Panagpalar—Siansia nin Uso
“Umamengen na sakey, diad sayan agew na kasmak ya inkaliwawaan tan edukasyon, agnakaukolan ya iwalwal so pananisian nibase ed mahika tan anito.” Saya so kabiangan na balikas a pinirmaan na 186 iran prominenten sientista, a pati saray 18 analo na Nobel prize. Anto so totongtongen da? Astrolohya, sakey a kaslakan a porma na panagpalar ya usaren iray bitewen ya, unong ed sikara, “sinmagepsep ed modernon sosyedad.” Kasin sika so personal a manisia ed arum iran porma na panagpalar? Odino kasin sika so angangko et manduaruwa, odino mabiskeg ni ingen a sumpa, a singa sarayan prominenten sientista? Say panmoriam ed sayan pamaakaran so importante. Nengnengen tayo no akin.
Sayan ugali so alablabas a nikasmak. Unong ed sangiyan na sakey a kongreso na saray managpalar ed Paris, “4 milyon a Pranses [totoo] so onla ed saray psychics ed kada anem bulan.” Diad Estados Unidos et wala so kinalkulon 175,000 iran part-time ya astrologo tan 10,000 a sigpot-panaon. Sikara met so dakerakel ed Gran Britanya, a sikara so walaan na saray dili ran eskuelaan. Tan say magasin a Pranses a Ça m’intéresse (That’s Interesting) so nankomento: “Anggan iner a pasen, a pati ed saray maasinson tuloy a sosyedad, nanaabet tayoray mipadparan estatistika. Saray psychics so ondarakel diad sampot na siglo tayo.”
Siopa ra So Ompapanon ed Sikara—Tan Akin?
Nayarin sisiaen na arum a saray pobren edukado lambengat, abeban-klasen totoo so interesado ed saray okulton “siensia,” a say astrolohya so angangko et sankasmakan. Balet si Madame Soleil, sakey a bantog ya astrologon Pranses, so angiparungtal: “Sikaran amin so ondarago, balanglan saray rightist odino leftist, saray pulitiko ed amin a punto de bista, tan saray sankailin papangulo na estado. Anggan saray papari tan komunista so onsisingger ni ed siak.” Mitukoyan ed saya, sanen inatey si Frédéric Dieudonné a managmahika, sakey ya artikulo so pinmatnag ed Le Figaro, a seryoson peryodikon Pranses, so angikuan ya anagyat ed “abalbaleg iran ulop na parokianon personalidad a Pranses, miministros, atatagey iran opisyales, managsulat tan saray artista.”
Saray sugarol so manpanon ed saray astrologon mangaral ed no panon so pangiteen da na pusta ra. Saray negosyante so onasingger ed sikara pian nengnengen no panon so pangipoonan da ed saray kuarta ra. Saray astrologo ni ingen so mabulos a mangibaga ed sikayo no kapigan so ipikal da ed sakey a pambiahe odino ed no anto so lutoen. Tan say panagpalar so dinmupag met la ed arum a lawak. Saray departamento na pulisya ed nanduruman bansa so tinmupleg ed saray managpalar pian usisaen so nipaakar ed saray kriminal tan nanaandin totoo. Tan unong ed sinimban Pranses a Le Figaro Magazine, “say Pentagon so angarkila na 34 a totoon apalangkapan na komaduan pakatebek a mangiter na impormasyon ed no anto so nagagawa ed saray sekreton base militar ed U.S.S.R.” Say parehon magasin so angibalita ed si kongresistan Charles Rose na E.U. a mangibabagan saray Ruso so inmapireng met la ed saray pakayari na psychic.
Akin a say astrolohya so siansia nin uso? Kasin sikato so makapasakit a dibersyon odino panagpalabasan? Kasin sikato so sankaabigan a dalan diad pakaromog ed no anto so itatarya na arapen—odino kasin wala so magmaong a dalan? Nengnengen tayo no sikatayo so makaromog na ebat ed sarayan importanten tepetepet.