Susto ed Oras, Dugan Inkaapag

ANGGAMAN say manunan ipupurek et say kalidad na panagbangat mo, say nigeter ya oras na paliwawam so kaukolan met ya imanoen. Saray miting tayo so aka-eskedyul ya onggapo tan manampot ed espesipikon oras. Pian nagawaan iya et kaukolan so kooperasyon na siopaman a walaan na parte ed programa.

Diad panaon na Biblia, say panmoria na totoo ed bilay so miduma ed no anto itan diad dakel a pasen natan. Asalambit so oras ed saray terminon “mikatlo ya oras” odino “asingger la a komaplo so oras.” (Mat. 20:3-6; Juan 1:39) Mataltalag a walay sengegan na kapagaan nipaakar ed dugan oras na inagew-agew iran kimey. Diad arum a parte na mundo natan, wala so miparan panmoria ed oras.

Balet, anggaman say lokal a kustombre odino say personal a panlabay nipaakar ed oras so nayarin agtanto lilimengen na totoo, nagunggonaan itayo diad pakaaral a mangimano ed satan. No pigaran totoo so apabtangan na parte ed sakey a programa, kaukolan ya ikonsidera so oras a nigeter ed kada parte. Say prinsipyon “nagawa komon so sarayan amin ed kasimpitan tan mauksoy” so maabig ya iyaplika ed oras na saray asainmin tayo ed miting.​—1 Cor. 14:40.

Pakadampot ed Dugan Oras. Panagparaan so tombok. Kaslakan, saray managpaliwawan agmakatumbok ed nigeter ya oras so agnamparaan na susto. Nayarin makompiyansa iran maong. Odino nayarin basta ipalpaleen day panagparaan ya anggad kalimbuatan la. Say manunan basiyan parad dugan oras et say pakawalaan na apresasyon ed asainmin mo tan say inkamabulos a pamparaan a maong.

Kasin say asainmin mo et manbasa? Unona, repasoen so Aralen 4 ya anggad 7, a manasaglawi ed inkamarlas, panangitunda-tunda, panangidanet ed punto, tan pangidanet ed saray manunan ideya. Insan, iyaplika itan a konseho legan a basaen mon maksil so materyal a nipabtang ed sika. Orasan moy inkasika. Kasin kaukolan mon basaen a mamaples ta pian nasumpal mo ed inggeter ya oras? Pelesan mo ed saray partin aliwan tanton importante, balet itultuloy so panangitunda-tunda tan medyo tantanan pian idanet iray importantin ideya. Ipasal a maminpigapiga. Legan ya onaaligwas so inkamarlas mo, magmainomay mo lan tumboken so inggeter ya oras mo.

Kasin mansalita ka a walay notam? Agkaukolan a detalyadon maong iray notam—​a singa la sakey a manuskrito​—pian naseguro so dugan oras. No kikimeyan so Aralen 25, naaral mo so magmaong a paraan. Lawas nonoten irayan limaran punto: (1) Mangiparaan na maabig a materyal, balet aliwan dakerakel a tuloy. (2) Palinewen ed nonot iray manunan ideya, balet ag-ipapatlep iray interon estansa. (3) Imarkam ed outline mo so karukey na oras a ninonot mon usaren ed kada parte na paliwawam odino no panon karakel na oras so onlabas no nakobrian mo iray pigaran punto. (4) No manpaparaan, konsideraen no dinan iran detalye so nayarin ekalen no naimanom ya onlampas ka la ed oras. (5) Ipasal moy panagpaliwawam.

Importante so panagpasal. Legan kan manpapasal, imanom so oras na kada seksion na paliwawam. Ipasal mon maminpiga so paliwawam ya anggad say interon paliwawam so onsusto la ed nipabtang ya oras. Agmo sasalien a kobrian so dakerakel a materyal. Palubaan mo so inkasika lapud say panpaliwawam ed arap na dakel a dumerengel so nayarin ondukey na daiset nen say nen manpapasal kan bukor.

Pangapag-apag ed Saray Parte. Say dugan oras so maapit a misiglaotan ed suston pangapag-apag ed saray parte na sakey a paliwawa. Maslak ed oras so usaren diad pangipaliwawa ed interon lugan na paliwawa. Ditan so kawalaan na saray manunan punton ibangat. Nepeg a duga labat so karukey na introduksion diad panumpal ed taloran gagalan asingbat ed Aralen 38. Nepeg ya aliwan masyadon andukey so lugan na paliwawa ya anggapo la so magenap ya oras para ed epektibon konklusyon, a mitukoyan ed Aralen 39.

Saray sagpot mo diad pangemtan na dugan oras so mansumpal ed magmaong a paliwawa tan mangipanengneng na respetom ed arum a walaan na parte ed programa tan ontan met ed interon kongregasyon.