‘Aliwa Ta a Saya so Pangamta ed Siak?’

1, 2. Akin ya agmakabat so impangigapo nen Joacim ed proyekto to?

SI Arin Joacim so manpapaalagey na abung, sakey a palasyo, a walaan na maaawang a kuarto tan ag-onabeba’d duaran grado. Angkakabaleg iray bintana pian onloob so sinag na agew tan preskon dagem, diad ontan et lanang a komportable so ari tan say pamilya to. Saray dingding et latopan na ambalingit a tablan sedro a nanlapud Lebanon. Say loob et pintaan na bermellon a nanlapu ni’d sananey a bansa, a say inkabalanga na satan et labalabay na saray maimpluensya tan manuley ed arum a pasen.​—Jer. 22:13, 14.

² Magastos itan a proyekto. Diad saman et nauupot lay pundo na bansa, nayarin lapud gagastosen ed panangidepensa’d nasyon tan panagbuis ed Ehipto. (2 Ara. 23:33-35) Balet akaromog si Joacim na paraan pian nasumpal toy balon palasyo to. Agto sinueldoan iray trabahador to! Impasen to iran singa aripen, a say linget tan sagpot da so ginawa ton kontribusyon ed pananguley to.

3. Antoy pidumaan nen Joacim ed ama to, tan akin?

³ Diad panamegley nen Jeremias, kinondena na Dios si Joacim lapud sikatoy makasarili.a Impanonot to’d ari so agaylan inkamapangasi tan inkamabunlok na ama ton si Arin Josias ed saray komikimey tan mairap-bilay. Indepensa ni ingen nen Josias iray kaso da ed korte. Pian ipaimano nen Jehova ed si Joacim so panangabagey nen Josias parad ordinaryon totoo, oniay intepet to: ‘Aliwa ta a saya so pangamta ed siak?’​—Basaen so Jeremias 22:15, 16.

4. Akin ya importante a kabaten mo si Jehova?

⁴ Legan ya onuuges iyan mundo nen Satanas, kaukolan tayoy tulong tan proteksion nen Jehova ya iiter to’d saramay makankabat a maong ed sikato. Kanian, nepeg a lalo tayon onapit ed Dios. Kaukolan tayo met ya aligen iray maabig a kualidad to pian epektibo tayon nipulong so maong a balita. Balet, nayarin isipen mo, ‘Panon a nakabat a maong na sakey a Kristiano si Jehova a singa ed ginawa nen Arin Josias?’

NO ANTOY KABALIKSAN NA PANGAMTA ED DIOS

5, 6. (a) Panon a naimpluensyaan na maong ya ama iray anak to? (b) Midumaan ed inkiwas nen Joacim, antoy nepeg ya ikiwas tayo diad pakaamta ed saray pidedeneng nen Jehova?

⁵ Isipen pa no panon a naimpluensyaan na maong ya ama iray anak to. Singa bilang, no naoobserbaan da a sikatoy maiter ed saray mairap-bilay, nayarin magmaliw met iran mabunlok. No nanenengneng da so maaro tan marespeton panagtrato to’d ina ra, nayarin magmaliw iran makonsidera ed saray agda kaparay sekso. No kabkabat so ama ra ya anggapoy papaboran to tan matua no nipaakar ed kuarta, magmaliw met iran ontan. Kanian, no naamtaan na saratan ya ugugaw iray kualidad tan pidedeneng na ama ra, nayarin diad ibaleg da et labay dan tratoen met so arum a singa gagawaen na ama ra.

⁶ Mipadpara, say sakey a Kristianon kabkabat toy Jehova a singa si Josias et agto labat bibidbiren a Sikatoy Soberano ed Uniberso. Diad pambabasa na sakey a Kristiano ed Biblia, naaamtaan toy pidedeneng na Dios ed arum, insan napakiwas a mangalig ed mangatatawen ya Ama to. Onaralem so panangaro to’d si Jehova diad inagew-agew a pandadalepdep to ed saray labay tan aglabay na Dios. Midumaan, say toon mangibabaliwala ed saray ganggan tan panonot na Dios, ya agbalot paiwawanwan ed Sikato, et agto nakakabat so tuan Dios. Sikatoy kapara nen Joacim, ya impool toy lukot ya akasulatay mensahe nen Jehova panamegley nen Jeremias.​—Basaen so Jeremias 36:21-24.

