapapagaan so manggawa ed boses a singa aliwan natural odino manggiwgiw, odino say nerbiyos so nayarin mangipatnag na inkairi-iri na saray lima odino ulo.

Nayarin sayan problema so nasali na sakey a manangipalapag lapud pigaran rason. Nayarin iisipen to so magmaliw ya impresyon da ed sikato odino maniisip no kasin maabig so resulta na presentasyon to. Natural labat itan, balet onlesa so problema no pinonot mon maong iratan. No nanenerbiyos ka sakbay a manpulong, anto so makatulong? Say panagparaan a maong tan masimoon a pampikasi ed si Jehova. (Gawa 4:29) Isipen so nipaakar ed baleg a panangasi nen Jehova diad pangiimbita to ed totoo a panggayagaan so ayadyarin bunigas na laman tan maandon bilay ed Paraiso. Isipen iraman so panggugunaetan mon tulongan tan say pankaukolan dan narengel so maong a balita.

Tandaan met a saray totoo so walaan na kawayangan, kanian nayarin awaten da odino ipulisay da so mensahe. Tua met iya sanen nampulong si Jesus ed Israel nensaman. Say asainmin mo et say basta pampulong. (Mat. 24:14) Anggan sano agka pansalitaen na totoo, say kiwawalam a mismo so mangiter na pantasi. Ontalona ka lapud impausar ka ed si Jehova pian sumpalen so linawa to. Diad saratan ya okasyon a walay pankanawnawam a mansalita, anto so paraan na panagsalitam? No aralen mon iyapasakey so nonot mo ed pankaukolan na arum, say panagsalitam so makapasagyat tan natural.

Sano manpupulong, no sika so onkiwas tan mansalita a singa gagawaen mo ed agew-agew, saray dumerengel mo so relaks. Nayarin lalon maawat nira ingen ed Makasulatan iran punto a kaliktan mon inabang ed sikara. Imbes a singam ira papaliwawaan, mitongtong ed sikara. Magmaliw a makaaro. Ipanengneng so interes ed sikara, tan dengel moy ibabaga ra. Siempre, no say lenguahe odino lokal a kultura so mankakaukolan na ugalin totontonen pian ipanengneng so respeto sano mitotongtong ed saray estranghero, kaukolan mon tumboken iraya. Balet nayarian moy magmaliw a lawas akaparaan tekep na balibalin imis.

Diad Plataporma. Maslak et sankaabigan so natural tan estilo na singa mitotongtong labat a panagpaliwawa sano mansalita ka ed sakey a grupo. Siempre, no dakerakel so dumerengel, kaukolan mon ikasil so boses mo. No salien mon ipatlep so paliwawam odino no detalyadon tuloy iray notam, nayarin mapagpaga ka la no panon so dugarugan pangibaga. Importante so matukoy a panangisalita, balet no piimanom lan maong itan, magmaliw lan serseryoso tan porpormal so panagpaliwawam. Nabalang so inkanatural. Nepeg ya unona lan nonoten a maalwar iray ideyam, balet imanoen mon maong iray ideya, aliwan say eksakton isalita.

Tua met iya sano sika so iinterbioen ed miting. Manparaan kan maong, balet agmo babasaen odino ipapatlep iray ebat mo. Ipaliwawam iratan diad natural a modulasyon ta pian saray komentom so makapasagyat met la’d satan.

Anggan saray balibalin kalidad na panagpaliwawa so nayarin ipasen na saray dumerengel ya aliwan natural no alablabas itan. Alimbawa, nepeg a sika so mansalitan mabitar tan mangusar na manepeg a panangibalikas balet ta agsosobraan a magmaliw la laingen a porpormal odino artipisyal so panagsalitam. Saray empatiko odino deskriptibon panag-andawes, sano maabig a nagawaan, et pabilayen to so paliwawam, balet no kulkulang odino alablabas, mangisuawi itan ed ibabagam. Mangusar na kabkaabigan a kasil a boses, balet agmo kapakasilen. Maabig a sagpaminsan et ikdan mo na entusiasmo so panagpaliwawam, balet paliisan moy pagmaliw a bombastiko. Say modulasyon, entusiasmo, tan petang na liknaan so nepeg ya usaren ya amin diad paraan ya agmangipaimano ed inkasika odino pakaalipanesan na saray dumerengel mo.

Arum a totoo so walaan na natural a paraan ed panangibalikas da ed inkasikara, anggan sano ag-ira manpapaliwawa. Bangta say arum so lalon singa labat la mitotongtong ed panagsalita ra. Say importantin bengatla et say maabig a pansalita ed agew-agew tan manugali kan walaay dignidad bilang Kristiano. Insan no wala ka la’d plataporma, sika so lalon akaparaan a mansalita tan onkiwas tekep na makapasagyat ya inkanatural.

Sano Manbabasa ed Publiko. Say inkanatural ed panagbasa ed publiko so mankaukolan na sagpot. Pian nagawaan itan, ibiig iray manunan ideya ed materyal a basaen mo, tan imanoen no panon so inkatibukel na saraya. Nodnonoten iraya; tano andi, bastam labat la basaen iray salita. Usisaen so panangibalikas ed saray agkabisadon salita. Ipasal so pambasan maksil ta pian naala so manepeg a pananguman na boses tan pian napanuulop mo iray salita ed paraan a malinew a mangipasabi ed saray punto. Ulit-uliten itan a gawaen ya anggad say panagbasam so marmarlas la. Amtaen a maong so materyal pian sano basaen mon maksil, say panagbasam so singa mabilabilay a pitotongtong. Satan so inkanatural.

Maseguron maslak a panagbasa tayo ed publiko so manlapud saray nibase ed Biblian publikasyon. Niarum ed saray babasaen ya asainmin ed Teokratikon Eskuelaan Parad Ministeryo, babasaen tayoray teksto sano manpupulong tan sano manpapaliwawa itayo ed plataporma. Saray agagin lalaki so napabtangan a manbasa ed materyal a singbaten ed Panagaral ed Panag-Bantayan tan diad Panagaral na Kongregasyon ed Libro. Arum a kualipikadon agagin lalaki so makakaawat na saray asainmin a mamasa na saray manuskrito diad saray dumerengel ed kombension. Balanglan basaen mo so Biblia odino arum a materyal, basam iray porsyon a walaan na saray marka na kotasyon diad paraan a mamabilay ed materyal. No pigaran totoo so inaon, uman moy daiset so boses mo ed kada inaon. Pasakbay: Agka alablabas a dramatiko, balet ta pabilay mo so panagbasam ed natural a paraan.

Say pambasan natural et singa mitotongtong labat. Aliwan artipisyal so panagbasa noagta walaan na kombiksyon.