Tepetepet Manlapud Managbasa

◼ Akin a dagdaiset ed saray Tasi nen Jehova so mibibiang ed tinapay tan alak diad tinaon a selebrasyon na Pangdem na Katawan?

Saya so lapud saray Tasi nen Jehova, miduma ed saray iglesia na Kakristianoan, so mangaawat ed bangat na Biblia a melag lambengat a bilang na totoo so makagamor na mangatatawen a bilay tan amin lan arum a matoor ya ariripen na Dios so natumangan na andi-anggaan a bilay ed dalin.

Abayaglan imbangat na saray iglesia a say tawen so tumang na amin a mamaliket ed Dios; amin lan arum so onla ed impiernon-apuy. Aliwan ontan so ibabaga na Biblia. Malinlinew ya ibabaga na Kasulatan a pigara lambengat a totoo, a singa saray apostoles, so miuley ed si Kristo ed tawen. Imbaga nen Jesus a saraya so “melag a pulok.” Ibabaga na Biblia a say bilang da so 144,000. (Lucas 12:32; Apocalipsis 14:3, 4) Dakel a nanlingkor ed si Jehova a matoor tan agamoran da so panangabobon to so inatey sakbay a nilukasan nen Jesus so dalan a mamaarap ed mangatatawen a bilay. (Mateo 11:11; Hebreos 10:19-21) Tan kayari na impanpili ed “melag a pulok,” minilyon nin arum so nagmaliw a tuan Kristianos. Para ed amin na sarayan matoor ya anggapo ed “melag a pulok,” itatandoro na Biblia so ilalo ed agmanganggan bilay diad nipawil a paraiso ed dalin. (Salmo 37:20, 29; Apocalipsis 21:4, 5) Balet akin a saray ontan so agmet mibiang ed tinapay tan alak? Impanengneng nen Jesus a say pibibiang ed saray emblema legan na Pangdem na Katawan so para lambengat ed saraman so natawag ed bilay diad tawen, saraman so wala ed balon sipanan.

Siempre, say pananisia ed bagat nen Jesus so makana a para ed amin a makagamor na panamerdona na Dios tan bilay ya andi-anggaan, balanglan bilay diad tawen odino bilay diad sakey a paraison dalin. Saya so impanengneng nen Jesus ed Juan 6:51-54: “Siak so mabilay a tinapay a nanlapud tawen; siopaman a mangan ed sayan tinapay so manbilay na ando lan ando; . . . say tinapay ya iter ko et say laman ko a nisesengeg ed bilay na mundo [na dorondonen a katooan] . . . Siopaman a mangan ed laman ko tan oninum ed dalak so nawalaan na andi-anggaan a bilay.”

Ingen, makatantanda a saratan a salita so impaarap nen Jesus ed aliwan saray babangatan to lambengat. Diad agew kayari na impamakan ton mamilagro ed saray nilibulibo, dinmago so ulop ed si Jesus diad pasen na Capernaum. Sayan ulop so akitongtong ed sikato ya angisakup ed saray salita to ed Juan 6:51-54. Sirin si Jesus so agmitotongtong a manuna ed saray babangatan sanen inkuanto a sikato so piguratibon “tinapay a nanlapud tawen” a makapangiter na nagkalalon ilalo ed mantultuloy a bilay nen say mana ya inakan ed kalawakan.​—Juan 6:24-34.

Diad panalaysay ed saman a karaanan ya eksperiensia ed kalawakan, nonoten iraman so pinmaway ed Ehipto a linma ed kalawakan. ‘Saray ananak na Israel a manbilang na anem a lasus libon makayarin lalaki a di-akaran, nilikud ed saray angkekelag, tan baleg ya alaoklaok ya ulop.’ (Exodo 12:37, 38; 16:13-18) Sayan “alaoklaok ya ulop” so angisakup ed saray Ehipsios ya akiasawa ed saray Israelitas tan arum iran Ehipsios ya akipalaran ed Israel. Namparan saray Israelitas tan say “alaoklaok ya ulop” so nankaukolan na mana pian mansiansian manbilay. Anggaman kuan, kasin say “alaoklaok ya ulop” so walaan na parehon ilalo a singa saray Israelitas? Andi, andian ira. Anggamano nayarian da so mandayew ed limog na saray Israelitas tan nailaloan da so iloob ed Insipan a Dalin, ag-iran balot makapagmaliw ya arari odino saserdote ed leksab na Ganggan a sipanan. Kanian say panangan na literal a mana ed kalawakan so ag-angiter ed amin na parehon ilalo.