7. Akin a nepeg mon kabaten si Jehova a singa ginawa nen Arin Josias?

⁷ Say italona tayo ed sagradon serbisyo tan pambilay ed balon mundo et akadepende ed kinaaralem na pikakabat tayo’d si Jehova. (Jer. 9:24) Usisaen tayo pay pigara ed saray kualidad na Dios a niparungtal ed saray sulat nen Jeremias. Legan mon gagawaen iya, anap mo iray paraan a nakabat tan naalig moy Dios, a singa ginawa nen Arin Josias.

‘SAY MAARON-KAABIGAN TO MANSIANSIA ED ANDO LAN ANDO’

8. Anto so maaron-kaabigan?

⁸ Diad dakel a lenguahe et mairap so pakalmo na salitan mangipasabi’d eksakton kabaliksan na termino parad maaron-kaabigan odino matoor ya aro, a sakey ed saray kualidad na Dios. Unong ed sakey a diksionaryo na Biblia, say Hebreon termino parad saya et manutukoy ed pantetekep na biskeg, inkapekder, tan aro. Intuloy nin inkuan na satan: “Antokaman a pangipatalos ed sayan salita ya agto nilaktip iratan a talo so agmangipasabi’d eksakton kabaliksan na satan.” Kanian, aliwa labat a maong a too imay walaan na maaron-kaabigan. Sikatoy walaan na aralem a panangiyansakit ed arum, a gagawaen toy anggaay nayarian ton tulongan ira ed saray pankaukolan da, nagkalautla ed espiritual. Say manunan rason ed pansasakripisyo to et say pilalek ton paliketen so Makapanyarin-amin a Dios.

9. Anto so papaneknekan na impideneng nen Jehova ed Israel?

⁹ Say sankaabigan a paraan pian natalosan a maong so balikas ed Biblia a “maaron-kaabigan” et diad panaral no panon ya akidenengan na Dios iray tuan managdayew to manlapu la nensaman. Sinalimbengan tan pinakan nen Jehova iray Israelita legan na 40 taon a wala ra’d kalawakan. Diad Insipan a Dalin, anuroy Dios na saray ukom a mangiliktar ed sikara manlapud saray kalaban da tan mangipawil ed sikara ed tuan panagdayew. Lapud ag-ira pinaulyan nen Jehova ed saraman a nilasus taon, diad mainawa tan mairap a panaon, nayarian ton ibaga ed nasyon: “Sika aroen ta ka ed maando a panangaro: kanian lapu ed maaro ya abig na linawa [“maaron-kaabigan,” NW] inyasingger ta ka.”​—Jer. 31:3.b

10. Panon ya ipapanengneng nen Jehova so maaron-kaabigan diad idedengel to ed saray pikakasi, a singa ginawa to ed saray Judion walad Babilonia?

¹⁰ Natan et siansia nin ipapanengneng na Dios so maaron-kaabigan a mangugunggona ed saray managdayew to. Singa bilang, diad panagpikasi. Dedengelen nen Jehova so amin a masimoon a pikakasi, balet nagkalalo la iray pikakasi na dedikadon lingkor to. Anggano pigay taon tayo lan ipipikasi so apasakey tan seryoso iran problema, sikatoy maan-anos nin siansia ed sikatayo tan ag-onsawan ondengel ed saray pikakasi tayo. Aminsan et imbaki nen Jehova si Jeremias pian mangipasabi na mensahe ed grupo na saray Judion inyakar ed Babilonia. Masulok a 800 kilometro so distansia ra ed templo, ya arawdawi ed pamilya tan kakaaro ran walad Juda. Balet, anggano ontan lay kaarawi ra’d templo, siansia nin dinengel nen Jehova iray kerew da parad panangabobon to tan saray panangidayew da. Nipaakar ed masimoon iran pikakasim, nonoten pay impakaligliwa na saray Judio sanen nadngel da iray salita na Dios, a walad Jeremias 29:10-12.​—Basaen.

11, 12. (a) Antoy insipan nen Jehova ed saray totoo’d Jerusalem? (b) Panon a say sakey ya akaawat na nakakaukolan a disiplina et natulongan?

¹¹ Say positibon panmoria nen Jehova so sakey nin pakapatnagan na maaron-kaabigan to. Legan a manasingger lay kaderal na Jerusalem tan mantultuloy so panrerebelde na totoo ditan, a diad tua et panagrebelde itan ed Dios, anto kasi pansumpalan da? Kasin ompatey ira ed eras odino ed espada na saray taga Babilonia? Say sankaposiblian a nagawa et mabayag iran panayamen ed Babilonia odino ompatey ira ditan. Balet walay “maong a salita” nen Jehova parad saramay nagbabawi tan nampasimbaloy bilay da. Insipan ton sikaray ‘dalawen’ odino imanoen to. ‘Ipawil to ra ed saya a pasen,’ say nianakan dan dalin, ya arawdawi ed Babilonia. (Jer. 27:22) Bilang resulta et ikelyaw da: ‘Misalamat ed Jehova na saray ehersito, ta si Jehova sikato so maong, ta say maaro ya abig na linawa to mansiansia ed ando lan ando.’​—Jer. 33:10, 11.

