“Manggunaet Kayon Mabiskeg”

“Manggunaet kayon mabiskeg ya onloob ed mainget a puerta, lapud dakel, ikuan ko ed sikayo, so mankaliktan ya onloob balet agda nayarian.”​—LUCAS 13:24.

1. Anto so pilalek na maslak a totoo?

TEPETAN si Robbie a manedad na anem-taon no akin a labay to so onla ed Kingdom Hall, tan sikato so onebat na: “Aralen ko so nipaakar ed si Jehova tan say Paraiso a ditan et siak so manbilay na andukey, andukey a panaon a kaibak iray makalakal ya ayayep.” Si kapinsan ton Dustin, a manedad na taloy-taon, so makaliknan tuloy nipaakar ed datin kurang na atateng to pian amtaen ya eksakto sanen inkelyaw to: “Labay ko so onla ed Kingdom Hall!” Say imbalikas nen Robbie, tan say nanaaralan nen Dustin ya ibalikas, so makapasagyat ed maslak a totoo​—bilay, andi-anggaan a bilay. Labay na totoo so “niliktar.” Balet panon? Kasin diad basta iyatendi ed saray relihyoson serbisyo?

2. (a) Akin a say kilalaban so agnagegemtan? (b) Panoy pangipanengneng na saray salita nen Jesus ed Lucas 13:24 ed no anto so nakakaukolan a para ed kilalaban?

² Say kilalaban so agnagamoran diad iyatendi ed saray miting odino diad anggan anton arum a dalan. Satan so libre, sakey a regalon manlapud Dios. Ingen, kakaukolan nen Jehova a Dios ed biang tayo so sagpot no kaliktan tayon awaten so regalo ton bilay ya andi-anggaan a bilay. (Roma 6:23) Anto iratan? Para ed sakey, say mabiskeg a gunaet ed serbisyo to! Sarayan kiwas so nepeg a tenyegen na puron apresasyon. Si Jesu-Kristo, ya Anak na Dios, so nantepetan ya aminsan na sakey a too: “Katawan, kasin saramay nilaban so daiset?” Say ebat nen Jesus so angabrasa ed aliwa lambengat ed managtepet noagta ontan met ed arum nin interesado ed kilalaban, a pati sikatayo. Inmebat: “Manggunaet kayon mabiskeg ya onloob ed mainget a puerta, lapud dakel, ikuan ko ed sikayo, so mankaliktan ya onloob balet agda nayarian.”​—Lucas 13:23, 24.

3. (a) Akin a say tepet na too so nikadkaduma? (b) Panon a sikatayo so inlanor nen Jesus ed ebat to?

³ Say tepet na toon agla abitla so ngaran to so nikaduma. Intepet to: “Kasin saramay nilaban so daiset?” ya aliwan, “Kasin siak so kaiba na saray daiset a nilaban?” odino, “Panon so kilaban ko?” Angangko ta say Judion pilosopya a limitadon bilang labat na totoo so mangungguna na kilalaban so amakiwas ed mausisan tepet to.a Antokaman so sengegan na inkamausisa to, tampol a tinebek nen Jesus so tepet a manlapud teorya na praktikal a panangiyaplika​—personal ya aplikasyon. Pinaskar to so nantepet a manisip no anto so nakaukolan ton gawaen pian nilaban. Balet nagkalalo nen say satan, lapud saray salita nen Jesus, “manggunaet kayon mabiskeg,” so wala ed porman dakel, nepeg a sikara so manenyeg ed sikatayon manisip nipaakar ed nengneng na panagdayew tayo.

4. Anto so nepeg tayon gawaen pian nagamoran so bilay ya andi-anggaan?

⁴ Say andi-anggaan a bilay, sirin, so aliwan magmainomay a nagegemtan a singa isipen na arum a totoo. Indanet nen Jesus so impasyan kimey, mantultuloy a sagpot, a singa say “iloob ed mainget a puerta.” Sayan panangipaskar a gunaet so pabiskegen na magnayon a pananisia, sakey a niletneg diad katutulok ed saray bangat nen Kristo. Ta pian nagamoran so kilalaban, nepeg a gawaen tayo so mas nen say ‘idengel ed saray salita to’; nepeg a sikatayo so mantultuloy diad ‘panggawa ed saratan.’​—Lucas 6:46-49; Santiago 1:22-25.

