Epektibon Konklusyon

NAYARIN sinukimat tan inorganisam a maong so materyal para ed lugan na paliwawam. Nayarin imparaan mo met la so makapasagyat-interes ya introduksion. Ingen, wala ni so bengatlan nakaukolan​—say epektibon konklusyon. Agmo ibabaliwala so kaimportantian na satan. Say unor ya imbagam so mabetbet a natandaan a mabayag. No aliwan mapuersa so konklusyon, anggan say materyal a nipresenta la so nayarin magmaliw ya aliwan epektibo.

Imanoen so onggendan: Diad pansampo-sampot la na bilay to, inter nen Josue so makatantandan paliwawa ed saray mamasiken ed nasyon na Israel. Kayari na impangiyosa-osa to ed impideneng nen Jehova ed Israel nanlapulad saray agew nen Abraham, kasin basta labat inulit ya imbaga nen Josue iray manunan punto diad nengneng na sumaryo? Andi. Imbes, tekep na aralem a liknaan et binilin toray totoo: “Ontakot kayo ed Jehova, tan manlingkor kayo ed sikato ed maralus tan dia ed katuaan.” Basam a mismo so konklusyon nen Josue, a nikurit diad Josue 24:14, 15.

Sananey nin makatantandan paliwawa, a naromog ed Gawa 2:14-36, so inter nen apostol Pedro ed sakey ya ulop ed Jerusalem diad samay Piesta na Pentecostes 33 K.P. Unona et impaliwawa ton atasian da so kasumpalan na propesiya nen Joel nipaakar ed kikalbo na espiritu na Dios. Insan to impabitar so pisiglaotan na saray Mesianikon propesiya ed Salmos, ya angipasakbay ed kioli nen Jesu-Kristo tan say kitandoro to ed nikawanan na Dios. Insan, diad konklusyon to, mabitabitar ya imbaga nen Pedro so salisalan a nakaukolan ya arapen na amin ya ondedengel ed sikato. Inkuanto: “Sirin naamtaan komon a peteg na amin ya abung na Israel a sikato so ginawa na Dios a Katawan tan Kristo, iyan Jesus ya impasak yo.” Intepet na saramay wadman: “Lalaki, agagi, anto so gawaen mi?” Inmebat si Pedro: “Magbabawi kayo, tan balang sakey komon ed sikayo so nabautismoan ed ngaran nen Jesu-Kristo.” (Gawa 2:37, 38, NW) Diad saman ya agew et ngalngalin 3,000 a totoo ed dumerengel to, ya apakiwas a tuloy ed nadngel da, so angawat ed katuaan nipaakar ed si Jesu-Kristo.

Saray Punton Lawas Nonoten. Say ibagam ed konklusyon mo so nepeg a direktan misiglaotan ed tema na paliwawam. Nepeg ya ontumbok itan bilang lohikal a konklusyon ed saray manunan punton tinibukel mo. Anggaman nayarin labay mon ilaktip so pigara ed saray manunan salita a walad temam, say direktan pangibaga lamet ed satan so wala la ed sika.

Gendagendat, say gagalam ed pampaliwawa et pian pasesegen so arum ya onkiwas base ed impormasyon ya ipresentam. Sakey ed saray manunan gagala na konklusyon et say pangipanengneng ed sikara no anto so gawaen da. Sano pinilim so temam tan saray manunan punto, kasin kinonsideram a maong no akin a say materyal so importante ed saray dumerengel mo tan no anto so gagalam diad pangipaliwawa ed satan? No ontan, antam so kiwas a labay mon gawaen da. Natan et kaukolan mon isalaysay no anto itan a kiwas tan no panon dan gawaen itan.

Niarum ed pangipanengneng ed saray dumerengel mo no anto so gawaen da, say konklusyon mo so nepeg a manamakiwas. Kaukolan na satan so pangilaktip ed saray matukoy a rason diad ikiwas tan say nayarin gunggonan nagamoran diad panggawa na ontan. No say unor ya estansa so inisip a maong tan atibukel a maong iran balikas, pabiskegen to so inkaepektibo na interon paliwawam.