¹² Lapud maaron-kaabigan nen Jehova, sikatoy Lapuan na panamaseseg ed saramay say kipapasen da et anggapo lay ilalo diad panmoria na too. Walara natan so datin kabiangan na Kristianon kongregasyon balet ta akaawat ira na nakakaukolan tan makanepegan a disiplina. Nayarin nagogonigon iran maong lapud impankasalanan da tan nababaingan iran milimog lamet ed totoo na Dios. Panduaruwaan da no kasin perdonaen tan awaten ni ra nen Jehova. Walay “maong a salita” na Makapanyarin-amin a Dios parad sikara. Natulongan iran manguman ed kanonotan tan kagagawa ra. Tan onaplika met ed sikara so prinsipyon naaralan tayo’d akaunan parapo​—‘ipawil ira nen Jehova ed pasen da,’ diad limog na maliket a totoo to.​—Jer. 31:18-20.

13. Akin a mamaseseg ed sika so impanulong nen Jehova ed si Jeremias?

¹³ Bilang Dios na maaron-kaabigan, si Jehova so lawas ontutulong ed matoor iran lingkor to. Diad sarayan unor lan agew na mundo nen Satanas, makapanmatalek tayo a sustunien tan salimbengan nen Jehova so amin a mangiyuuna ed Panarian to. Tandaan a legan na unor iran agew na Jerusalem, nanilalo si Jeremias a sikatoy sustunien tan salimbengan nen Jehova. Agbalot pinaulyanan na Dios so propeta to. (Jer. 15:15; basaen so Tagleey 3:55-57.) No walay pirmin pakakadesdesan mo, makaseguro kan agnalingwanan nen Jehova iray impatnag mon katooran. Lapud maaron-kaabigan to, panliketan toy ontulong ed sika ta pian agka naderal.​—Tag. 3:22.

“UNONG A SI JEHOVA MABILAY . . . DIA ED INKATUNONG”

14. Antoran ag-inkahustisya so naimatonan mo ed agano ni?

¹⁴ Walaray totoon pigay taon a nipriso anggaman anggapoy kasalanan da. Wala ni ingen iray asentensiaan na ipapatey balet ta apaneknekan labat ya anggapoy kasalanan da kayari la ran pinatey. Diad arum a bansa et walaray atateng a mankakkaukolan na naakan, kanian ilalako da iray anak da bilang ariripen pian walay kanen na pamilya ra. Antoy liknaan mo sano walay nababalitaan mon ontan ya ag-inkahustisya? Antoy padesir mon nalikna nen Jehova? Ipapabitar na Biblia a labay ton ekalen so amin a sengegan na paniirap. Sikato labat so makapanggawa’d satan. Kanian, nawalaan na ilalo iray pobri tan anggapoy kasalanan a maniirap natan. Wala lay gagawaen nen Jehova, say Dios na hustisya, pian iliktar ira ed pakakagonigon da.​—Jer. 23:5, 6.

15, 16. (a) Anton katuaan nipaakar ed si Jehova so impabitar nen Jeremias? (b) Akin a napanmatalkan mo iray ganggan tan sipan na Dios?

¹⁵ Diad panaon nen Jeremias et walaray makaamta ed agnaparaan ya inkahustisya na Dios. Alimbawa, inkuan na propeta a say Israel et nayarin magbabawi ed saray kasalanan da tan bilang paneknek ed saya et singa da ibabagan: “Unong a si Jehova mabilay, dia ed katuaan, dia ed inkatunong, tan dia ed kaptekan.” (Jer. 4:1, 2) Tua itan ta agbalot ginagala nen Jehova a walay ag-inkahustisya. Tan wala niray paneknek a si Jehova et aaroen toy hustisya.

¹⁶ Andi-duaruwan totooren na Dios so salita to tan sikatoy matua. Anggaman say dakel a totoo et agda totooren iray insipan da ed arum, aliwan ontan si Jehova. Anggan saray ganggan ed palsa ya inletneg to tan pakakagunggonaan tayo et agnayarin umanen. (Jer. 31:35, 36) Napanmatalkan tayo met iray sipan tan panangukom to, ta lawas iratan a maabig.​—Basaen so Tagleey 3:37, 38.