“Mipuligesgesan” Kayo la Natan

5. (a) Anto so atukoy diad saray salita nen Jesus, “Manggunaet kayon mabiskeg”? (b) Panon a saratan a salita so mangarum na lalon kabaliksan diad panmoria yo ed sagradon serbisyo?

⁵ Anto so kabaliksan na balikas a “manggunaet kayon mabiskeg”? Diad orihinal a Griego, say balikas so a·go·niʹze·sthe, a sinengeg ed salitan (a·gonʹ) a kabaliksan to so “pasen na palaslasan.” “Mipuligesgesan,” so impangipatalos na The Kingdom Interlinear Translation. Makapainteres, manlapud sayan parehon Griegon berbo et naala tayo so salitan Ingles ya “agonize.” Sirin umamengen so karaanan ya estadyum tan iretrato so gumagalaw a natan et manpapautot, odino manggugunaet a mabiskeg ed amin a pakayari to, pian nagungguna to so premyo. Sirin, anggaman say Griegon berbon asaglawi dia et nayarin teknikon termino diad pilalaslasan ed saray galaw ed Gresya, idadanet to so simbawa nen Jesus diad pangala na sigpot-kamarerwan kiwas. Say paspasaray a sagpot so agnayari ed satan.​—Lucas 10:27; ipareng so 1 Corinto 9:26, 27.

6. Akin a nepeg tayo natan so manggunaet a mabiskeg?

⁶ Kapigan tan diad panon kabayag so nepeg tayon “pipuligesgesan ya onloob ed mainget a puerta”? (Lucas 13:24, The New English Bible) Nengnengen a maapit iray salita nen Jesus ed Lucas 13:24 tan imanoen no panon so impangiduma to ed kaplesan, “manggunaet kayon mabiskeg,” diad arapen, “mankaliktan.” Sirin, natan la so panaon na pipuligesgesan. Mapatnag, saraman so asebelan diad iloob so manggawa ed satan diad panaon a kumbeniente labat ed sikara. Balet diad satan et sikato so atrasado la; say puerta na pankanawnawa so akaputan tan kinandadoan. Ituloy nen Jesus ya ibaga ed Lucas 13:25 a bektaman a say puerta so tinalakan na unabung, saray totoo so onggapon ontuktok tan mikakasi: “‘Katawan, lukasan mo kami.’ Balet sikayo so ebatan to, ‘Agko kabat no iner so nanlapuan yo.’” Agaylan makapaermen a pansumpalan so manaalagar ed saraman so agmanggawa na panagdayew ed si Jehova a manunan gagala ra ed bilay natan!​—Mateo 6:33.

7. Panoy pangipanengneng na Filipos 3:12-14 ed pirmin panaggunaet, tan akin a satan so nakaukolan?

⁷ Say pipuligesgesan tayo so mantultuloy a bengatla. Anggapo ni ed sikatayo so akaloob a kumpleto “ed mainget a puerta.” Saya so amoria nen Pablo. Say pilulumba to ed bilay so impasyan inagew-agew a sagpot. Insulat to: “Aliwan lapud agamoran ko la so amin na saya, odino lapud siak la so agawan ayadyari, noag ingen itultuloy ko so onkapet ed saman so akakapetan nen Kristo Jesus ed siak. Agagi, agko ipapasen so inkasiak ya akakapet la ed satan. Noagta sakey a bengatla so gawaen ko: Lingwanan so abenegan tan dampoten so wala ed arapen, siak so mantultuloy a mamaarap ed kalat pian nagungguna so tumang ya anawagan na Dios ed siak diad tawen ed si Kristo Jesus.” (Kien mi so italiko.)​—Filipos 3:12-14, New International Version.

