Niyabawag a Matunong “a Para ed Bilay”

“Diad panamegley na sakey a gawa na kapatunong a say pansumpalan . . . et say kiyabawag da a matunong a para ed bilay.”​—ROMA 5:18.

1. Siopara so nanaerasan tan napepegaan ed inkatunong, tan panon so kasumpal na pilalek da?

“MALIKET iraman so nanaerasan tan napepegaan ed inkatunong, lapud sikara so napesel.” (Mateo 5:6) Say ontan ya inkapegaan ed inkatunong so napesel a nagnap ya aliwan diad saraman labat so “kayarian na panarian ed katawenan” noagta ontan met ed saraman so “mangayarian ed dalin.” (Mateo 5:10; Salmo 37:29) Namparan saratan a klase so mibiang diad ilalon imbalikas nen apostol Pedro sanen insulat to: “Wala so balon katawenan tan sakey a balon dalin ya aalagden tayo unong ed sipan [na Dios], tan diad saraya so panayaman na inkatunong.” (2 Pedro 3:13) On, insipan nen Jehova so sakey a matunong a balon mangatatawen a gobierno, “say panarian na katawenan,” tan sakey a matunong a “balon dalin,” odino sosyedad na too ed sakey a paraison dalin.

2. Anton siglaotan so wala ed baetan nen Jehova, inkatunong, tan say ilalo tayo ed mareen a Balon Oksuy?

² Balet anto so eksakton natalosan ed matunong a balon katawenan tan matunong a balon dalin? Kabaliksan ton say balon mangatatawen a gobierno tan saray katooan ed dalin ya uleyan to so nepeg a mamidbir ed estandarte na Dios ed duga tan aliwa. Si Jehova “so magnayon ya ayaman na inkatunong.” (Jeremias 50:7) Say inkatunong so mismon pundasyon na inkasoberano to, odino tronon posisyon ed talba. (Job 37:23, 24; Salmo 89:14) Pian wala so kareenan ed talba, saray pinalsa nen Jehova so nepeg a mamidbir ed kanepegan ton mangiletneg na estandarte ed no anto so matunong tan no anto so marelmeng. Sirin, say ilalo tayo ed matunong a Balon Oksuy so onsaral diad panumbok nen Jehova ed saray estandarte to.​—Salmo 145:17.

3. Nisesengeg ed sigpot ya inkatunong nen Jehova, anton tepet so onlesa ed isip?

³ Say tepet sirin so onlesa ed no panon a say masanto tan matunong a Dios a Jehova so walaan na pidedeneng ed saray agmatunong a makasalanan. (Ipareng so Isaias 59:2; Habacuc 1:13.) Legan a mansiansian matoor ed nitandoron estandarte to ed inkatunong, panon so pakapampili to ed limog na makasalanan ed saraman so mibiang ed matunong a gobiernon “balon katawenan” tan awaten a bilang kaaro to iraman so magmaliw a kabiangan na matunong a “balon dalin”? Pian saya so naebatan, nepeg a talosan tayo so doktrina na Biblia ed panamatunong, odino panangideklara ed inkatunong.

Mapangasin Oksuyan na Utang

4. Akin a say naplag a katooan so akautang na baleg ed Dios, tan akin ya agtayo nayarian so makalukpos ed inkasikatayo ed sayan utang?

⁴ Diad Kasulatan, saray kasalanan so impareng ed utang. (Nengnengen so Mateo 6:12, 14; 18:21-35; Lucas 11:4.) Amin a totoo so makasalanan tan sikara, sirin, so nikutep ed utang ed arap na Dios. “Say bayar na kasalanan et say patey.” (Roma 6:23) Lapud sikara so “inlako ed kasalanan” na ateng dan si Adan, saray kapolian to so agmakayarin mangilukpos ed sikara diad sayan manamatey ya utang. (Roma 7:14) Say ipatey na akautang so makayarin mamunas ed satan, “lapud say inatey so alukpos ed kasalanan to.” (Roma 6:7) Anggapo so maabig iran kimey a ginawa na managkasalanan legan na bilay to so makayarin manondon ed abalang nen Adan, nisay mangiter ed sikato na matunong a talindeg ed arap na Dios.​—Salmo 49:7, 9; Roma 3:20.

