Armagedon​—Bakal a Mangitonton ed Tuan Kareenan

DIAD lenguahe na saraman so manisingbat ed internasyonal iran siglaotan, say salitan nausar a paneskribre ed kipapasen na mundo natan so MAD​—Mutual Assured Destruction. Satan a termino so sankamatukoyan. Diad 40 taon nanlapulad interak na inmunan bomba atomika diad Hiroshima, Hapon, saray simpenan na nuklar ed mundo so binmalbaleg a tuloy. Ibabaga na arum a report a sikara so mandagup na kasimbang na 12 libon milyon a tonilada na TNT, odino ngalngalin 3 tonilada a para ed kada too diad dalin!

Bilang say Sakey “ya ag-amalsa [ed dalin] ya andi-kakanaan, a tinibukel to, ta pian napanayam,” diad tua, et ag-abuloyan nen Jehovan Dios iray nasyones a mantultuloy ed kurang dan pambitkel. (Isaias 45:18; nengnengen met so Salmo 104:5.) Sakbay a sikara so nawalaan na pankanawnawan mangibekas ed amin na saray makapatey ya armas da a sumpad sinansakey, tan diad kurang a paneral da ed inkasikaran dili tan diad kaliberliber, say Managgawa tan Akankayarian na dalin tan ed amin a bengatlan walad tapew to so ontalindeg ya onkiwas. Insipan to a saya “so bakal na baleg ya agew na Dios a Makapanyarin-amin,” say Armagedon na Biblia!​—Apocalipsis 16:14, 16.

Say Armagedon, sirin, so mas lalo nen say basta sananey a bakal a manresolbe ed kaplesan-agew a laslasan ed pulitika. Gawaen to so nailaloan lambengat na too ed amin na saray panaon. Ekalen to so amin a sengegan na pambabakal na too. Manuna ed amin, ipawil to so makanepegan a pananguley na Akankayarian ed dalin, si Jehovan Dios, ed amin a pinalsa to. Panon so kagawa na sayan amin? Nengnengen tayo.

Kareenan​—Diad Pangekal ed Sengegan na Pambabakal

Sakey ed saray sengegan ya agnayarian na nasyones ya ekalen ed bakal et say agda nayarian ya ekalen so sengegan na pambabakal. Anggaman kabat da a say ontutulasok a pampaparakel na armas so mamaarap ed panagbitkel, sikara so aliwan mabulos ya onsuko odino mamatayer ed satan. Sikato so “makapakelaw,” peteg, sano onkiwas si Jehova tan sumpalen to so agnagawaan na saray nasyones: “Say bekang so balbalen to tan say gayang so puterputeren to; saray karusa so poolan to ed apuy.”​—Salmo 46:8, 9.

Impanengneng la nen Jehova ed imbeneg so pakayari ton maneral ed saray sankaabantian odino mabiskeg iran armas a nayarin ibekas na saray nasyones. Alimbawa, inliktar to so pinmatnag a singa andi-depensan totoo to, saray Israelitas, a nanlapud biskeg na militar na inmunan pakayari mundo, say Ehipto, diad impangusar to’d saray elementon puersa na danum na Ambalangan Dayat. (Exodo 15:3-5) Mipadpara, saray mabibiskeg ya armas nen Canaanitan Arin Jabin, “siamalasus a karwahe ed bakal a walaan na balatyang a tarem,” diad panangikomando na hepe na armada ton si Sisera, so sigpot ya agkinmana sanen imbekas nen Jehova iray pakayari to diad manasibengbeng a delap. Saray ulop na kakabusol so sigpot ya agutgut, ya angitonton ed inkapatey na anggad kaunoran a too. Say nansumpalan et “say dalin so andian la na managgonigon ed apataplon taon.”​—Nengnengen so Uko-ukom, kapitulo 4 tan 5:21, 31.

Makabaliksan, saman a mananalon bakal a sumpad saray puersa nen Arin Jabin so agawa ed lawak na Kishon, “diad saray danum na Megido.” (Uko-ukom 5:19-21) Iter to sirin ed sikatayo so dramatikon pakanengneng diad sigpot a pambiktorya nen Jehova diad onsasabin bakal na Armagedon.

No anton “misteryoson” puersa, no wala, ya usaren nen Jehova a sumpad kakabusol to so agtayo kabat. Say kabat tayo et sikato so walaan na puersa a makayarin sigpot a manesyang ed saray militar na nasyones. Saray sientista so sikakabat, alimbawa, a say mabiskeg ya electromagnetic pulse​—bengatlan napabiskeg da diad atagey-dampoten ya iterak na nuklar​—so makayarin maneral ed komunikasyon tan panangontrol a sistema na militar na sakey a nasyon, sirin isunsun to so amin a bengatla ed kadederal. Makatunongan, gawaen nen Jehova ya andi-kana so amin ya insempen-ya-armas na amin a nasyones ta pian niletneg so pundasyon na sigpot a kareenan.