8. (a) Anto so manesebel ed “dakel” diad bilay ya andi-anggaan? (b) Anton pasakbay so ipaknol na saya ed sikatayo?

⁸ Siopa ra so “dakel,” tan akin ya agda nayarian so onloob? Saray “dakel” so abidbir ed Kakristianoan, ilautla’d saray klasen klero. Sikara so mankunkuanan a kabat da si Jesus, a kabiangan na pamilya to, diad pangibabagan sikara so ‘angan tan akiinum ed sikato.’ Balet lapud kaliktan da so kilalaban ed dili ran termino, ya aliwan saray termino na Dios, sikara so sigpot ya impulisay nen Jesus tan sikara so impasen ton “managkimey na ag-inkatunong.” (Lucas 13:26, 27) Saray sinansakey ya atalakan diad pakaloob ed bilay ya andi-anggaan so nayarin mangisakup ni ed saraman so nginmiras diad sagradon serbisyo ra ed si Jehova tan natan et paspasaray labat so iyaasingger da ed tuan panagdayew. Say seseg da ed saray intereses na Panarian so nagmaliw a malainem-em. (Apocalipsis 3:15, 16) Tua, nayarin sikara mi so ‘walaan na sakey ya indengan na maridios a debosyon’​—kunwarin mibiang ed lawak na kimeyan tan onaatendi ed saray miting​—balet ta kulang na ebidensya ed nengneng na pananisian satan so peteg a puersa ed benegan na puron panagdayew. (Ipareng so 2 Timoteo 3:5.) Onsaew iran makamoria a say basta pankaliktan ya onloob “ed mainget a puerta” so aliwan magenap. Say sakey so nepeg a mipuligesgesan diad iloob.

No Akin a Diad “Mainget a Puerta”

9. Akin a say iloob ed mainget a puerta so mankaukolan na mabiskeg a panggunaet?

⁹ Say mainget a puertan mamaarap ed kilalaban so lukas ed amin. Balet saray “dakel” so agmalabay a mipuligesgesan diad iloob. Anto so arum a sengegan diad iloob ed mainget a puertan mankakaukolan na mabiskeg a panggunaet? Say sakey a too so nepeg ya ununan onggamor ed suston pikakabat ed katuaan na Biblia, tan kabaten to si Jehova a Dios tan si Kristo Jesus. (Juan 17:3) Kabaliksan na saya so pangitalirak ed saray tradisyon tan saray ugali na minumundon relihyon, a pati saraman so wala ed Kakristianoan. Kakaukolan to so panggawa ed linawa na Dios a singa ginawa nen Jesus legan a sikato so wadia ed dalin. (1 Pedro 2:21) Bilang sakey a dedikado, bautismadon Kristiano, nepeg a paliisan na sakey so materyalismo, imoralidad, tan say karutakan na mundo. (1 Juan 2:15-17; Efeso 5:3-5) Saraya so nepeg a lakseben tan sandian na saray singa-Kriston kalidad.​—Colosas 3:9, 10, 12.

10. Antoy pisiglaotan na dangka diad pakagamor tayo ed bilay ya andi-anggaan?

¹⁰ Saray “daiset” so makaamta ed kablian na seseg ed ministeryo, ya ulopen na panangipatnag ed bunga na espiritu, a pati say dangka. (Galacia 5:23) Diad tulong na masanton espiritu nen Jehova, sikara so mipuligesgesan a manalona ed laman da tan ipaarap da ed kalat diad bilay ya andi-anggaan.​—1 Corinto 9:24-27.

Anto So Kabaliksan na Saray Salita nen Jesus ed Sika?

11. (a) Diad antoran pasen na bilay so nayarin pankaukolan na arum a panggunaetan a mabiskeg, tan akin? (b) Diad anton kimey so nayarin pakapanggunaetan a mabiskeg na amin?