17. (a) Panon a manguukom si Jehova? (b) Akin a napanmatalkan mo iray elder sano aasikasoen da iray problema ed kongregasyon? (Nengnengen so kahon ya “Uusaren Ira nen Jehova a Mangukom.”)

¹⁷ Agbalot manguukom si Jehova base’d akinpaway labat, noagta onnenengneng met ed akindalem pian naamtaan toy amin a detalye. Uusisaen to iray motibo na saramay uukomen to. Saray doktor natan et makapangusar la na saray instrumento tan paraan pian naamtaan so kondisyon na pusoy pasyente. Odino sarag dan eksaminen iray kidney, a managlinis na dala. Mas ni so nagawaan nen Jehova. Uusisaen to so piguratibon puso pian amtaen iray motibo na too tan uusisaen to met iray piguratibon kidney, a mangirerepresenta’d sankaaraleman a liknaan na too. Diad ontan et naamtaan na Dios no anton talagay rason ed inkiwas na sakey tan say liknaan to’d ginawa to. Tan agnawewetwet so Makapanyarin-amin ed kinarakel na detalye ed impangusisa to. Sikatoy magmaong nen say sankarunongan a toon ukom, ta uusaren ton amin itan ya impormasyon ed susto tan asimbang a paraan pian desisyonan so pansumpalan tayo.​—Basaen so Jeremias 12:1a; 20:12.

18, 19. Antoy epekto ed sikatayo no naamtaan tayo so inkahustisya na Dios?

¹⁸ Kanian malet so basiyan mon manmatalek ed si Jehova anggaman no maminsan et sikay nakokonsiensia lapud apalabas iran kasalanan. Tandaan a si Jehova et aliwan sakey ya ukom a say naynay ton aanapen et say pakadusaan mo, noagta sikatoy makasin Ukom, a labay to kan tulongan. No ag-ondeen so liknaan mo lapud apalabas a lingom odino ag-impakapitalosan ed arum, kerew mo ed si Jehova a sikato lay akauley ed ‘saray sengegan,’ odino pakakagonigon mo, ta pian agmo la nonoten iratan.c Diad tulong na Dios et namoriam a papablien to so mantultuloy a panlilingkor mo’d sikato.​—Basaen so Tagleey 3:58, 59.

¹⁹ Manepeg labat sirin a say Dios na ayadyarin hustisya et ilaloan ton mangipatnag met na inkahustisya iramay labay dan naawat so panangabobon to. (Jer. 7:5-7; 22:3) Importante so panangipulong ed maong a balita ya anggapoy lalabien pian nipatnag so inkahustisya na Dios. Sano maseet ka ed panagpawil tan panangiyaral na Biblia, nipatnag mo ed makagunggonan paraan so atagey ya estandarte na Dios ed hustisya. Panon ya ontan? Labay ton say amin a klase na totoo et makaaral nipaakar ed sikato tan nilaban. (Tag. 3:25, 26) Talagan baleg so pribilehyom bilang kakimeyan na Dios, a nipapatnag moy inkahustisya to diad satan a manangiliktar-bilay a kimey!

“AGKO NAANI ITULOY SO SANOK KO ED ANDO LAN ANDO”

20. (a) Anton paraan na pidedeneng na Dios ed totoo so impabitar nen Jeremias? (b) Antoy koneksion na ‘pagbabawi’ ed panamerdona nen Jehova? (Nengnengen so kahon a “Panon a Nibagan ‘Magbabawi’ si Jehova?”)

²⁰ Parad dakel, say karga labat kuno na libron Jeremias tan Tagleey et panangondena ed kaugsan. Ibabaliwala da so makaligliwan opresi nen Jehova ed totoo to a panamerdona, a nisulat ed sarayan libro. Oniay impaseseg to’d saray Judio: “Ompawil kayo natan balang sakey a manlapu ed mauges a dalan to, tan umanen yo so saray dalan yo tan saray gawa yo.” Sinimbawa met ira nen Jeremias: “Umanen yo so saray dalan yo tan saray gawa yo, tan unoren yo so boses nen Jehova a Dios yo; et si Jehova nababawian ed mauges a binitla to a sumpa ed sikayo.” (Jer. 18:11; 26:13) Diad panaon tayo, siansia nin peperdonaen nen Jehova so amin a masimoon a magbabawi tan agla manggagaway mauges.