5. Panon so impangitarya nen Jehova na pakabulos a para ed makasalanan a katooan legan a siansian rerespetoen to so ayadyarin inkahustisya to?

⁵ Panon a nayarian nen Jehova ya itarya so pakainawaan ed makasalanan a katooan ya agto ikumpromiso so dilin estandarte to ed inkatunong? Say ebat so mangipabitar ed kakabatan tan agkanepegan a panangasi nen Jehova. Saya so alay-dakep ya impaliwawa nen apostol Pablo diad sulat to ed saray taga Roma. Insulat to: “Sikato so singa libren palangkap a sikara [makasalanan] so niyabawag a matunong diad agkanepegan a panangasi to diad panamegley na inkibulos ed dondon ya imbayar nen Jesu-Kristo. Sikato so inggeter na Dios a bilang iyaapay diad karondon ed panamegley na pananisia ed dalan to. Saman so ta pian ipatnag to so dilin inkatunong to, lapud sikato so mamerdona ed saray kasalanan ya agawa ed abenegan legan ya aagamilen na Dios so tepel; ta pian ipatnag to so inkatunong to ed sayan peles a panaon, ta pian sikato komon so magmaliw a matunong ya anggan say kiyabawag a matunong na toon walaan na pananisia ed si Jesus.”​—Roma 3:24-26.

6. (a) Panon a saray estandarte nen Jehova ed inkahustisya so pinenek na bagat nen Kristo, tan anto sirin so mabulos a gawaen nen Jehova? (b) Panon so pangipabtang na Dios na inkatunong diad kuentaan na sakey a toon walaan na pananisia?

⁶ Diad panamegley na agkanepegan a panangasi to, inawat nen Jehova so bagat nen Jesus a para ed saray kapolian nen Adan. (1 Pedro 2:24) Saman so kasimbangan, o kapetekan, bagat a nanengneng ton, bilang sakey ya ayadyarin too, et dinondon nen Jesus so abalang nen ayadyarin toon Adan. (Nengnengen so Exodo 21:23; 1 Timoteo 2:6.) Say inkahustisya so agawa, si Jehova so simamaaron mabulos a “mamunas,” odino ‘mamural,’ ed saray kasalanan ya impakasalanan a sumpad utang na “toon walaan na pananisia ed si Jesus.” (Isaias 44:22; Gawa 3:19) No say ontan a too so mansiansian matoor, aliwa lambengat a si Jehova so agla ‘mipalinewan ed sikato diad saray impakalukso to’ noagta Sikato so peteg a mangipabtang na inkatunong ed kuentaan to. (2 Corinto 5:19) Diad panamegley na sayan mapangasin oksuyan ed utang, ‘dakel so agawan matunong.’ (Roma 5:19) Saya so sakey a nengneng na panamatunong, say gawa na Dios a ditan et say sakey a too so nibilang ya andi-kasalanan. (Gawa 13:38, 39) Siopara so apatunong, odino niyabawag a matunong, legan na sayan sistema na bengabengatla?

144,000 a “Sasantos”

7. Diad anton dalan a si Kristo so niyabawag a matunong, tan anto sirin so nagmaliw a posibli?

⁷ Siempre, si Kristo a mismo so agmankaukolan na kapabtangan ed inkatunong, lapud sikato la so peteg a matunong. (1 Pedro 3:18) Diad impagmaliw ton matoor ya anggad patey bilang ayadyarin too (“say unor ya Adan”) tan insakripisyo to so kanepegan to ed bilay diad dalin, si Jesus so pinaoli nen Ama to, si Jehova. Si Jesus so “niyabawag a matunong diad espiritu,” salanti, nibitlan manunan matunong diad dilin merito to tan apaoli a bilang “manangiter-bilay ya espiritu.” (1 Corinto 15:45; 1 Timoteo 3:16) Diad sakripisyon impatey to, inter to so letnegan a nayarian nen Jehova ya ipabtang so inkatunong ed lalaki tan bibii na pananisia.​—Roma 10:4.

