Say Papa tan say Apocalipsis
AVERTING ARMAGEDDON so titulon inusar na duaran managbalita ed 1984 a libro ra diad agano nin pulitika na papa. Si Gordon Thomas tan si Max Morgan-Witts so manbabalita la ed inkapapa diad masulok lan 17 taon. Anton kabaliksan so nagamoran tayo ed sikara no nipaakar ed saray atagey ya opisyal na Iglesia Katolika nipaakar ed apocalipsis?
Unong ed sarayan managbalita, si Monsignor Emery Kabongo, personal a sekretaryo nen John Paul II, so angikuan: “Say Papa so singa sakey ya espiritual a Hercules a manasalin mamasiansia ed pansian na saray mabibiskeg a pakayari, a manasalin mamukpuk ed Armagedon.”
Ompatnag a saray papangulo na iglesia so nagkalautlan mapaga ed sankagloboan a kadederal diad panamegley na gawa na too imbes a nipaakar ed manpilin pisasalet na Dios diad saray kurang na too—say apocalipsis ya ipapasakbay na Biblia. Sirin, ibabaga na Averting Armageddon: “Diad limog na saraman so kakaiba nen Kabongo, anggapo so akinpaway a tanda na kapepegetan diad panasalin mangipukay ed apocalipsis a nasisiim da. . . Balet diad benegan na sayan kurang et wala so kigtot a sikato so direktan resulta na internasyonal Synod of Bishops. Nantotongtong ira ed makapasinagem a naimano, a paneermenan da so ‘singa-bakal ya inkaagresibo, karawalan tan terorismo, say panagpaalagey ed saray simpenan na armas a namparan kumbensyonal tan nagkalautla ed saray armas nuklar, tan say eskandaloson saliwan ed amin ya armas ed bakal.’” Anggan say papa so alanor. Imbalita nen Thomas tan si Morgan-Witts a diad saray latip-na-libro ed panagaralan to et singa say International Defense Review, The Problems of Military Readiness, tan Surprise Attack: Lessons for Defense Planning. Inyarum da:
“Maapit ed saray encyclicals ed saray libron manasalaysay ed sakey a teman mamapabiskeg ed Papa: eskatologo, say panagaral ed saray bangat na Biblia a manasangsang ya inaguraan na Dios so Panarian To ed dalin diad panamegley na saray serye na ‘nagawgawa’ a mangikaput ed sakey a panaon. Si John Paul so manisia ed petang . . . a, diad nayarin sakbay na anggaan na siglo, et say bengatlan ‘desisibo’ so nayarin mamalaspas ed mundo. Nayari kasin salot, say komaduan Andeket a Patey? Odino kelang o eras diad agbalot naisip a kalaknab? Odino bakal nuklar? Mabetbet a tatakotan to natan so saginonor; angangko, sikato so naamtaan a manmomorekdek, sikato so niakar ed betang ya ulo na Iglesia a kaleganan to et nayarin say unor a dekada na mundo sakbay a satan so permanentin punasen na desyang nuklar.”
Itatawag na Averting Armageddon ed imano so simbolikon “doomsday clock” a sikato so maparanay a nipapabitar ed Bulletin of the Atomic Scientists. Sanen sayan “relo” so inmunan nipalapag nen Disyembre 1947, sikato so nilira ed pitoran minutos sakbay na pegley-labi diad pangipanengneng “no panon so inkaapit na mundo ed nuklar ya Armagedon.” Kayari na 1972 arms limitation agreement (SALT), saray lima na relo so inderen impaatras ed 12 minutos sakbay na pegley-labi. Nen 1984 insulat nen Thomas tan Morgan-Witts: “Say relo natan so wala ed taloran minutos lambengat sakbay na pegley-labi. Saya so sankaasinggeran ed desyang diad loob na talumplon taon.”
Anggaman ed anggan anton sagpot na papa “a mamukpuk ed nuklar Armagedon,” nen Nobyembre 1985, saray lima so siansia nin angipanengneng a wala lambengat so taloran minutos ni. Sikatayo, anggaman kuan, so agkomon talonaan na kapagaan ed balanglan saray nasyones so maneral ed katooan. Imbes a salien a paliisan so apocalipsis, makabat itayo no anapen tayo so dalan na Dios ed kilalaban a manlapud apocalipsis, lapud saya so seguradon “onsabi ed interon panaayaman a dalin.”—Apocalipsis 3:10.