“Tinapay na Bilay” Akatarya ed Amin

“Siak so mabilay a tinapay a linmeksab a nanlapud tawen; no siopaman et mangan ed sayan tinapay sikato so manbilay na ando lan ando; tan, diad katuaan, say tinapay ya iter ko et say laman ko a nisesengeg ed bilay na mundo.”​—JUAN 6:51.

1. Anton makapasinagem a kipapasen so aarapen na katooan natan?

SAY mundo na katooan so abayaglan susustinien na tinapay, say sankalaknaban a taganon kakanen ed dalin. Matukotukoy, satan so atawag na sekder na bilay. Balet natan say eras ed tinapay so nagmaliw a makapasinagem a salisalan. Say eras tan ukol so mangaapekta natan ed sakey a kakapat na manaayam ed dalin. Agano ni, inkuan na The Globe and Mail na Toronto, Canada, “Eras, singa bakal, agto kabat iray ketegan.” Inaon na peryodiko so sakey ya ehekutibo na emerhensyan pakurang na NU ed Africa a bilang pasakbay a say Africa so walad tambib na “sakey ed saray sankabalgan a desyang ed too, sakey ed saray sankabalgan ya angat ed too, ya agtayo nin balot nidungetan.”

2, 3. (a) Saray kakisiran ed tagano so kabiangan na anton tanda? (b) Panon so karesolbe na problema ed tagano? (c) Anto ni so nakaukolan, tan anton maliket a paseguro so iter na Isaias 25:8?

² Impropesiya nen Jesus a say kakisiran na tagano so kabiangan na tanda na kiwawala to ed pakayari na Panarian. (Mateo 24:3, 7, 32, 33; 25:31, 32; Lucas 21:11) Agaylan sikatayo so maliket a say Panarian to so asingsingger la! Magano la, sayan maglorian ari so mangiyurak ed amin a kakabusol na katooan, ya ekalen toray ag-inkahustisya ed pulitika ya angitarok na ontan lan maruksan paniirap. Insan amin a totoo so manliket la ed satan diad pakaawat da na tinapay ed kada agew.​—Mateo 6:10, 11; 24:21, 22; Daniel 2:44; Uliran 29:2.

³ Diad silong na matunong a gobierno, say maabig a dalin tayo so makayarin mamawala na “panlippua” ed tagano, magenap a mamenek ed mas dakel nen say peles a populasyon na mundo. (Salmo 72:12-14, 16, 18) Si Jehova so manggawa na “sakey a piesta” na maabig iran bengatla a para ed totoo to. (Isaias 25:6) Balet nakaukolan so bengatlan kaaruman. Legan a saray taon so onlabas, kasin saray totoo so siansian mansakit tan ompatey? Makapaliket, intuloy na Isaias 25:8 ya imbaga so nipaakar ed si Jehova: “Sikato a peteg so mangakmon ed patey diad ando lan ando, tan say Soberanon Katawan a Jehova so peteg a mamunas ed saray lua a manlapud amin a kalupaan.” Panon so kasumpal na saya?

Maaron Probisyon nen Jehova

4. Anton maaron probisyon so inyuksoy nen Jehova ed Ehipto?

⁴ Sanen si Jose so administrador na tagano ed Ehipto, wala so daakan ya ilik. Saman so lapud si Jose, kayari na impanuro nen Paraon ed sikato, et namparaan a sikakabat a para ed nipasakbay a pitoran taon na eras, tan simamaaron inyarum nen Jehova so bendisyon to. (Genesis 41:49) Wala so daakan ya onkana ed amin, tan wala ni so subra. Sanen si Jacob ya ama nen Jose, saray agagi nen Jose, tan saray pamilya ra so linmeksab a mikasakey ed si Jose ed Ehipto, sikara so agunggunaan na abalbaleg diad saman a madibinon panangiwanwan. Agpanduaruwaan a saraman ya Israelitas so nagmaliw a sikakabat met a tuloy ed nilebaduraan a tinapay na minasan-trigo, unong a saya so mapatnag a nanlapud Ehipto.