8, 9. (a) Siopara so ununan nagunggunaan diad kipabtang na inkatunong, tan akin? (b) Siopa so manibukel na “balon katawenan,” tan diad anto so uleyan da?

⁸ Makatunongan, saraman so pilien nen Jehova a manibukel na matunong a “balon katawenan,” odino gobierno na Panarian ed leksab nen Arin Jesu-Kristo, so ununan sigpot a nagunggunaan ed sayan mapangasin oksuyan ed sayan sistema na bengabengatla. Say libro nen Daniel so mangireretrato ed seremonya diad katawenan a si Kristo, ya Anak na Dios, so mangaawat na “pananguley tan karlangan tan panarian,” ta pian “saray totoo, nasyon tan lenguahe [ed dalin] so manlingkor ya amin ed sikato.” Insan impanengneng nen Daniel a “say panarian tan pananguley” so niiter met ed “saray sasantos na Sankatageyan,” si Jehova.​—Daniel 7:13, 14, 18, 27; ipareng so Apocalipsis 5:8-10.

⁹ Say bilang na saratan a “sasantos” a pinilin miuley ed Korderon Jesu-Kristo ed mangatatawen a Palandey Sion so niparungtal a bilang 144,000, “a sinaliw ed limog na katooan.” (Apocalipsis 14:1-5) Saraya, a kaiba si Kristo, so manibukel na matunong a “balon katawenan” na balon sistema na bengabengatla nen Jehova.

Nibilang a Matunong​—Panon tan Akin?

10. (a) Dinan a libro na Biblia so sankabitaran diad panamatunong, tan diad siopa so nisulatan to? (b) Siopara so manunan asaglawi ed doktrina na Biblia diad kapatunong?

¹⁰ Say libro na Biblian andi-duaruwan sankabitaran diad panangiyabawag na Dios ed totoo a matunong et say sulat nen Pablo ed saray taga Roma. Makapasagyat, impaarap to so sulat to ed saraman so “atawag a sasantos.” (Roma 1:1, 7) Saya so mangipaliwawa no akin a say doktrina na “panamatunong,” odino panangiyabawag ed inkatunong, a singa indatak nen Pablo, so nausar a misiglaot ed 144,000 a “sasantos.”

11. Anto so siglaotan na pananisia, kimey, tan kapatunong?

¹¹ Say kalaknab na panagrason nen Pablo ed saray taga Roma et nisay Judio nisay Hentil so makagegemtan na matunong a talindeg ed arap na Dios diad panamegley na gawa, balanglan saraya so ginawan mitukoyan ed Mosaicon Ganggan odino diad basta panrespeto ed saray nikaduman ganggan ed moral. (Roma 2:14, 15; 3:9, 10, 19, 20) Namparan say Judio tan Hentil so niyabawag a matunong lambengat diad letnegan na pananisia ed dondon bagat nen Kristo. (Roma 3:22-24, 29, 30) Anggaman kuan, say konseho diad manangisaran kapitulo na Roma (12-15) so mangipanengneng a say ontan a pananisia so nepeg a suportaan na maridios a gawa, a singa insalaysay met nen Santiago. (Santiago 2:14-17) Say ontan iran gawa so mamaneknek lambengat a say apatunong a Kristiano so walaan na pananisia a satan so nakakaukolan diad pamatunong na Dios.

12, 13. (a) Akin a saray 144,000 a “sasantos” so nakaukolan a niyabawag a matunong? (b) Anto so gawaen da diad kanepegan na bilay ya awaten da?

¹² Diad anton kapilitan a rason a saray Kristianon “atawag a sasantos” so mankaukolan a niyabawag a matunong? Saya so kasaglawian na komaduan nengneng na kapatunong, salanti, say panangiyabawag na Dios ed sakey a toon makana ed bilay bilang ayadyarin toon anak To. Nisesengeg ed betang ya akatawagan da a kiwasan ed matunong a “balon katawenan,” saray 144,000 so nepeg a mangitalirak tan mangisakripisyo ed ando lan ando ed anggan anton ilalo ed bilay ya andi-anggaan diad dalin. (Salmo 37:29; 115:16) Diad sayan pantalos et sikara so inatey ed sakripisyon ipapatey. ‘Insuko [ra] so inkasikara ed ipapatey a singa impatey nen Kristo.’​—Filipos 3:8-11.