21. Antoy labay nen Jehova a nagawa sano perdonaen toy sakey a too?

²¹ Aliwa labat ya anggad salita so panamerdona nen Jehova, noagta gagawaen to itan. Inusar nen Jehova si Jeremias pian manimbawa: “Ompawil ka, sika manangibeneg ya Israel . . . agak naani onnengneng a sisasanok ed sika . . . agko naani ituloy so sanok ko ed ando lan ando.” (Jer. 3:12) Agmansiansia so sanok odino sakit na linawa na Dios ed siopaman a pinerdona to la. Imbes, anggano walay agawan kasalanan, labay nen Jehova ya ipawil so aderal a relasyon. Anggan panon karakel so kasalanan na sakey, no sikatoy peteg a magbabawi tan onkerew na panamerdona nen Jehova, ‘sikatoy iyakar To lamet’ ed panangabobon tan panamendisyon to. (Jer. 15:19) Satan a panamaseguro so mamaseseg ed siopaman natan ya inmarawi ed tuan Dios pian ompawil ed sikato. Agta onabobon ka a lapud panamerdona nen Jehova et lalo tayon napaapit ed sikato?​—Basaen so Tagleey 5:21.

22, 23. Anto so nepeg a gagalam legan mon aaligen so panamerdona nen Jehova?

²² Sano walay akaopendi’d sika lapud agninonot iran salita odino kiwas, kasin aligen moy Jehova? Nipaakar ed saray Judio nensaman et imbaga na Dios a “linisan” to iramay pinerdona to. (Basaen so Jeremias 33:8.) Sarag ton linisan iray kasalanan na magbabawi, diad pantalos ya agto la nonoten iratan. Iikdan toy pankanawnawa so sakey ya onggapo lamet a manlingkor ed sikato. Balet, agto labay ya ibagan no sikatoy pinerdona la na Dios et alinisan met la’d atawir ton ag-inkaperpekto, ya anggapo lay kasalanan to. Ingen, walay naaralan tayo’d imbaga na Dios nipaakar ed panaglinis to’d totoo. Sarag tayon lingwanan lay lingo odino kasalanan na arum, a singano lilinisan tayo ed puso tayo so panmoria tayo’d sikato. Panon ya ontan?

²³ Isipen pa a sikay niregaloan na sakey a tawir ya alahas. No bilang ta adutakan odino amantsaan itan, kasin ibantak mon tampol? Maseguron andi. Anganko et linisan mon maong itan, ya ekalen iray dutak tan mantsa. Labay mon nanengneng so karakpan na satan, say inkasyayap to. Mipadpara, sarag mon ekalen so antokaman a sakit na linawa odino pansyodot ed agin akaopendi’d sika. Labanan moy tendensian nodnonoten iray makapasakit ya imbaga odino ginawa to’d sika. No agmo la nanononotan iratan, alinisan mo met la ed pusom so panmoriam tan pakanodnonotan mo nipaakar ed toon pinerdonam. Natan ta alinisan lay pusom ed saray negatibon kanonotan mo’d sikato, say datin maapit a pankakaaro a singano aglan balot nipawil so napanggayagaan mo lamet.

24, 25. Antoray nagunggonam no kabaten mo si Jehova a singa ginawa nen Arin Josias?

²⁴ Akonsidera tayo so pigara labat ed saray kualidad tan pidedeneng nen Jehova a naaaralan tayo legan a sikatoy lalo tayon nakakabat. Atalosan tayon saray gunggona ed pakapikabat a maong ed si Jehova so lalon mamakiwas ed sikatayon mandayew ed sikato diad dugan paraan. No kabaten tayon maong si Jehova a singa ginawa nen Arin Josias, say bilay tayo so napanoy liket, a sakey nin kualidad na Dios.

²⁵ No lalo tayon nakabat si Jehova, lalon onelet so relasyon tayo’d arum. Diad panggunaet tayon ipatnag so maaron-kaabigan, hustisya, tan panamerdona a singa gagawaen nen Jehova, onaralem tan lalon pablien tayo iray pikakaaro ed loob na kongregasyon. Niarum ni, magmaliw itayon mas kualipikadon manbangat sano manggagawa tayoy panagpawil ed teritorya tayo tan sano mangiyaaral itayo na Biblia. Saray interesado et mas mainomay ya onadapta ed Kristianon panagbilay a nanenengneng da’d sikatayo. Kanian, mas natulongan tayo ran mandayew ed si Jehova diad dugan paraan, a tumboken day “maong a dalan.”​—Jer. 6:16.