Tepet

◼ Panon tayon naseguro a nasumpal ed dugan oras iray miting ed kongregasyon?

Mapmaples ya onlabas so oras sano manginanabang itayo na maabig a bengatla ed kakaaro. Kanian, walay kairapan na pangasikaso ed saray parte na miting diad loob na niganan oras. Anto so makatulong?

Onggapo ed suston oras. Sano mantitipon so interon kongregasyon, makatulong no payurongen la iray dumerengel, sakey odino duaran minuto antis ya onggapo so programa ta pian nigapo so miting ed nidesignan oras diad mauksoy a paraan. (Ecl. 3:1) Nepeg a saray miting parad angkelag iran grupo, a singa saray miting ed lawak na kimeyan, so agla iyaalagar ed saraman so nayarin onsabin atrasado.

Manparaan a maong. Say masakbay a panagparaan et sakey a paraan pian nadampot so dugan oras. Lawas nonoten so gagala na asainmin. Amtaen iray manunan punto, tan saratan so idanet. Paliisan so kisuawi ed saray angkelag a detalye. Pansiansiaen a simpli so presentasyon. No kabiangan ed parte iray demostrasyon odino saray interbio, ipasal iratan a masakbay. No nayadyari, orasan moy partim legan mon ipapasal itan a maksil.

Apag-apagen so materyal mo. Balanglan say asainmin mo et paliwawa odino diskusyon a kaiba iray dumerengel, nayarin makatulong no apag-apagen mo so materyal ed pigaran seksion. Desidien no pigaran minuto so usaren mo ed kada seksion, tan isulat itan ed margin na saray notam. Insan imanoen so oras mo legan na panpapaliwawam. Diad sakey a diskusyon a kaiba iray dumerengel, paliisan so pakasagyat a pankomento na andukerukey diad introduksion a pansengegan itan na pan-apuram ed mas importantin materyal a walad saginonor. Nepeg a saray mangikokondukta na Panagaral na Panag-Bantayan so mangilaem na oras ed pangonsidera ed kahon a parad repaso diad kaunoran. Sikaray manalwar met ya agmanguusar ed oras a nigana parad pansaran kanta tan pikakasi.

Sampotan ed suston oras. No tugyopen na pigaran parte so sakey a miting, singa say Service Meeting, nepeg a sinononot so kada espiker ed no kapigan onggapo tan manampot so parte to. Antoy nayarin gawaen no onlalampas la ed oras so miting? Nayarin say sakey odino duara a walaan na parte so mamatikey ed oras da diad pangiyapasakey ed saray manunan punto tan pamawas ed arum a detalye. Say abilidad a panggawa ed satan so pakapatnagan na sakey ya onsianon managbangat.

Bilang dumerengel, makatulong itayo ed agin mangikokondukta diad pankomento na antikey tan direkta ed punto. Amin tayo sirin so walaan na betang ed pakagawa na saray miting diad “kasimpitan tan mauksoy.”​—1 Cor. 14:40.