5. (a) Panon so pangitarya nen Jehova na sustento ed kalawakan? (b) Siopa so akinabang ed Israel ed sayan bendisyon, tan akin?

⁵ Saginonor, inter nen Jehova so malaknab nin maaron probisyon a para ed totoo to. Saman so sanen saray minilyon ya Israelitas so anaynan ed Ehipto pian ondalan ed kalawakan na Sinai. Panon so kalegpet na sayan baleg ya ulop diad saman ya amaga, aliwan-makaaron kabueran? Anggaman si Jehova so sinmanok diad kakulangan da na pananisia, “nilukasan [to] so puerta na tawen. Tan intultuloy toran pinauranan na mana a kanen, tan sikara so inikdan to na ilik ed tawen.” “Sikara so intultuloy ton pinesel na tinapay ed tawen” diad 40 andukey a taon. (Salmo 78:22-24; 105:40; Exodo 16:4, 5, 31, 35) Tan aglilingwanan ya agbukbukor na saray Israelitas diad impangan ed mana. “Sakey a baleg ya alaoklaok ya ulop” na aliwan-Israelita so angagamil na pananisia ed si Jehova tan akiulop ed sikara diad impaway a nanlapud Ehipto. Intarya met na Dios so mana.​—Exodo 12:38.

6. (a) Anton babaleg a pankaukolan so wala ed too, tan akin? (b) Anto so idadanet na saray bagat na Israel, tan anto so iyaanino ra?

⁶ Anggaman kuan, say katooan so naynay a walaan na pankaukolan a babaleg nen say diad literal a “tinapay a manlapud tawen.” Anggan saramay angan ed mamilagron intaryan mana so tinmatken tan inatey, lapud say atawir na toon makasalanan a kipapasen so manggawa ed patey ya agnapaliisan, anggan anto so kanen to. (Roma 5:12) Saray bagat na Israel so angitarya na sakey a paraan diad pamasiansia na maabig a relasyon ed Dios, balet saraman a bagat so mangidadanet met ed inkamakasalanan na nasyon. Sikara so “agbalot akayarin mangekal a nagnap ed saray kasalanan.” Nagkalalo ni, saraman ya iyaapay so angiyanino ed “sakey a bagat” nen Jesus, a nitaryan mangekal ed saray kasalanan a “magnayon.” Manlapud sayan nipaatagey a posisyon ed tawen, nayarian la nen Jesus a pakurangen so merito na satan a bagat.​—Hebreos 10:1-4, 11-13.

“Tuan Tinapay a Nanlapud Tawen”

7. (a) Saray salita nen Jesus ed Juan kapitulo 6 so nepeg a moriaen ed anton balon konteksto? (b) Akin a binaat nen Jesus so ulop?

⁷ Isublay tayo natan so Juan kapitulo 6. Saray salita nen Jesus dia so aliwan katuloyan na samay nikurit ed kapitulo 5. Say konteksto so duma, lapud sananey a sakey taon so linmabas. Sikato la natan so 32 K.P. Say pasen so aliwa lan diad limog na saray mansimpisimpitan a Judios ed Jerusalem noagta diad limog na saray kabanyakan a totoo ed Galilea. Kapkapanggawa nen Jesus na milagro diad impamakan to ed 5,000 lalaki a manlapud limaran tinapay a sebada tan duaran angkelag a sira. Diad ontumbok ya agew, say ulop so anumbok ed si Jesus, a manatalaran ed sananey a libren panangan. Kanian imbaga nen Jesus ed sikara: “Siak so aanapen yo, aliwan lapud anengneng yoray tanda, balet lapud sikayo so angan a manlapud saray tinapay tan naksel kayo. Mankimey, aliwan diad taganon natawtaw, noagta diad taganon mansiansia a para ed bilay ya andi-anggaan.” Si Jesus so imbaki nen Ama ton mangitarya na ontan a tagano a para ed amin a mangagamil na pananisia ed sikato. Saya “so tuan tinapay a nanlapud tawen,” a tekep na lalon magnayon iran epekto nen say literal a mana a kinan na saray inmunan Israelitas.​—Juan 6:26-32.