Nonoten a say paliwawa et sasampotan la. Say ibagam so nepeg a mangipatnag ed satan. Say kapeles mo so nepeg met a matukoy. Agka mansasalitan mapmaples ya anggad sampot insan ka biglan ontunda. Diad biek a dapag, agmo pakakalnaen so boses mo. Say kakasil na boses mo so nepeg a magenap balet aliwan alablabas. Saray unor a pigaran estansam so mangipaimano na panampot la. Say pangibagam ed saratan so nepeg a mangipasabi na inkasimoon tan kombiksyon. Sano ipaparaan moy pampaliwawam, agmo sasaewen ya ipasal met so konklusyon mo.

Panon karukey so konklusyon? Satan so aglabat determinaen ed espesipikon karukey na oras. Say konklusyon so agnepeg ya ontantan. Say inkamatukoy na karukey to so nadetermina diad epekto to ed saray dumerengel. Say simple, direkta, positibon konklusyon so naynay a naapresya. Say andukdukey a konklusyon a walaan na antikey ya ilustrasyon so nayari met ya epektibo no niplanon maong. Pankomparaen so antikey a konklusyon ed interon libro na Eclesiastes, a naromog ed Eclesiastes 12:13, 14, tan samay mas antikey a Sermon ed Palandey, a nikurit ed Mateo 7:24-27.

Diad Lawak na Ministeryo. Diad lawak na ministeryo labat ya ontanlan kabetbet so pankaukolan mo ed saray konklusyon. Tekep na panagparaan tan maaron interes ed totoo, dakel so nagawaan mon maabig. Say konsehon nidatak ed akauna iran pahina so nayarin makagunggonan niyaplika ingen sano iyadapta ed pitongtong mo ed unabung.

Nayarin antiktikey so tongtongan. Nayarin okupado so too. Say imbisitam so nayarin ombayag labat na sakey a minuto. No matukoy, nayarin ibagam so singa saya: “Natalosan kon sika so okupado. Balet itilakan ta ka pa na sakey a makapaseseg a nonoten. Ipapanengneng na Biblia a say Manamalsa tayo so walaan na alay abig a gagala​—a gawaen iyan dalin a pasen a ditan et napanggayagaan na too so bilay ya andi-anggaan. Nayarian tayoy manayam ed satan a Paraiso, balet kaukolan tayon aralen iray nakakaukolan na Dios.” Odino nayarin basta iyopresi so ipawil ed kombenientin panaon.

No apaer so indalaw lapud pabigla-bigla so unabung​—mapasang ni ingen—​siansian nagawaan so baleg a kaabigan. Lawas nonoten so konsehon naromog ed Mateo 10:12, 13 tan Roma 12:17, 18. Say maulimek ya ebat mo so nayarin manguman ed panmoria to ed saray Tastasi nen Jehova. Maabig itan a nagawaan.

Diad biek a dapag, nayarin nawalaan ka na makapnek a pitotongtong ed unabung. Akin ya agmo uliten ya ibaga so manunan punto a labay mon natandaan to? Mangilaktip na makapakiwas a punto pian sikato so manggawa na bengatla nipaakar ed satan.

No naimanom a wala so pankanawnawa para ed nagkalalo nin tongtongan ed arum a panaon, ikdan so too na rason pian talaranan to itan. Mangitepet​—nayarin samay sakey ya asingbat ed Reasoning From the Scriptures odino publikasyon a nigana parad panangikondukta na panangiyaral na Biblia ed abung. Lawas nonoten so kalat mo, a singa indatak nen Jesus tan nikurit diad Mateo 28:19, 20.

Kasin sasampotan mo so sakey a panangiyaral ed Biblia? Say pangulit ed tema so ontulong ed iyaaralan pian natandaan to so walan asingbat. Say pangusar ed repaso iran tepet so ontulong ed kipaslep na saray manunan punto ed nonot na iyaaralan, nagkalautla no say ontan a panagrepaso et aggaganatan. Say tepet nipaakar ed no panon a say materyal ya inaral so mangunggona ed iyaaralan odino no panon ton inabang itan ed arum so ontulong ed sikaton mannonot ed praktikal a pakausaran na naaralan to.​—Uli. 4:7.

Tandaan​—say konklusyon mo so mangimpluensya ed inkaepektibo na interon siningbat mo.