Kareenan​—Para Lambengat ed Saraman So Malabay

Nibagan mabetbet a saray bakal so gagawaen na totoo, aliwan saray armas. Kanian sirin, anggaman nakaukolan a saray uusaren ed pambabakal so naekal, diad sikaton mismo so agmangarantiya na magnayon a kareenan. Makatunongan, no kaliktan tayon nanengneng so tuan kareenan, saray panggugulaan ed pulitika, rasa, tan nasyonalismon mangaapag ed mundo diad lawas dakel iran bloke tan kampo so nepeg met a naekal. Saya so gawaen nen Jehova diad pangiter to’d samay ipipikasi na minilyon ed sankamundoan: “Onsabi komon so panarian mo.”​—Mateo 6:9, 10.

Anggaman malinlinew ya ipapanengneng na saray asumpal a propesiya na Biblia a say Mesianicon Panarian ed lima nen Jesu-Kristo so niletneg ed katawenan ed samay Guerra Mundial I taon nen 1914, sikato so ag-inabrasa na nasyones. Anggapo so anggan sakey ed sikaran nanisip ya ikbanan da laray armas da tan isuko ra so inkasoberano ra. Imbes, diad ampetang a pisasamsaman da diad pananguley ed mundo, sikara so nikutep ed sankabalgan a bakal a nagawa ya anggad satan a panaon.

Mapropetiko, say komaduan Salmo so manideskribe ed kipapasen: “Akin a saray nasyones so manggugulo tan saray nasyones so manuumameng na maapan pamaakaran? Saray arari na dalin so angala na talindeg da tan saray atatagey a manuley so nandaragup a singa saksakey a sumpad si Jehova tan sumpad nilanaan to.” Sikato no akin a say ganggan nen Jehova ed tinuron Ari, si Jesu-Kristo, so: “Sikara so buyaken mo ed tayukor a balatyang, sikara so misimisien mo a singano dinamili na pomapalba.”​—Salmo 2:1, 2, 9; 110:2.

Sayan pananalo na Arin nilanaan na Dios so adeskribe ed piguratibon detalye diad Apocalipsis 19:11-20:3. Say Salita na Dios, si Jesu-Kristo, a sinuportaan na saray armadan angheles, so anengneng ya akakabayo ed amputin kabayo, “tan sikato so mangukom tan mangisumpal ed bakal diad inkatunong. . . . Ompaway ed sangi to so andukey a makdem a kampilan, pian kabilen toray nasyones.” Say pansumpalan ya impamatey ed marelmeng so abalbaleg. Diad palaspas a pananalo to, say mananalon Ari so diad satan et miarap ed samay peteg a nankasalanan a walad benegan na amin na saray irirap tan sinagem ed dalin. Say pasingawey ed Apocalipsis so maneskribe ed saya a singano sikato la so asumpal, a kuanto: “Tinekmelan to so dragon, say daan ya uleg, a sikato so Diablo tan Satanas, tan binalor to ed sanlibon taon.”

Kareenan​—Sanlibon Taon tan Diad Labas To

Kasin naisip yo so kabaliksan na sanlibon taon na kareenan a para ed katooan? Bidbiren natan na saray pakauley a say eras, sakisakit, tan irap ed limog na saray nasyones so nayarin napunas no say kamelantingan labat a parte na nilasus bilyon a dolyar a gagastosen ed saray armas a kada taon so nausar diad pangasikaso ed saratan. Isipen pa so nagawaan sano amin na saray kayamanan na dalin so nausar ed pankaabiganan. Aliwan andi-kakanaan a kugip sanen si Isaias so apuyanan a manpropesiya nipaakar ed pananguley na “Prinsipe na Kareenan,” si Jesu-Kristo: “Diad inkadaakan na maprinsipen uley tan diad kareenan anggapo so anggaan.”​—Isaias 9:6, 7.

Say manangidesdes a tepet so: Kasin naliktaran yo so kadederal ed Armagedon pian panliketan so andi-anggaan a kareenan? Nayarin itepet yo, ‘Anto so nepeg kon gawaen pian siak so niliktar?’ Nia so simbawa na Biblia: “Anapen yo si Jehova, amin yon mauyamo ed dalin, ya angagamil na dilin maptek a panangigeter to. Anapen so inkatunong, anapen so kauyamoan. Nayarin sikayo so niyamot ed agew na sanok nen Jehova.” (Sofonias 2:2, 3) Saray Tasi nen Jehova so maliket ya ontulong ed sikayo a manggawa na ontan. Diad satan a kipapasen, say Armagedon so mansumpal a para ed pankaabigan yo, aliwan sakey a bakal a mangitarok na sigpot a kadederal, noagta sakey a bakal a mangitonton ed tuan kareenan.

[Litrato ed pahina 6]

Diad Ambalangan Dayat impanengneng nen Jehova so pakayari ton maneral ed saray mabibiskeg ya armas ed bakal