¹¹ Balanglan sikatayo so balobalon abautismoan odino aktibo la ed organisasyon nen Jehova diad pigamplo lan taon, agnayarin pakapuyen tayoray sagpot tayo diad pamaliket ed sikato. A singa malinlinew ya ipapanengneng na saray salita nen Jesus, sikatayo so nepeg a sigpot-kamarerwa diad debosyon tayo ed si Jehova, a mabulos ya onloob ed mainget a puerta ed anggaan na nayarian. Anggaman si Jesus so aglabat manasalaysay ed saray inaligwasan tan dinaakan diad kimey tayo ed Dios, para ed arum ed sikatayo, say mabiskeg a panaggunaet so nakaukolan diad pamaaligwas ed saray kondukta tayo odino diad pangitalirak ed saray mauges ya ugali ta pian sikatayo so ‘agmakapangiter na anggan anton sengegan na kigapolan.’ (2 Corinto 6:1-4) Arum ed sikatayo so mankaukolan na pangiter ed pirmin imano ed sigpot a programa na personal a panagaral pian say ‘aro [tayo] so ondaak komon a tekep na suston pikakabat tan sigpot a pakatebek.’ (Filipos 1:9-11) Siansian saray arum so mankaukolan a mangisekar na babaleg a sagpot diad iyatendi tan pibiang a maparanay diad saray miting ed kongregasyon, a pati say Panagaral na Libro ed Kongregasyon. (Hebreos 10:23-25) Balet amin tayo so makayarin onnengneng ed dilin personal a lawak na ministeryo tayo pian nengnengen no kasin sikatayo so tuan manggugunaet a mabiskeg diad panggagawa “ed kimey na ebanghelisador.”​—2 Timoteo 4:5.

12. Pian nasubok so sukat na espiritual a panaggunaet tayo, antoran tepet so itepet tayo?

¹² Para ed ondaraak a bilang, say iyaaligwas diad panggugunaet dan mabiskeg diad pamaliket ed si Jehova so nanggawa ed sikaran kualipikado a para ed panag-auxiliary payunir, regular payunir, odino diad serbisyo ed Bethel. Balet kumusta ka? No sika so sakey a manangipalapag na Panarian, kasin nayarian mo so mibiang ed panag-auxiliary payunir a kimey diad pigaran danay ed sakey taon odino anggan magmaliw ni ingen a regular payunir? No sika la so sakey ya auxiliary payunir, kasin dadampoten mo so kimey na pagmaliw a regular payunir? No andi, akin ya agmo isipen itan? Diad onia et sika so nabendisyonan diad pamayubo na mas lalon maapit a relasyon ed si Jehova a Dios tan ed si Jesu-Kristo.​—Salmo 25:14.

Kasin Makapanggunaet Ka ta pian Makapampayunir?

13. (a) No labay mo so manpayunir, antoran duaran bengatla so makana? (b) Ta pian makapampayunir, antoran pasen na bilay so nayarin mankaukolan na panangiyarunsa?

¹³ No nayarian mo so manregular payunir balet ta agmo gagawaen, kasin nayarian mo so “mipuligesgesan” a manggawa ed saray panangiyarunsa ed bilay mo ta pian makapampayunir? Duaran bengatla so makana. Ununa, nepeg a sika so nawalaan na pilalek. Komadua, nepeg a sika so nawalaan na saray dugan sirkumstansya. No sika so andian na pilalek, satan so ipikasim. Mitongtong ed saray payunirs. Padaaken mo so kaplesan a kimey mo bilang manangipalapag ed kongregasyon. Mibiang ed kimey na panag-auxiliary payunir kapiganman a nayari. No saray kipapasen mo so agmangabuloy ed ontan a serbisyo natan, nengnengen no kasin nagawaan so panangiyarunsa. Say sakey ya asawan-biin impleado so nayarin agla nakaukolan a mantrabaho. Say sakey a nanretiro la so nayarin agla nakaukolan a mantultuloy nin mantrabaho. Say atagey ya estandarte na panagbilay, magastos iran bakasyon, saray sankabaloan a kotse, tan arum ni, so aliwan makanakana ed bilay.​—Lucas 12:15; 1 Juan 2:15-17.