8. Panon so pakagamor na sakey ed andi-anggaan a bilay?

⁸ Intuloy nen Jesus ya impaliwawa so gunggunan nagamoran a manlapud satan a “tagano,” ya imbaga to ed sikara: “Siak so tinapay na bilay. Siopaman ya ondago ed siak so aglan balot naerasan, tan siopaman a mangagamil na pananisia ed siak so aglan balot napegaan. . . . Ta saya so linawa na Amak, a siopaman a makanengneng ed Anak tan mangagamil na pananisia ed sikato so nawalaan na andi-anggaan a bilay, tan sikato so paolien ko ed unor ya agew.”​—Juan 6:35-40.

9, 10. (a) Panon so piduma “na tinapay na bilay” ed mana? (b) Unong ed Juan 6:42-51, para ed siopa so angiteran nen Jesus na laman to? (c) Panon a saraya so ‘mangan ed laman to’?

⁹ Saraman a materyalistikon Judios so namburildil ed sarayan salita. Anengneng da a si Jesus so sakey lambengat ya ilalak nen Jose tan si Maria. Sikara so pinasakbayan nen Jesus: “Tundaan yo la so mannguronguro ed limog yon dili. Anggapo so toon makadago ed siak likud no say Ama, ya angibaki ed siak, so mangiyasingger ed sikato; tan sikato so paolien ko ed unor ya agew.” Insan inulit to: “Siak so tinapay na bilay. Saray atateng yo so angan na mana ed kalawakan tan ingen inatey ira. Saya so tinapay a linmeksab a nanlapud tawen, ta pian siopaman so mangan komon ed satan tan ag-ompatey. Siak so tinapay na bilay a linmeksab a nanlapud tawen; no siopaman et mangan ed sayan tinapay sikato so manbilay na ando lan ando; tan, diad katuaan, say tinapay ya iter ko et say laman ko a nisesengeg ed bilay na mundo.”​—Juan 6:42-51.

¹⁰ Kanian sirin, saman so para “ed bilay na mundo”​—say interon mundo na nayarin narondon a katooan​—so angiteran nen Jesus ed laman to. Tan “siopaman” ed mundo na katooan a simbolikon mangan ed satan a “tinapay,” diad pangipanengneng na pananisia ed mananondon a pakayari na bagat nen Jesus, so nayarin onloob diad dalan a mamaarap ed andi-anggaan a bilay. Nia, say “baleg ya alaoklaok ya ulop” ya akibiang ed saray Israelitas diad impangan ed mana ed kalawakan so angiyanino ed baleg ya ulop na “arum a karnero” nen Jesus a, kaiba na alanaan a nakdaan na “Israel na Dios,” so mamangan natan ed laman nen Jesus diad piguratibon pantalos. Saya so gagawaen da diad pangaagamil da na pananisia ed bagat to.​—Galacia 6:16; Roma 10:9, 10.

11. Antoran malaknab a salita nen Jesus so angigtot ed saray Judios, tan akin?

¹¹ Diman ed Galilea, dakel ed saray dumerengel nen Jesus so akebbiew diad paliwawa to. Kanian legan a wala ni ed tema nipaakar ed laman to, inkuanto ed sikara: “Tua kuan ko ed sikayo, No agyo kanen so laman na Anak na too tan inumen so dala to, andian kayo na bilay ed inkasikayon dili. Siopaman a mangan ed laman ko tan oninum na dalak so nawalaan na andi-anggaan a bilay, tan sikato so paolien ko ed unor ya agew; lapud say laman ko so tuan tagano, tan say dalak so tuan iinumen.” (Juan 6:53-55) Peteg a makapakebbiew! Aliwa lambengat a say ideya na kanibalismo so amasanok ed saraya a Judios noagta diad Ganggan ed Levitico 17:14 a positibon insebel to so pangan “ed dala na anggan anton nengneng na laman.”