¹³ Natan, mitukoyan ed prinsipyon nidatak ed Mosaicon Ganggan, anggan anton bagat ya impresenta ed si Jehova so nepeg ya andian na pakabalawan. (Levitico 22:21; Deuteronomio 15:21) Saray 144,000 a “sasantos” so asalitan “matunong ya agawan ayadyari.”​—Hebreos 12:23.

Tinagibi a bilang Espiritual ya Ananak

14, 15. (a) Anton pananguman no nipaakar ed kasalanan so sagmaken na 144,000? (b) Diad anton dalan a sikara so pinaoli diad “inkabalo na bilay”?

¹⁴ Legan a saraya so mabilay ni ed laman, sarayan “matunong” so managmak na simbolikon ipapatey. Impaliwawa nen apostol Pablo: “Diad pakanengneng a sikatayo so inatey no nipaakar ed kasalanan, panon so pansiansia tayo nin pambilay ed satan? Odino agta kabat yo ya amin tayon abautismoan ed si Kristo Jesus so abautismoan ed impatey to? Sirin sikatayo so nikutkut a kaiba to diad panamegley na bautismo tayo diad impatey to, ta pian, unong a si Kristo so apaoli a manlapud saray inaatey ed panamegley na gloria na Ama, sikatayo met so manakar ed inkabalo na bilay . . . lapud kabat tayo a say daan ya inkatoo tayo so nipasak a kaiba to, pian say makasalanan a laman tayo so komon nagawan ompatey, ta pian ag-itayo la mankurang ya aripen na kasalanan. Ta saman so inatey so alukpos ed kasalanan to.”​—Roma 6:2-7.

¹⁵ Legan na atooan a bilay da, saray 144,000 a “sasantos,” a say melag a nakdaan labat natan so wala ni ed dalin ed sayan panaon na anggaan so, ‘ompatey no nipaakar ed kasalanan.’ Kayari na simbolikon ipapatey da, saraman so “atawag a sasantos” so napaoli ed “inkabalo na bilay.” Diad inkiyabawag dan matunong, si Jehova so wala ed posisyon a mangilalak ed sikara diad espiritu to pian magmaliw ya espiritual ya “ananak” to. Sikara so “nianak lamet” tan tinagibi a bilang “ananak na Dios.” (Juan 3:3; Roma 8:9-16)a Sikara so magmaliw ya espiritual ya Israelitas tan nitarok ed balon sipanan.​—Jeremias 31:31-34; Lucas 22:20; Roma 9:6.

Mananawir ed Inkasaserdote tan Inkaari

16. Diad anto so pagmaliwan na 144,000 a “sasantos” a mananawir?

¹⁶ Bilang tinagibin espiritual ya “ananak” na Dios, saray 144,000 a “sasantos” so magmaliw met a ‘mananawir.’ (Galacia 4:5-7) Insulat nen Pablo ed saray kapara ton nailalak-ed-espiritun Kristianos: “No, sirin, sikatayo so ananak, sikatayo met so mananawir: mananawir a peteg ed Dios, balet kaiban mananawir nen Kristo, dapot no sikatayo so manirap a mankakasakey pian sikatayo komon so nigloria a mankakasakey.” (Roma 8:17) Anto so tawir nen Kristo? Sikato so ginawa nen Jehova a sakey ya Arin-Saserdote “unong ed nengneng nen Melkizedek ed ando lan ando.” (Hebreos 6:19, 20; 7:1) Bilang “kaiban mananawir” nen Kristo, saray nailalak-ed-espiritun Kristianos so nilanaan met nen Jehova bilang espiritual iran saserdote. (2 Corinto 1:21; 1 Pedro 2:9) Nagkalalo ni, sakey ed saray matalonan getma na impangibawag nen Jehova ed sikara a matunong et say diad kaunoran “panuley a bilang arari ed bilay diad panamegley na sakey, si Jesu-Kristo.”​—Roma 5:17.

17. (a) Anggaman niyabawag a matunong, anto so nakaukolan a gawaen na saray alanaan a Kristianos ya inagew-agew? (b) Panon so pangawat da ed tumang da?

