Saray Misteryon Managkabayo ed Apocalipsis

BANTAYAN yon makapasagyat, a saray buek tan ikol so mantekkiab tan saray eleng so manpunges, legan a saray kabayo so manalibandos ed pankulagtot. Say managkabayo so singa nipeket ed silyador a singano kabiangan na sayan onaabante, manaltaris a kabayo.

Balanglan ondadalaw ed kaumaan na saray baka ed Australia odino, kapaldua na mundo ed kaarawi, saray patar na ranso ed America, say pakanengneng ed sakey a managkabayon peteg a kabat to so inkabayo to so tuan makapasagyat. Mipadparan makapakelkelaw so karlangan na sakey a parada na saray impasal a maong a kabayo tan managkabayo.

Saray ontan a managkabayo tan say inkabayo ra so anagyat ed sikatayo. Anggaman kuan, saray kabayo tan managkabayo ya atasian na managsulat na libro na Puyan (say Apocalipsis) so makapasagyat ya imatonan! Sikara so misteryo tan ontan met a makapakelkelaw. Saray managkabayo so akabkabat a malaknab bilang saray Managkabayo ed Apocalipsis.

Isipen a natan, manalibandos a mamapaarap ed sikayo, so apatiran onsianon managkabayo, say sakey et sankaegnaan to so akaayag a kampilan! Imanoen so kolor na kabayo ra. Balang sakey so duma. Say sakey a kabayo so amputi, say sakey so ambalanga, say sakey so andeket, tan say sakey so mapusisaw. Sikara so peteg a nikaduma, misteryon nengneng.

Tumboken so maples-onaabantin salaysay ya anengneng na managsulat na Biblia, si apostol Juan. Inkuanto: “Insan anengneng ko so sakey a kabayon amputi, tan say akakabayo so akaegna na bekang. Sikato so naikdan na balanget, tan sikato so nankabayo a bilang sakey a mananalo a mangonkesta. . . . Tan sananey a kabayo so pinmaway, masnag ya ambalanga, tan say akakabayo so naikdan na pakayarin mangekal na kareenan ed dalin, tan pampapateyanen toray totoo ed sinansakey; sikato so naikdan na baleg a kampilan. . . . Tan diman et anengneng ko so andeket a kabayo, tan say akakabayo ed sikato so walaan na sankaparis a simbangan ed lima to, tan nadngel ko so sakey a boses . . . a kuanto, ‘Say trigo ed sakey [sanagew a sueldo] a kakapat, tan say sebada ed taloran kakapat na [sanagew a sueldo]’ . . . Tan diman et anengneng ko so sakey a kabayon say kolor to so dapol, tan say ngaran na akakabayo so manngaran na Patey, tan say Hades so manumtumbok ed sikato. Sikara so naikdan na pakayari ed sakey a kakapat na dalin, pian pateyen da so totoo ed kampilan, eras, patey, tan saray atap ya ayep ed dalin.”​—Apocalipsis 6:2-8, An American Translation.

Sanen sayan pasingawey so inmunan nisulat, saray kabaliksan to so angutgut ed agnabilang a managbasa to. Anto so inrepresenta na sarayan misteryoson kabayo tan saray managkabayo ra? Kapigan so inggapo na impankabayo ra? Kasin say impankabayo ra so walaan na anggan anton kipaakaran ed bilay natan? Niiter so malaknab a nanduruman paliwawa no anto so nayarin irepresenta na saray kabayo tan saray managkabayo ra, tan no kapigan, a peteg, so kagawa na pankabayo ra.

Say baleg a panduruma so naromog ed saray interpretasyon na amputin kabayo tan say managkabayo to. Alimbawa, ipapaliwawa na New Catholic Encyclopedia a say amputin kabayo et irerepresenta to so ‘balanglan say pambiktorya na ebanghelyo odino imperyalismo.’

Diad libron Daniel and the Revelation, sayan interpretasyon so inter nen Uriah Smith: “Say amputin kabayo . . . so matukoy ya emblema na saray pananalo na ebanghelyo nen inmunan siglo . . . Say inkamaputi na kabayo so mangipaparungtal na inkapuro na pananisia ed saman a panaon.”

Ibabaga na The Expositor’s Bible: “Diad silong na ununan managkabayo say sengegan imbes a say inkapersona nen Kristo so niparungtal ed sikatayo, diad sankasakbayan a balitang na mananalon kurang to, tan diad sipan na arapen a pananalo to. . . Naaralan tayo a sayan sengegan so diad mundo, a sayan panarian so walad pegley tayo, tan saraman so onsumpa ed sikato so natalo.” Anggaman kuan, liknaen nen Woodrow Kroll, na The Christian Jew Foundation, a say managkabayo ed amputin kabayo et say Antikristo.

Insuhiri na arum a wala so limaran kabayo tan managkabayo, ya aliwan apatira lambengat. Panon so pikabat tayo no dinan ed saray patalos so susto? Panon so pakaseguro tayo a wala so sakey a suston pakatalos? Siopa kasin talaga irayan misteryon managkabayo ed Apocalipsis, tan no kapigan so inggapo na impankabayo ra?