12. (a) Anto so idadanet dia nen Jesus? (b) Antoran kasulatan so mangipanengneng a saya so agnigetar ed saray kaiban mananawir nen Jesus?

¹² Siempre, idadanet dia nen Jesus a siopaman a makagamor ed andi-anggaan a bilay so nepeg a manggawa na ontan diad letnegan na pangagamil na pananisia ed bagat a ginawa nen Jesus ed saginonor diad impangiyapay to ed ayadyarin atooan a laman to tan inkalbo to so dala to. (Hebreos 10:5, 10; 1 Pedro 1:18, 19; 2:24) Sayan probisyon so agnigeter ed saray kaiban mananawir nen Jesus. Nepeg met ya isakup to so “baleg ya ulop” a makaliktar “ed baleg a kairapan,” lapud saraya “so anguras ed saray kawes da tan pinaputi da ra ed dala na Kordero.” Diad impanisia ra ed bagat nen Jesus, a singa impatnag na panangisaklang da ed Dios na “sagradon lingkor,” so mansumpal diad kipreserba ra ed sankabalgan a panaon na kairapan ed dalin. Mipadpara, si Rahab so niyabawag a matunong tan akaliktar sanen sigpot a dineral nen Josue so Jerico.​—Apocalipsis 7:9, 10, 14, 15; Josue 6:16, 17; Santiago 2:25.

“Bilay ed Inkasikayo”

13. (a) Diad pangipareng ed Juan 5:26 ed Juan 6:53, anto so naimano? (b) Anton kaslakan a gramatikan inkatibukel ed Griego so ontulong ed sikatayon mantalos ed Juan 6:53? (c) Sirin, anto so kabaliksan na pakawalaan na “bilay ed inkasikayo,” tan diad siopa so aplikaan na sarayan salita?

¹³ Diad Juan 6:53, 54, insimbang nen Jesus so “andi-anggaan a bilay” diad pakawalaan na “bilay ed inkasikayo.” Sirin, diad sayan konteksto, say balikas a “bilay ed inkasikayo” so singa walaan na miduman kabaliksan ed saman so inusar nen Jesus ed Juan 5:26. Saray balikas ed parehon gramatikon inkatibukel a singa walaan na “bilay ed inkasikayo” so nausar ed arum a pasen ed Griegon Kasulatan. Alimbawa: “Nawalaan kayo na asin ed inkasikayo” (Marcos 9:50) tan “mangawat ed inkasikayo na sigpot a tumang” (Roma 1:27).a Diad sarayan ehemplo, say balikas so agmangituturo na pakayarin mangiter ed asin odino tumang ed arum. Noag ingen, say akindalem ya inkakumpleto o inkagnap so inturo to. Sirin, unong ed konteksto na Juan 6:53, say pakawalaan na “bilay ed inkasikayo” so mankabaliksan dia na iloob ed mismon inkagnap ed bilay. Say “melag a pulok” na mananawir na Panarian so makaeksperiensia ed saya diad kioli ra ed katawenan. Say “arum a karnero” so managmak ed saya diad kayari na panampot na sanlibon taon, sano sikara so nasubok tan niyabawag a mantunong a para ed andi-anggaan a bilay ed Paraison dalin.​—1 Juan 3:2; Apocalipsis 20:4, 5.