14. (a) Akin a say sanasawan abitla so agkontenton mansiansia a bilang manangipalapag ed kongregasyon? (b) Anton kalat so inggeter da ed saray anak da?

¹⁴ Sakey ya aman walaan na taloran ilalak a lalaki, duara so aliwa nin tin-edyer, so ginmapon nampayunir ed apalabas lan anem taon. Akin? “Kaliktan ko so manggawa na mas dakel,” so impaliwawa to. “No nayarian ko so manregular payunir tan agko gawaen, siak so agmanbibilay a tukoy ed dedikasyon ko.” Say asawa to so ginmapo met a regular payunir. Akin? “Siak la so auxiliary payunir a maparanay ed loob na apatiran taon la tan diad kaunoran et amoriak a satan so mainomay,” so inkuanto. “Kinaliktan ko so mibiang a nanagnap ed sayan aglan-balot-naulit a kimey tan mangiletneg na manepeg ya ehemplo ed saray anak mi.” Saratan a sanasawa so akaaral na katuaan kayari na impanaral da ed unibersidad. “Kinaukolan na atateng mi so panaral mi na apat taon ed kolehyo,” so imbaga na ama. Sirin, antoran kalat so inggeter da ed saray anak da? “Impaamta mi ed saray anak min lalaki a sikara so kaliktan min manpayunir tan mantrabaho ed Bethel na anggan apat taon lambengat.”

15. (a) Nisengeg ed antoran rason so nanggunaetan na arum a manserbi bilang regular payunirs? (b) Nisengeg ed anton rason a kaliktan mo so mibiang ed sigpot-panaon a serbisyo?

¹⁵ Saray onggendan so rason no akin a saray arum so nandesidin magmaliw a regular payunir:

“Siak so ag-ontatatken ed espiritual, a satan so angonigon ed siak.” (Robert H.)

“Siak so agbalot kontento a bilang sakey a maparanay a manangipalapag.” (Rhea H.)

“Say panagpayunir so angiter ed bilay ko na inkiwanwan tan gagala.” (Hans K.)

“Kinaliktan kon lingkoran si Jehova a nagnap, tan say panagpayunir so dalan ko diad panggawa na ontan.” (Charanjit K.)

“Siak so magbabawi no agko usaren iray biskeg ko, pakayarik, tan say inkatobonbalok a mibiang ed sayan baleg a kimey.” (Gregory T.)

“Si Jehova so mamibendisyon lambengat ed saray sagpot. Nakaukolan kon iter ed sikato so bengatlan bendisyonan.” (Graceann T.)

“Say panagpayunir so tinmulong ed siak a mangibalikas no panon so liknaan ko ed si Jehova.” (Marco P.)

“Say pantrabahon sigpot-panaon ed sekular so ag-angitarok ed siak na liket a naimatonan ko ed limog na saray payunirs.” (Nancy P.)

Antoran rason so niyarum yo ed sayan listaan?

Kasin Gagawaen Mo So Anggaan na Nayarian Mo?

16. Kasin saray payunirs lambengat so manggunaet a mabiskeg? Ipaliwawa.

¹⁶ Dakel a Tasi nen Jehova so angusisan simamatua tan sipipikasi ed personal a kipapasen da tan aromog dan gagawaen da so anggaan na nayarian da ed leksab na kaplesan a sirkumstansya ra. Nayarin sakey ka ed sikara. No ontan, ipapuso. Si Jehova tan say Anak to so manatalima ed sika tan tuan apresyaen to so sigpot-kamarerwan serbisyo. (Ipareng so Lucas 21:1-4.) Alimbawa, lapud aliwan maapabor a kipapasen ed pulitika odino ekonomya, diad arum iran bansa et saray agagi tayo so mankaukolan a mantrabaho na siamiran oras ed sanagew, limara odino anemiran agew ed sakey simba, pian nagamoran daray nakakaukolan ed bilay. Diad sakey a bansan say kimey na saray Tasi nen Jehova so mapeget a sinebelan na gobierno, saraman so payunir​—tan diad sarayan bansa et ondarakel so bilang na payunirs​—et gendagendat a saray retirado, saray tobonbalon mantatrabaho ed labi, tan saray kainaan (a walaan na saray anak) a sikara so impuera na Estado a manlapud sekular a trabaho.