Saya so pangibiigan a nonoten sano morekdeken so imbaga nen Jesus ed saray babangatan to ed ngalngalin sakey taon kayari na impangibaga to ed saray salita ed Juan 6:51-54. Diad sayan saginonor ya inkagawa, dedeskribien nen Jesus so sakey a balon gawa a manasaglawi ed aktual a tinapay tan alak a mangisimbolo ed laman tan dala to. Legan ya ileletneg to so selebrasyon na Pangdem na Katawan, imbaga nen Jesus ed saray maapit a patumbok to: “Sayan kopa et kabaliksan to so balon sipanan diad birtud na dalak, a sikato so nikalbo a nisesengeg ed sikayo.” Diad parehon melag a grupo na apostoles, inyarum to: “Sikayo so akipansiansia ed siak diad saray inkasubsubok ko; tan siak so manggawa na sakey a sipanan ed sikayo, a singa say Ama so nanggawa na sakey a sipanan ed siak, nipaakar ed sakey a panarian, pian sikayo komon so mangan tan oninum ed dulang ko diad panarian ko, tan onyurong ed saray trono a mangukom ed saray labinduan tribu na Israel.”​—Lucas 22:20, 28-30.

Imanoen ed saray saginonor a salita a saray mangan tan oninum ed aktual ya alak bilang emblema a mangisisimbolo ed laman tan dala nen Jesus et saray babangatan a wala “ed balon sipanan.” Saratan so wala met ed sananey a sipanan, sakey a ginawa nen Jesus ed sikara ta pian nayarian da so mibiang ed pananguley ‘diad panarian to.’ Malinlinew, tutukoyen dia nen Jesus iraman so ‘nagawan sakey a panarian tan saserdote na Dios tayo, a manuley bilang arari ed dalin.’ (Apocalipsis 5:10) Nen inmunan siglo, ginapoan na Dios so manpipili ed 144,000 a mibiang ed mangatatawen a Panarian. Saray Kristianos ed Corinto so wala ed satan a grupo, lapud sikara so adeskriben “apasantos a mikasakey ed si Kristo Jesus, atawag a magmaliw a sasantos.” (1 Corinto 1:2; ipareng so Roma 1:7; 8:15-17.) Saratan a “sasantos” so mibiang ed Pangdem na Katawan, mibiang a tekep na apresasyon ed embleman tinapay tan ontan met ed alak a kabaliksan to “so balon sipanan diad birtud na dala [to].” ​—1 Corinto 11:23-26.

Natan et wala so mabilay ni ed dalin a melag a nakdaan lambengat na saraman so pinili na Dios a para ed mangatatawen a bilay. Saratan lambengat a wala “ed balon sipanan” so autorisadon mibiang ed saray emblema, say tinapay tan alak, legan na tinaon a selebrasyon na Memoryal.

Siempre, amin a tuan Kristianos natan a manatalaran diad pambilay na ando lan ando ed dalin ed leksab na uley na Panarian so mikabat a saya so posibli diad pangagamil na pananisia ed bagat nen Jesus. A singa imbaga nen Jesus ed ulop, sikato “so mabilay a tinapay a nanlapud tawen.” (Juan 6:51) Ingen, agkabaliksan na satan a saramay walaan na mangaraldalin ya ilalo so nepeg a mibiang ed literal ya emblema ed Memoryal, lapud sikara so anggapo “ed balon sipanan,” nisay sikara so wala ed sipanan ed si Jesus a mikasakey ‘ed panarian to, ya onyurong ed saray trono.’

Sirin, sayan baleg a grupo a walaan na mangaraldalin ya ilalo so agmibiang ed saray emblema, say tinapay tan say alak. Balet saya so agbalot mangidalangirang na kakulangan na pananisia odino apresasyon ed laman tan dala nen Jesus. Diad tua, lapud aralem ya apresasyon da ed bagat to tan say makapalikliket a mangaraldalin ya ilalo a walad arap da, sikara so pihon presente a kada taon bilang matoor a manag-imaton ed selebrasyon na Pangdem na Katawan. Diad onia, isisindag da so dilin pananisia ra tan mangiiter ira na maliket ya ebidensya a say nakdaan na “melag a pulok” tan say dakerakel ya “arum a karnero” so wala ed maligsan pankakasakey.​—Juan 10:16.