14. Siopa ni so nagunggunaan ed “tinapay a nanlapud tawen,” tan panon?

¹⁴ Saray arum, met, so makagungguna a manlapud sayan “tinapay a nanlapud tawen.” Inkuan nen Jesus ed sakey a ‘mangan na laman to tan oninum na dala to’ balet ompatey: “Sikato so paolien ko ed unor ya agew.” Natalosan a saray alanaan a Kristianos a nanaugip ed patey so napaoli diad tanol “na unor a trumpeta,” a nagawa legan na “ipapatnag” nen Jesu-Kristo ed gloria na Panarian. (1 Corinto 15:52; 2 Timoteo 4:1, 8) Balet kumusta so prospektibon “arum a karnero” a naugip ed patey? Saray salita nen Marta ed samay panaon ya impatey nen Lazaro so makapainteres dia, lapud diad saman a panaon et saray matakot-ed-Dios a Judios so andian na ilalo noag say mangaraldalin a kioli. Saray pananisia nen Marta so nibalikas ed sarayan salita: “Kabat a sikato [Lazaro] so ombangon ed kioli diad unor ya agew.” (Juan 11:24) Sikatayo a manbibilay natan ed kiwawala nen Kristo so makapanilalo sirin a saray matoor ed “baleg ya ulop” a naugip ed patey so nawalaan na masasakbay a kioli dia ed dalin, ta pian sikara lamet so nayarin mangan ed “tinapay a nanlapud tawen,” dingan na panilalo ed andi-anggaan a bilay. Agaylan engranden ilalo itan, sakey ya ilalon nipaseguro a si Jesus a mismo so apaoli a nanlapud saray inaatey!​—1 Corinto 15:3-8.

“Pikakasakey ed si Kristo”

15. Saray salita nen Jesus a “mikasakey ed si Kristo” so onaplika ed siopa, tan akin ya ontan so ebat yo?

¹⁵ Intuloy nen Jesus: “Siopaman a mangan ed laman ko tan oninum ed dalak so mansiansian mikasakey ed siak, tan siak so mikasakey ed sikato.” (Juan 6:56) Saya, sirin, so tua ed “siopaman” a mangagamil na pananisia ed bagat nen Jesus, tekep na ilalo ed pakawalaan na ‘bilay ed inkasikato.’ Amin a mangipatnag na ontan a pananisia so ondateng “diad pikakasakey ed” si Jesus. Siempre, say “baleg ya ulop,” a walaan na mangaraldalin ya ilalo, so aliwan “mikakasakey ed si Kristo” diad pantalos a magmaliw a kaiban mitatawir ed sikato, saray membro na nobya to a mangawat na mangatatawen a kioli a singa inkioli to. (Roma 8:1, 10; 1 Corinto 1:2; 2 Corinto 5:17; 11:2; Galacia 3:28, 29; Efeso 1:1, 4, 11; Filipos 3:8-11) Ingen amin a walaan na mangaraldalin ya ilalo so, diad tua et nepeg a, walad sigpot a pitunosan ed Ama tan ed Anak diad pikabat tan panggawa ed “ayadyarin linawa na Dios,” anggan singa unong a tua ed “melag a pulok.”​—Roma 12:2; ipareng so Juan 17:21.

16. (a) Diad antoran makanan dalan a saray amin a mangaagamil na pananisia ed bagat nen Kristo “so mikakasakey ed” si Jesus? (b) Diad anto so isindag na inkasaksakey da ed gagala tan sagpot?