¹⁷ Legan a wadia ni ed dalin, sarayan alanaan a Kristianos, anggaman niyabawag a matunong, so siansia nin mamabakal ed makasalanan iran tendensya ra. (Roma 7:15-20) Nakaukolan da so dala nen Kristo a manlinis ed sikara a manlapud inagew-agew a kasalanan na agda inkayadyari. (1 Juan 1:7; 2:1, 2) Sano sikara so mansiansian matoor ya anggad sampot na mangaraldalin a bilay da, sikara so literal ya ompatey tan napaoli “ed agkabubulok tan andi-tilol tan agnaebas a tawir” bilang kabiangan na matunong a “balon katawenan.”​—1 Pedro 1:3, 4; 2 Pedro 3:13.

“Alagden So Kipatnag na Saray Anak na Dios”

18, 19. (a) Anto so aalagden na toon “pinalsa”? (b) Panon a “saray ananak na Dios” so ‘nipatnag,’ tan akin a say toon “pinalsa” so manbibilay diad magunaet a panilalo ed saya?

¹⁸ Panon a sayan amin so mangapekta ed saraman so​—mas lalon dakel nen say 144,000 iran espiritual ya “ananak na Dios”​—a nanaerasan tan napepegaan ed inkatunong balet say ilalo ra et say pangayarian ed dalin? Diad saraya, insulat nen apostol Pablo: “Nipaakar ed magunaet a panilalo na pinalsa so manaalagar diad kipatnag na saray anak na Dios. Ta say pinalsa so nisilong ed kaapaan . . . diad letnegan na ilalo a say pinalsa so nibulos met a manlapud panangaripen na kabubulok tan nawalaan na maglorian kawayangan na ananak na Dios.”​—Roma 8:19-21.

¹⁹ Say ontan a toon “pinalsa” a say ilalo ra et say pambilay na ando lan ando ed paraison dalin so manbibilay diad “magunaet a panilalo” ed panaon​—natan et asingger la​—sano say Arin Jesu-Kristo tan saray apaolin “ananak na Dios” so ‘nipatnag’ diad paneral ed peles a marelmeng a sistema na bengabengatla tan kayari to et manuley a bilang arari tan saserdote “diad sanlibon taon.” (Apocalipsis 20:4, 6) Legan na Milenyon Uley nen Kristo, say toon “pinalsa a mismo so nibulos met a manlapud panangaripen na kabubulok.”

20. Anto so nasalaysay ed onggendan ya artikulo?

²⁰ Ed no panon a saray totoon manbibilay ed matunong a “balon dalin” so diad kaunoran et makagamor “ed maglorian kawayangan na ananak na Dios,” tan no panon a say doktrina na Biblia ed kapatunong so mangapekta ed sikara ya anggan natan, so nasalaysay ed ontumbok ya artikulo.

[Paimano ed Leksab]

No nipaakar ed panangiyabawag na Dios ed totoon matunong​—

◻ Anto so labay ya ibaga na Biblia diad matunong a balon katawenan tan matunong a balon dalin?

◻ Akin a nakaukolan na katooan so kipasen ton manepeg ed si Jehova?

◻ Panon so kapenek na saray estandarte nen Jehova ed inkatunong?

◻ Akin a saray 144,000 so ununan niyabawag a matunong, tan anto so gawaen da diad kanepegan ed bilay a naawat?

◻ Diad anto a saray 144,000 so magmaliw a mananawir a kaiba nen Kristo?

[Kahon ed pahina 16]

Wala so duaran nengneng na kapatunong, odino kiyabawag ed inkatunong:

(1) Pipalinewan na Dios a say too so andi-kasalanan

(2) Panangiyabawag na Dios a satan a too so ayadyari tan makana ed andi-anggaan a bilay diad dalin

Saray 144,000 ya alanaan a Kristianos so niyabawag a matunong diad namparan kipaakaran. Insakripisyo ra so dilin kanepegan da ed atooan a bilay tan sikara so nailalak a bilang espiritual ya “ananak” a tinawag pian magmaliw ya arari tan saserdote a kaiba nen Kristo ed “balon katawenan”