Saray Instruksion Parad Saramay Walaan na Parte ed Pantitipon Parad Panagserbi
Manlapud sayan isyu na Ministeryo Tayo ed Panarian, saray instruksion ya usaren ed eskedyul na Pantitipon Parad Panagserbi et pasimplien. Saray onggendan ya instruksion tan panonot et mangipaliwawa tan mangipalinew ed lugan na artikulon “Panon Tayon Manparaan Parad Pantitipon Parad Panagserbi,” a walad Mayo 2009 a Ministeryo Tayo ed Panarian.
◼ Paliwawa: Tutukoyen na saya so sakey a paliwawa a nibase ed niasain a materyal ya agmibiang iray dumerengel. Nakaukolan ya ipabitar na espiker iray bengatlan makatulong ed kongregasyon.
◼ Tepet tan ebat: Singa iya Panagaral na Panag-Bantayan, ingen ta antikey labat so introduksion tan konklusyon na saya, tan walaray tepet parad amin a parapo. Nepeg a paliisan na mangidadaulo so pankomentoy alablabas. Nayarin basaen iray teksto a mangidadanet ed punto no iyabuloy na panaon. Agnepeg a basaen iray parapo likud labat no walay instruksion a basaen itan.
◼ Paliwawa a Mankomentoy Dumerengel: Sakey iyan paliwawa a mibiang iray dumerengel. Aliwa labat iyan basta paliwawa, nisay tepet tan ebat.
◼ Demostrasyon tan interbio: Say instruksion ya idemostra et kabaliksan ton responsabilidad na samay agi ya akanbetang so pangilaktip na demostrasyon; balet aliwan sikato a mismo so manggawa ed satan. Saray ikdan to na parte et nakaukolan a kualipikado tan napanuliranan, tan no posible et ibaga to itan ed sikara a masakbay. Mas maabig no agni uusaren a mangidemostra na sakey a bengatla iray balo tan agni eksperiensyadon manangipalapag pian labat naikdan iray pankanawnawan nawalaan na betang. Anggaman ontan, nayari met ya usaren so arum bilang householder. Ag-ibebeneg na saramay walaan na parte ed demostrasyon iray dumerengel. Saramay interbioen et nepeg ya onla’d stage pian diman da ebatan iray tepet, aliwan diad mismon yurongan da. Nakaukolan ya i-rehearse iramay walaan na parte ed demostrasyon tan interbio. No dagdaiset lan oras so nakekeraan ed betang na agi tan nakaukolan ton patikeyay parte to, paliisan toy pangansela ed saray demostrasyon odino interbio. Nepeg a mantepet nin unona iray ministeryal a lingkor ed coordinator na ulop na mamatatken odino diad arum nin matatken antis iran manpili na saray ikdan da na parte.
No say sakey a parte et walaan na espisipikon instruksion, maalwar iratan a tumboken. Makatulong iray agagi pian ‘nagawa diad masimpit tan mauksoy a paraan’ so Pantitipon Parad Panagserbi no saray parte ra et nipresenta base ed sarayan instruksion.—1 Cor. 14:40.