17. Panon a say kipapasen nen Epaprodito so mangipanengneng ya agsusukaten nen Jehova so biskeg na panaggunaet tayo lambengat diad karakel na kimey a gawaen tayo ed serbisyo to?

¹⁷ Ingen nayarin ikuan mo, ‘Komon ta siak so walaan na lalon biskeg ed pisikal. No siak lambengat so wala ed kalangweran!’ Balet agnadidismaya. Say panagbanikel tayo so agsusukaten na karakel na kimey a gawaen tayo diad sagradon serbisyo ed Dios. Nanonotan si Epaprodito? Sanen sikato so nansakit, say karakel na impasyan kimey a nagawaan to ed “kimey na Katawan” so agmipara ed saman so agawaan to sanen sikato so makmaksil. Ingen ta sikato so kinomendaan nen Pablo diad panaggunaet to. Diad tua, a singa impanengneng nen Pablo, nepeg tayon ‘itultuloy a pablien so lalaki tan bibii ed ontan a nengneng.’​—Filipos 2:25-30.

18. Panon a saramay walaan na limitadon sirkumstansya et niyalibansa ra so sigpot-panaon a serbisyo ed kongregasyon? (b) Anto so nayarian mon gawaen pian nipaseseg so espiritu na panagpayunir ed kongregasyon yo?

¹⁸ Anggaman kuan, wala so bengatlan nagawaan mo diad pangiyalibansa na sigpot-panaon a serbisyo ed kongregasyon. Anto’tan? Panggunaetan mon mabiskeg so panangipatnag ed espiritu na panagpayunir. Alimbawa, no diad kaplesan et agmo nayarian so magmaliw a payunir lapud saray obligasyon ed pamilya, kasin nibulos mo so arum ed pamilyam​—say asawam, anak mo, agim a laki, odino agim a bii​—a manpayunir? Saraman so nayarin maletey ed pisikal odino andi et agmakayari so makapangipanengneng na peteg ya interes ed saraman so makayarin manpayunir, diad piulop ed sikara ed lawak na kimeyan legan ya iyabuloy na saray sirkumstansya. (Ipareng so 1 Corinto 12:19-26.) Diad onia et amin ed kongregasyon so makapanggunaet diad pangidanet ed sigpot-panaon a serbisyo. Saray pansumpalan so makapaseseg ed amin!

19. Anto so nepeg a determinasyon tayo?

¹⁹ Anto so kabaliksan na panggunaet mon mabiskeg? Kasin kabaliksan to so iyaligwas a mamaarap ed bautismo? Panalona ed makapuy ya ugali? Pamabiskeg na relasyon mo ed si Jehova? Kasin kabaliksan to so panag-auxiliary payunir? Panag-regular payunir? Serbisyo ed Bethel? Antokaman a nakaukolan to ed sika ta pian makapanggawa na iyaaligwas ed espiritual, makabaliksan la natan so panggunaet mon mabiskeg. Kanian sirin, komon ta amin tayo so mantultuloy a mipuligesgesan diad iloob ed mainget a puerta a mangitonton ed bilay ya andi-anggaan!

[Paimano ed Leksab]

Saray Punton Imanoen

◻ Anto so labay nen Jesus ya ibaga sanen insimbawa to, “Manggunaet kayon mabiskeg”?

◻ Kapigan tan panon so kiyaplika na saray salita nen Jesus ed sika?

◻ Akin a saray “dakel” so agmakayarin onloob ed mainget a puerta?

◻ Panon a saraman so walaan na limitadon sirkumstansya so nayarin manggunaet?

◻ Diad panon kabayag so nepeg tayon pipuligesgesan ya onloob ed mainget a puerta?