Singa Mitotongtong Labat a Paraan

KASLAKAN a relaks so totoo sano mitotongtong ira ed kakaaro. Saray balikas da so natural. Arum ya indibidual so maligligsa; arum so agmasmasel. Anggaman ontan, say inkanatural na ontan a panagsalita so makapasagyat.

Balet, sano mitongtong ed sakey ya estranghero, aliwan matukoy so pansalitan singam la kabkabat odino masyadon impormal. Diad tua, diad arum a kultura et amin a pitotongtong ed saray estranghero so onggapo diad porpormal a paraan. Kayarin nipanengneng so manepeg a respeto, insan, tekep na pakatebek et magmaong no usaren so aliwan tanton pormal a lenguahe tan say lalon singa mitotongtong labat a paraan.

Sano mansalita ed plataporma, nepeg met a manalwar ka. Say paraan a masyadon impormal so mamaandi ed dignidad na Kristianon miting tan say belat na samay ibabaga. Diad arum iran lenguahe, walaray kakaukolanen a balikas sano mitotongtong ed sakey a mas maedad a too, ed maestro, ed opisyal, odino ed sakey ya ateng. (Imanoen iray terminon nausar ed Gawa 7:2 tan 13:16.) Duma iran balikas so usaren sano mitotongtong ed asawa odino ed maapit a kaaro. Anggaman say paraan na pansalita tayo ed plataporma so agkaukolan a porpormal, nepeg a satan so magalang.

Anggaman ontan, wala ra so nayarin sengegan na paliwawa na sakey a toon ompatnag ya aliwan masalita odino porpormal. Sakey ed saraya et say inkatibukel na estansa, odino inkatibukel na balikas. Onlesa so problema sano salien na mansasalita ya uliten iray balikas ya eksakto a singa walad inimprinta. Kaslakan et duman tuloy so insulat a salita manlapud say insangin salita. Tua, say pansukimat diad panparaan na sakey a paliwawa so kaslakan a gagawaen diad pangusar ed impalapag a materyal. Nayarin walay nitaryan inimprintan outline a pangibasiyan na paliwawa. Balet no ibalikas moray punton eksakto ed samay wala ed inimprinta odino direktan basaen iratan ed impalapag ya outline legan na paliwawam, seguradon say paliwawam so aliwan diad paraan a mitotongtong labat. Pian napansiansia so estilon singa mitotongtong labat, ibalikas iray punto ed dilin salitam tan paliisan so komplikadon inkatibukel na estansa.

Sananey nin sengegan et say panduruma na kapeles. Say paliwawan masyadon pormal so mabetbet a manasaglawi ed kibalikas na saray salitan pareparehoy inkaalasir tan apasakey a kapeles. Diad normal a pitotongtong, walaray pananguman ed kapeles tan mabetbet ya itutunda diad nanduruman karurukey.

Siempre, sano mansasalita ed dakel a dumerengel, kaukolan a say estilo na panagsalitan singa mitotongtong labat so aruman na kasil, biskeg, tan entusiasmo ta pian naala so imano ra.

Pian nagawaay singa mitotongtong labat a paraan a matukoy parad ministeryo, kaukolan mon iyugali so pansalitan maabig a kada agew. Agkabaliksan na saya a nepeg ya atagey so aral mo. Balet maabig so pamayubo na saray ugali ed panagsalita a mamakiwas ed arum ya ondengel ed ibabagam. Diad pannonot ed satan, konsideraen no kasin kaukolan mon pankimeyan iray onggendan a punto diad ordinaryon pitotongtong mo.

1. Paliisan iray balikas a mabitabitar a sumlang ed maabig a gramatika odino ompatnag ya ipara to ka ed totoon say kabibilay da so mangibabaliwala ed maridios iran estandarte. Mitunosan ed simbawa na Colosas 3:8, paliisan so salitan magasal odino makapasakit. Diad biek a dapag, aliwan makapuy so kaslakan tan ordinaryon panagsalita. Saray kaslakan, odino ordinaryon balbalikas, so aliwan pormal, balet ta ontukoy ira ed aaksobien iran estandarte ed panagsalita.

2. Paliisan so naynay a pangulit ed saray parehon balikas tan tugyop na salsalita pian ipasabi so kada duman puntom. Aralen ya usaren iray salitan malinew a mangibalikas ed labay mon ibaga.

3. Paliisan so agnakakaukolan a panangulit ed kapkapangibagam diad pannonot mon maong ed labay mon ibaga; insan la mansalita.

4. Paliisan a nabalang iray maabig a punto diad dakerakel iran salita. Ipasal ya isalitan malinew ed simplin estansa so punton nakaukolan a natandaan.

5. Mansalita diad paraan a mangipatnag na respeto ed arum.