‘Magenap La ed Siak so Relihyon Ko!’

KASIN sikayo so kinmiwas ed ontan iran salita sanen sakey ed saray Tasi nen Jehova so dinmalaw ed abung yo? Nayarin inyarum yo: ‘Satan so magenap la ed saray atateng ko tan saray lalakik-tan-babaik. Sirin akin a gonigonen yo ni so arum a relihyon?’

Siempre, nagunggunaan itayo na baleg ed kakabatan tan eksperiensia na saray atateng tayo. Balet kasin satan so tuan makabat a letnegan diad panumbok ed sakey a relihyon? Peteg ya agtayo aligen iray atateng tayo tan saray lalaki-tan-babai tayo ed amin a bengatlan gawaen tayo. Akin ya andi? Lapud wala so inyaligwas ed pikakabat tan pakatalos.

Diad pangiyilustra: Diad linmabas ya 40 taon sano saray totoo so mansakit, sikara so nayarin ompatey lapud aliwan magenap so tambal. Nanlapulad 1943, saray antibiotics so wala la tan angisalba ed dakel a bilay. Kasin agtayo labay so mangusar na saray antibiotics lapu lambengat ta saratan so agkabat na saray lalaki-tan-babai tayo? Andi, pansiansiaen tayo so lukas a kanonotan tan simbangen iray kablian na saray balon agawaan. Say ontan met ya awawey so makabat no nipaakar ed relihyon.

Say kipapasen nen apostol Pablo so malaknab a mangiyilustra a say relihyon na saray inmunan atateng tayo so agnibagan tuan panagdayew a makapaliket ed Dios. Sakbay na inkakumberte nen Pablo ed Inkakristiano, say kiwas to ed Kristianon “Dalan” so alablabas a marawal, lapud “intultuloy ton pinasegsegang so kongregasyon na Dios tan dinesyang to.” Balet akin? Lapud sikato so ‘maseseg ed saray tradisyon na kaamaan to.’ Say masimoon a pananumbok to ed datin relihyon to so angamper ed sikato diad pakabidbir ed katuaan nipaakar ed si Jesu-Kristo​—tan saman so ag-akapaliket ed Dios.​—Gawa 9:1, 2; Galacia 1:13, 14.

Relihyon Yo​—Pinili odino Nibanbana?

Diad karaklan a kipapasen, say relihyon na sakey a too so peteg lambengat a pamaakaran na inkibanbana. Diad anton pantalos? Diad kipapasen a nayarin sikayo so nianak a sakey a Katoliko, sakey a Protestante, sakey a Hindu, sakey a Taoista, odino sakey a Budista lapud satan so relihyon na saray atateng yo. Balet alimbawa no sikayo so nianak ed sananey a bansa odino pamilya. Angangko ta sikayo natan so masimoon a mangiyaalibansa ed sakey a duman relihyon. Sirin, kasin lohikal so pangipasen a say relihyon a nianakan yo so automatikon sikato so tua?

Balanglan sikayo so nianak ed relihyon yo odino andi, nayarin siansian liknaen yo a satan la so magenap ed sikayo. Ingen kasin say dugan relihyon so pamaakaran lambengat na personal ya opinyon o pantaway? Kasin satan so napanmatalkan a giya?

Angangko ta saya so nayarin niyilustra tayo ed tagano. Tepetan yo so sakey ya ugaw no dinan so lablabayen to​—say tinapay odino pising. Nayarin pilien to so tinapay. Balet kasin say ontan a pili so sankamasustansyaan? Mipadpara, say katuaan a say relihyon so onapelo ed personal a pantaway yo so agmankabaliksan a sikato la so sankaabigan ed sikayo diad espiritual.​—Ipareng so Roma 10:2, 3.

Say relihyon so aliwan basta sakey a pamaakaran na opinyon. Lalanoren to so panagdayew ed Dios, sirin nepeg a satan so mamaliket ed sikato. Kanian, say makanan tepet so aliwan, Kasin say relihyon ko so magenap la ed siak? Noag ingen, Kasin say relihyon ko so peteg a mamapaliket ed Dios?