¹⁶ Kanian sirin, say sakripisyon bili na laman tan dala nen Kristo so akatarya ed amin natan a mangagamil na pananisia, tan amin a mangipalugar na inkasikara ed satan so, diad saray makanan dalan, et makayarin “mikasakey ed” si Jesus. Amin so magmaliw a kabiangan na sankatalbaan a pamilya nen Jehova a Dios. Diad sarayan maatap a “kaunoran iran agew,” panggagayagaan da so sankamundoan a pankakasakey ed pananisia, gagala, tan kimey. Diad pangaagamil na pananisia ed si Jesus, ayarian dan “gawaen so kimey a babaleg” diad kalaknab nen say agawaan nen Jesus ed dalin. Tan imanoen a saray minilyon a “baleg ya ulop” natan so manitibukel na 99.7 porsiento ed saraman so manggagawa ed kimey nen Jehova ed sayan panaon. (Juan 14:12; Roma 10:18) Sayan inkasaksakey ed gagala tan sagpot so nisindag ed engranden sankagloboan a panagtasi tan mabulos a pananuporta ed saray panagpaalagey a programa na Watch Tower Society. (Salmo 110:3) No kaunongan karakel ed mundo na katooan so manisia ni tan ondago ed sayan mabmablin pankakasakey so nanengneng tayo ni. Say agano nin report so mangipanengneng a 3,024,131 so aktibon Tastasi.

17. Antoran punto so nepeg ya apresyaen na amin ya onatendi ed Memoryal?

¹⁷ Nailalon a dakel iran interesadon totoo so midagup ed saraman so onatendi ed 1987 a selebrasyon na Memoryal. Minilmilyon ed “arum a karnero” so presente ed satan, a kaiba na mandaiset a nilibo na “melag a pulok”​—amin so mangapresyan tuloy ed maaron probisyon nen Jehova ed panamegley nen Kristo, a bidbiren da ya agaylan makana so laman tan dala nen Kristo. Anggaman kuan, amin so nepeg a mantebek no iner so talindeg da. Say pibibiang ed saray emblema ed Memoryal so agmangiter na bilay ya andi-anggaan. Saraya so simbolo na bagat nen Jesus, ya inmunan inmaplika a nisiglaot ed “balon sipanan.” Saraman so alanaan a nitarok ed satan a sipanan, tan sikara lambengat, so manepeg a mibiang ed saray emblemas. Say sakey so balanglan wadtan ed satan a balon sipanan odino andi. (1 Corinto 11:20, 23-26) Saraman so anggapo ed balon sipanan tan intarok nen Jesus ed sakey a sipanan nipaakar ed sakey a panarian so agmibiang ed saray emblema ed Memoryal, balet siansia nin nepeg dan bidbiren ya agaylan importante ed sikara so nibagat a laman tan dala nen Jesus. (Lucas 22:14-20, 28-30) Sayan bagat so paraan a ditan et makagamor ira na andi-anggaan a bilay ed dalin.

18. Anton liket so mansumpal diad malinew a pakatebek ed amin a kabaliksan na bagat nen Jesus?

¹⁸ Komon sirin ta nasabi tayo iyan okasyon na Memoryal na malinew a pakatebek ed amin a kabaliksan na bagat nen Jesus ed katooan. Komon ta saraman so wala ed “melag a pulok” so mamabli ed inkatawag da, tan komon say ombabaleg ya ulop na “arum a karnero” so manliket diad panilalo ed pakawalaan na ayadyarin mangaraldalin a ‘bilay ed inkasikara,’ legan a pablien dan tuloy so pikakasakey da, anggan natan, ed Ama, ed Anak, tan diad mandaiset a bilang na alanaan a nakdaan a wadia ni ed dalin. Agaylan sikatayo so maliket a “say tinapay na bilay” so akatarya natan ed amin!

Paimano ed Leksab]

Saray Tepet ed Panrepaso

◻ Nen 32 K.P., sinalita nen Jesus so anton duaran nengneng na mana, a nitarya ed siopa?

◻ Siopa so iimbitaan nen Jesus a ‘mangan ed laman to tan oninum ed dala to,’ tan panon so panggawa ra ed saya?

◻ Anto so kabaliksan na pakawalaan na “bilay ed inkasikayo,” tan panon tan kapigan so pakagamor ed saya?

◻ Anton liket so nayarin pibiangan na amin natan no nipaakar ed “tinapay na bilay”?